Zamanında verilən doğru qərar

Parlament seçkiləri COP29-un yüksək səviyyədə keçirilməsinə şərait yaradacaq

"Növbədənkənar parlament seçkilərinin təyin olunması çox vacib idi. Əslində, parlamentə növbəti seçkilər noyabr ayında keçirilməli idi və bu, konstitusiyanın tələbindən irəli gəlirdi. Amma noyabrın əvvəlində Azərbaycanda dünya əhəmiyyətli COP29 tədbirinin baş tutması və seçkilərlə beynəlxalq konfransın üst-üstə düşməsi müəyyən problemlər yarada bilərdi".

Bu fikirləri qəzetimizə açıqlamasında Milli Məclisin deputatı Aydın Mirzəzadə deyib. Deputat bildirib ki, yarana biləcək problemin həlli üçün parlament seçkilərinin konstitusiyaya uyğun olaraq ertələnməsi qərara alınıb. Buna görə parlamentdə çoxluq təşkil edən Yeni Azərbaycan Partiyasının üzvləri müvafiq məktubla Prezidentə müraciət etdilər. Konstitusiya Məhkəməsi Prezidentin müraciətinə müsbət rəy verdikdən sonra seçkilər sentyabrın 1-nə təyin edildi. "Bu, seçkilərin demokratik, şəffaf, azad keçirilməsinə imkan verəcək. Bundan sonra isə COP29 konfransına hazırlıq işləri görüləcək. Nəzərə almaq lazımdır ki, beynəlxalq tədbirin həm hazırlıq mərhələsində, həm də konfrans ərəfəsində parlament üzvləri səlahiyyətləri çərçivəsində tədbirlərdə iştirak etməlidirlər. Bunları da nəzərə alsaq, seçkilərin vaxtının irəli çəkilməsinin daha məqsədəuyğun olması təsdiqlənər".

Deputat vurğulayıb ki, tədbirə hazırlıq dövründə paytaxtda və regionlarda müəyyən məhdudiyyətlər tətbiq edilə bilər. Hökumət ancaq konfransa hazırlıqla məşğul olacaq. Bu isə oktyabr, noyabr aylarında Milli Məclisdə dövlət büdcəsinin müzakirəsini qeyri-mümkün edəcəkdi. Bu baxımdan parlament seçkilərinin tez keçirilməsi həm seçki prosesinin rahat baş tutmasına, həm büdcənin konfransa qədər müzakirədən keçməsinə, həm də tədbirin yüksək səviyyədə təşkilinə şərait yaradacaq.

A.Mirzəzadə qeyd edib ki, növbədənkənar parlament seçkilərinin keçirilməsinə siyasi qüvvələrdən heç bir etiraz olmayıb. Hazırda seçki prosesinə ciddi hazırlıq işləri gedir. Partiyaların bir qismi namizədlərini irəli sürüblər və bu proses davam etməkdədir.

Deputat sonda sentyabrda keçiriləcək parlament seçkilərinin də əvvəlkilər kimi şəffaf və demokratik şəraitdə baş tutacağına inamını ifadə edib.

Ə.QARDAŞXANOVA,

Azərbaycan.-2024.- 4 iyul (№ 137).- S.6.