Qarabağ və Şərqi Zəngəzurda ikinci seçki keçiriləcək

Növbədənkənar seçkilərin təyin edilməsi həm də COP29 hazırlığına dəstək addımıdır

"Növbədənkənar parlament seçkilərinin təyin edilməsi çox məqsədəuyğun addımdır. Bildiyimiz kimi, bu ilin noyabrında Azərbaycan beynəlxalq əhəmiyyətli, mötəbər tədbirə evsahibliyi edəcək".

Bu sözləri "Azərbaycan" qəzetinə açıqlamasında Milli Məclisin deputatı Jalə Əliyeva deyib. O bildirib ki, payızda keçiriləcək bir sıra əhəmiyyətli tədbirləri nəzərə alaraq Mili Məclisin əksər deputatları parlament seçkilərinin daha erkən keçirilməsi ilə bağlı Prezidentə müraciət etdilər. Daha sonra Prezidentin bununla bağlı müraciətinə Konstitusiya Məhkəməsi tərəfindən müsbət rəy verildi. Prezident sentyabrın 1-nə növbədənkənar parlament seçkilərini təyin etdi. "Milli Məclisə növbəti seçkilərin COP29 konfransı ilə eyni ərəfəyə düşməsi bu beynəlxalq tədbirin təşkilati işlərinə çətinlik yarada bilərdi. Odur ki, qərar vaxtında verildi. Bizim üçün ölkəmizin, dövlətimizin maraqları hər şeydən vacib və olduqca əhəmiyyətli amildir", - deyə o bildirib.

J.Əliyeva qeyd edib ki, bu parlament seçkiləri eyni zamanda 30 illik fasilədən sonra ərazi bütövlüyü tam təmin olunmuş, suverenliyi bərqərar edilmiş, işğaldan azad olunmuş torpaqlar da daxil olmaqla, respublikamızın bütün ərazilərində keçiriləcək. 44 günlük Vətən müharibəsində əldə edilən qələbədən sonra bu, Qarabağ və Şərqi Zəngəzurda keçiriləcək ikinci seçki olacaq.

Deputat xatırladıb ki, bu ilin fevral ayında növbədənkənar prezident seçkiləri baş tutub və xalqımız bu qürurlu anı yaşayıb. İndi isə ərazi bütövlüyü tam təmin olunmuş bütöv Azərbaycanda növbədənkənar parlament seçkiləri keçiriləcək: "Biz, sadəcə, torpaqlarımızı işğaldan azad etməmişik, bu torpaqlara həm də yeni nəfəs, yeni səs, ab-hava gətirmişik. İşğaldan azad olunmuş torpaqların əzəli sakinləri artıq mərhələli şəkildə öz ata-baba yurdlarına böyük qürurla, sevinclə qayıdırlar. Vətəndaşlarımızın 30 ildən sonra xilaskar Prezident, Müzəffər Ali Baş Komandan İlham Əliyevin sayəsində bərpa edilən bütün hüquqlarının içərisində, onların seçmək və seçilmək hüququnun da bərpa edilməsi ikiqat sevindirici və qürurvericidir".

J.Əliyeva vurğulayıb ki, bu baxımdan Milli Məclisə növbədənkənar seçkilərin təyin edilməsi həm ölkəmizdə keçiriləcək beynəlxalq tədbirin hazırlıq işlərinə dəstək addımı kimi, həm də seçkilərin bütün suveren ərazilərimizə şamil edilməsi baxımından əhəmiyyətlidir. Vaxt amili seçki prosesinin daha rahat, şəffaf və demokratik şəraitdə keçirilməsinə imkan yaradacaq. Parlament seçkilərindən sonra isə Azərbaycan bütün diqqətini tamamilə mötəbər tədbirin - COP29-un hazırlıq işlərinə yönəldəcək.

Əsmər QARDAŞXANOVA,

Azərbaycan.-2024.- 4 iyul (№ 137).- S.6.