“Freedom House”un hesabatının qərəzli olduğunu bütün dünya görür

ABŞ Dövlət Departamentinin marionet təsisatları olan, guya “demokratiya, siyasi azadlıqlar, insan hüquqları və onların müdafiəsi” ilə məşğul olduqlarını deyən “Freedom House”nin saxta reytinqlərində Azərbaycanla bağlı qərəzli mövqenin əks olunması yenilik deyil. Uzun müddətdən bəridir ki, bu təşkilat bəyanat, hesabat adlandırdıqları cızmaqaralarinda Azərbaycana qarşı qeyri-obyektiv münasibət nümayiş etdirir. Ölkəmiz haqqında yazılanlar və deyilənlər isə həqiqətdən, reallıqdan çox-çox uzaq olan böhtan və yalanlardır.

Üzdə özünü “müstəqil QHT” adlandırıb, bu ad altında fəaliyyət göstərən, əslində isə asılı və muzdlu hökumət aləti olan “Freedom House” və ona oxşar təşkilatların yalan və hay-küylə gündəmi zəbt etməsi, təbiidir ki, onların gizli və məkirili niyyətlərindən xəbər verir. Bu gizli niyyətin arxasında isə həm də gizli məqsədlər dayanır. Prezident İlham Əliyev hələ ötən il iyunun 20-də Çinin “China Media Group” media korporasiyasına müsahibəsində “Freedom House” və digər oxşar təsisatları ifşa etmiş və bildirmişdi ki, “Hamımız bilirik ki, onlar müstəqil deyil. Kim deyə bilər ki, "Human Rights Watch", “Amnesty International” və “Freedom House” müstəqildirlər. Baxın, onlar kimdən pul alırlar və kim musiqini sifariş edir. Onda görəcəksiniz ki, onlar tamamilə asılıdırlar".

Qərb üçün demokratik ölkə ona qulaq asan, itaət edən, necə deyərlər, “sözəbaxan” ölkədir. Biz artıq şahidlik edirik ki, dünyanın “bizdən və bizdən olmayan” bloklarına bölünməsi, ayrı-seçkilik və sıfır tolerant, o cümlədən nifrət dili təşviq edilməsi gizli deyil, açıq formada həyata keçirilir. Sülh və sabitliyə ehtiyac duyulduğu bir vaxtda qarşılıqlı anlaşma meydandan qovulur. “Freedom House”un ideoloqlarının artıq çəkinmədən, özü də qəsdən ayırıcı xətləri dərinləşdirməsi, hazırda beynəlxalq aləmdə cərəyan edən geosiyasi qarşıdurmaya ideoloji rəng verməyə çalışması dövlətləri bu və ya digər düşərgəyə aid etməsi, qruplara bölməsi heç bir məntiqə və standarta sığmır.

Azərbaycana qarşı həmişə qərəzli mövqe sərgiləyən “Freedom House”un 2023-cü ilin sentyabr ayında da Azərbaycan Ordusunun Qarabağda həyata keçirdiyi antiterror tədbirlərindən sonra iddia etmişdi ki, guya orada ermənilərin hüququ pozulub. Özünü hüquq müdafiəçisi adlandıran bu təşkilat 1 milyondan çox azərbaycanlı məcburi köçkün və qaçqının 30 ilə yaxın müddətdə pozulan hüquqlarını “yaddan çıxardı”. Bir dəfə də olsun bu barədə bəyanat vermədi, Ermənistana haqlı iradını bildirmədi.

İllər ötüb keçsə də, “Freedom House”da heç bir yenilik, dəyişiklik yoxdu. Bu təşkilat yenə əvvəlki ampulasındadı. Elə dayandığı yerdə yatıb qalıb. Yenə də ölkəmizə qarşı qara yaxmağa davam edir. Artıq uzun müddətdir özünü radikal erməni diasporunun muzdlu carçısına çevirmiş “Freedom House” 2024-cü il iyulun 1-də heç bir reallıqla üst-üstə düşməyən növbəti anti-Azərbaycan hesabatını dərc edib. Hazırlanmış hesabatda heç bir məntiqə əsaslanmadan Azərbaycanın Qarabağ bölgəsindən ermənilərin könüllü olaraq Ermənistana köçüb getməsini hüquq pozuntusu kimi qələmə verilir. Göründüyü kimi, “Freedom House” təşkilatı insan hüquqları kimi ali dəyəri müdafiə etmək əvəzinə, yenə də radikal millətçi-terrorçu təəssübkeə çevirilir. Yenə də erməniləri, erməniçiliyi müdafiə edir. “Freedom House”da kök salmış vitse-prezident Anni Boyacıyan, o cümlədən idarəçilikdə üstün rolu olan Şaron Nazaryan kimi çoxsaylı radikal erməni funksionerlərinin bu təşkilatda varlıqları onların kim olduğunu və hansı məqsədə xidmət etdiklərini aydın şəkildə göstərir. Ümumiyyətlə, əksəriyyəti terror birləşmələrinin üzvü olan erməni lobbisinin kollektiv Qərbin anti-Azərbaycan mövqe tutan ölkələrində böyük infrastruktura malik olması, siyasətçiləri ələ alması, parlamentə, mətbuata və hökumət orqanlarına yol tapması bir çox hallarda Azərbaycanofobiya mühitinin yaradılması üçün əsas rol oynayır. İkinci Qarabağ müharibəsində məhz erməni diasporunun yerlə-yeksan edilməsi onlara sarsıdıcı zərbə vurdu. Ona görə də hazırda bu təşkilatın erməni klanının təşəbbüsləri əvvəlki kimi kəsərli deyil. Azərbaycanın daim artan beynəlxalq nüfuzu ermənilərə xidmət edən təşkilatları gündən günə zəiflədir.

Ötən əsrin doxsanıncı illərində Ermənistandan və vaxtilə işğal edilmiş Azərbaycan torpaqlarından bir milyona yaxın azərbaycanlının zorla qovulmasına göz yuman “Freedom House” təşkilatının sözügedən böhtan xarakterli hesabatı yayması haqlı olaraq Qərbi Azərbaycan İcmasında hiddət doğurub. İcma bununla bağlı bəyanat verib. Bəyanatda deyilir: “Sözügedən hesabatın sifarişçiləri regionda sülhə mane olmaq və ədavəti qızışdırmaq məqsədi güdürlər. Bir daha geniş ictimaiyyətə xatırladırıq ki, vitse-prezident Anni Boyacıyan daxil olmaqla çoxsaylı radikal erməni funksionerlərinin kök saldığı “Freedom House”un insan hüquqlarının qorunması ilə heç bir əlaqəsi yoxdur və bu təşkilat tamamilə irqçi düşüncəli dairələrin təsirinə düşmüşdür”.

“Freedom House” və başqa təşkilatların Azərbaycan haqqında dünyada yanlış təsəvvür yaratmaq arzuları yerlə-yeksan olacaq. Onlar heç vaxt məqsədlərinə çatmayacaqlar. Çünki hesabatda yazılanlar həqiqətdən çox uzaq olan yalanlardır. Azərbaycana qarşı həmişə ədalətsiz mövqe nümayiş etdirən, öz korporativ maraqlarının təminatı üçün yalanlar danışan, əfsanələr uyduran qərəzli hesabatlar hazırlayan bu təşkilatların məqsədi hər kəsə aydındır. Əsas niyətləri Azərbaycanın dünyada daim artan uğurlarının, nüfuzunun üstünə kölgə salmaqdır. “Freedom House”nin cəhdləri əbəsdir, məğlubiyyətə məhkumdur. Çünki dünyanın gözü açıqdır. Hamı "Freedom House"un Azərbaycanın əleyhinə olan hesabatının reallıqdan kənar və qərəzli olduğunu çox yaxşı görür.

Vahid MƏHƏRRƏMOV,

Azərbaycan.-2024.- 3 iyul (№ 136).- S.12.