Növbədənkənar seçkilərin keçirilməsi konstitusiyanın tələblərinə tam uyğundur

"Milli Məclisə növbədənkənar seçkilərin təyin olunması günün tələblərindən irəli gəlir və mövcud reallıqlar bunu tələb edir. Çünki bu gün Azərbaycan dünyanın diqqət mərkəzində olan çox mühüm bir tədbirin - COP29-un keçirilməsinə hazırlıq ərəfəsindədir".

Bu sözləri "Azərbaycan" qəzetinə açıqlamasında Milli Məclisin Aqrar siyasət komitəsinin sədri Tahir Rzayev deyib. Onun sözlərinə görə, dünyanın əksər ölkələrindən mötəbər qonaqların Bakıya gəlişi bu tədbirin təhlükəsiz keçirilməsini qarşıya mühüm vəzifə kimi qoyur, həm də beynəlxalq öhdəliklərin yerinə yetirilməsini zəruri edir. Məhz bunu nəzərə alaraq Milli Məclisin əksər deputatları seçkilərin irəli çəkilməsini vacib hesab ediblər: "Sözsüz ki, bu qərar qanunauyğundur və bilavasitə ölkənin beynəlxalq imicinin qorunmasına xidmət edir. Digər tərəfdən, ilin sonunda ölkədə bələdiyyə seçkiləri keçirilməlidir. Bundan başqa, "Formula 1" yarışları və digər çox mühüm tədbirlər nəzərdə tutulur. Əlbəttə ki, belə bir şəraitdə parlament seçkilərini şəffaf, demokratik şəraitdə keçirmək bir qədər çətinlik yaradardı. Ona görə də növbədənkənar seçkilərin təyin olunması konstitusiyanın tələblərinə tam uyğundur və ölkəmizin demokratik dövlət kimi tanınmasına töhfədir".

T.Rzayev qeyd edib ki, bu, həm də şəffaflığa, insanların hüquqlarının qorunmasına, seçkilərin beynəlxalq normalar əsasında keçirilməsinə imkan yaradır və burada heç bir qanunsuzluqdan söhbət gedə bilməz: "Xaricdə Azərbaycan əleyhinə olan bəzi qüvvələr, eləcə də daxildə olan bədxahlar növbədənkənar seçkilərin keçirilməsi ilə bağlı əsası olmayan fikirlər söyləməklə seçki prosesinə xələl gətirmək istəyirlər. Belə fikirlər irəli sürürlər ki, seçkilərin irəli çəkilməsi guya müəyyən partiyaların hazırlığına, onların seçkilərə qatılmasına maneələr törədir və bu, düşünülmüş bir prosesdir. Bu, düz yanaşma deyil".

Komitə sədri vurğulayıb ki, əgər kimsə xalq arasında hörmətə layiqdirsə, hər hansı bir siyasi partiya və ya ictimai təşkilat əvvəldən öz mövqeyini ortaya qoyub xalqın etimadını qazanıbsa, o, seçkilərə istənilən vaxt gedə və uğur qazana bilər: "Belə əsassız fikirləri müxalifət hər bir seçkidə söyləyir və nəticədə bunun heç bir əsası olmadığı müəyyən edilir. Parlamentdə bir çox müxalifət partiyaları təmsil olunublar və demokratik prinsiplər nəzərə alınaraq bu partiyaların təmsilçiləri Milli Məclisin komitələrində və komissiyalarında məsul vəzifələr tutublar. Onların arasında komitə sədrləri, komitə sədrlərinin müavinləri və müvafiq beynəlxalq təşkilatlarda təmsil olunan namizədlər var".

Tahir Rzayevin fikrincə, belə fikirlər cəmiyyəti çaşdırmaq, növbədənkənar seçkilərə kölgə salmaq məqsədi daşıyır, ancaq bütün bunlar əsassız iddialardır. Növbədənkənar seçkilər əvvəllər olduğu kimi, yüksək əhvali-ruhiyyədə, demokratik şəraitdə, şəffaf və uğurlu keçiriləcək.

Əsmər QARDAŞXANOVA,

Azərbaycan.-2024.- 2 iyul, № 135.- S.7.