Qüdrətli ordu, modern hərbi arsenal

Prezident İlham Əliyev 2024-cü ilin dövlət büdcəsinə dəyişiklikləri təsdiq edib. Dəyişikliklərə əsasən, dövlət büdcəsinin xərcləri 40 milyard manata yaxınlaşıb. Artırılan xərclər bir sıra istiqamətlərə, o cümlədən Qarabağ və Şərqi Zəngəzurun bərpasına və müdafiə xərclərinə yönəldilib.

Silahlı Qüvvələrin arsenalı zənginləşdirilir

44 günlük Vətən müharibəsindən sonra Azərbaycan Silahlı Qüvvələrinin modernləşdirilməsi prosesi yeni inkişaf müstəvisinə qədəm qoyub. Bu sahədə həyata keçirilən uğurlu islahatlar, planlı və ardıcıl şəkildə gerçəkləşdirilən işlər sayəsində Silahlı Qüvvələrimiz dünyanın ən qüdrətli hərbi gücləri sırasına yüksəlib. Təsadüfi deyil ki, nüfuzlu "Global Fire Power" mərkəzinin 55 göstərici əsasında hazırladığı hesabatda Azərbaycan Ordusu Cənubi Qafqazda birinci, dünyada isə ilk əlli ordu sırasında qərarlaşıb. 44 günlük müharibədə göstərdiyi misilsiz hünərlə adını dünya hərb tarixinə qızıl hərflərlə yazdıran Azərbaycan Ordusu hər ötən gün daha da güclənir. Prezident, Silahlı Qüvvələrin Müzəffər Ali Baş Komandanı İlham Əliyev də çıxışlarında məhz bu məqama diqqət çəkərək xüsusi vurğulayıb ki, ordumuz müharibə dövründə olduğundan daha da güclüdür.

Ərazilərimizin işğal altında olduğu dövrdə ordunun döyüş qabiliyyətinin güclənməsi Azərbaycan dövlətinin qarşısına qoyduğu əsas vəzifə idi. Bu istiqamətdə görülən işlərin parlaq nəticəsi şanlı ordumuzun qazandığı parlaq zəfərin timsalında aydın görünür. 2020-ci ildə cəmi 44 gün ərzində havada da, quruda da düşmənin canlı qüvvəsini, hərbi texnikasını məhv edən Silahlı Qüvvələrimiz ilk "smart müharibə" aparan ordu kimi də adını dünyanın hərb salnamələrinə yazıb.

Postmüharibə dövründə də Silahlı Qüvvələrin gücləndirilməsi prioritetdir. 44 günlük müharibədən sonra da hərbi islahatların davam etdirilməsi, yeni silahlı birləşmələrin yaradılması, müasir silahlar və texnika ilə təchizatı, hərbi təlimlər və sair işlər ordumuzun döyüş qabiliyyətinin yüksəlməsinə xidmət edir. Silahlı Qüvvələrimizin arsenalı Azərbaycanın müdafiə sənayesinin istehsal etdiyi hərbi texnika və silah-sursatlarla yanaşı, xarici ölkələrin hərbi sənayesinin məhsulları ilə daha da zənginləşdirilir. Bu sırada 2024-cü ilin əvvəlində qardaş Türkiyənin "Baykar" şirkətinin "Akıncı" hücum PUA-sının Hərbi Hava Qüvvələrinin hərbi obyektlərində silahlanmaya qəbul edilməsinin böyük əhəmiyyəti var.

Bu il iyunun 26-da - Silahlı Qüvvələr Günündə Heydər Əliyev Beynəlxalq Aeroportunda Silahlı Qüvvələrin Ali Baş Komandanı İlham Əliyevə İtaliyanın "Leonardo" şirkətinin istehsalı olan "C-27J Spartan" tipli hərbi nəqliyyat təyyarəsi təqdim olundu. Bu təyyarə mürəkkəb coğrafi relyef və əməliyyat şəraitində həm müdafiə, həm də mülki müdafiə tapşırıqlarını yerinə yetirməyə qadirdir. "C-27J Spartan" tipli təyyarədən hərbi nəqliyyat, paraşütçülərin və yüklərin havadan atılması, eləcə də tibbi tapşırıqların yerinə yetirilməsi əməliyyatlarında istifadə olunacaq.

Təcrübə də, nöqsanlar da öyrənilir

Ordumuzun Vətən müharibəsində işlətdiyi hərbi taktika, modern silahlardan sərrast istifadəsi, ümumiyyətlə, əzəmətli güc və yüksək ruh nümayiş etdirərək qazandığı qələbə dünya tərəfindən böyük maraq və qibtə ilə qarşılandı. Buna görədir ki, Vətən müharibəsində ordumuzun həyata keçirdiyi hərbi əməliyyatlar bir sıra ölkələr tərəfindən öyrənilir, hərbi dərsliklərdə istifadə olunur.

Bir başqa reallıq isə ondan ibarətdir ki, Vətən müharibəsində Silahlı Qüvvələrimiz tərəfindən nümayiş etdirilən dünyaya örnək mükəmməl hərbi performans ölkəmizdə də hərbi mütəxəssislər tərəfindən diqqətlə araşdırılır. Yəni Azərbaycan Ordusu daim özünü inkişaf etdirir.

Azərbaycanın müdafiə naziri general-polkovnik Zakir Həsənov Silahlı Qüvvələr Günü ərəfəsində verdiyi müsahibəsində də bildirib ki, müharibə vaxtı əldə edirmiş təcrübə və nöqsanlar öyrənilir: "İstifadə etdiyimiz silahları da öyrənirik - onların hansının tətbiqi bizə daha çox fayda gətirdi, hansılar döyüşlərdə özünü çox da yaxşı göstərmədi. Təbii ki, biz nəticələr çıxardıq və onları dəyişdik".

Nazir əlavə edib ki, bütün bu təhlillər göstərdi ki, müharibədəki bütün o təcrübənin tətbiqindən sonra artıq antiterror əməliyyatı zamanı qısa müddətdə düşmən darmadağın edildi: "Bu antiterror əməliyyatına dünyada unikal əməliyyat kimi baxırlar, onunla maraqlanırlar. Çox sevindirici haldır ki, Müzəffər Ali Baş Komandanın rəhbərliyi ilə Azərbaycan Ordusunun əməliyyatları bu gün bütün dünyada dərindən öyrənilir".

Büdcənin əsas çağırışlarından biri müdafiə və təhlükəsizlikdir

Azərbaycan Ordusunun modernləşdirilməsi, gücləndirilməsi istiqamətində işlər məqsədyönlü şəkildə davamlı olaraq həyata keçirilir. Ölkənin müdafiə potensialının gücləndirilməsinin və silahlı qüvvələrin maddi-texniki təminatının daha da yaxşılaşdırılmasının dövlət büdcəsinin prioriteti olması da buna əyani nümunədir. 2024-cü ilin dövlət büdcəsindən ölkənin müdafiə xərcləri üçün 6 milyard 421 milyon manat vəsait yönəldilmişdi.

2024-cü il dövlət büdcəsinə edilən dəyişikliklərdən sonra müdafiə və milli təhlükəsizlik xərcləri 7 milyard 126,3 milyon manata çatdırılıb.

Görülən bütün bu əsaslı və hərtərəfli işlərin nəticəsidir ki, bu gün Azərbaycan Ordusu istənilən güclərə qarşı layiqli mübarizə apararaq qalib gəlmək əzmində olan dünyanın qüdrətli ordusuna çevrilib.

Yasəmən MUSAYEVA,

Azərbaycan.-2024.- 4 iyul (№ 137).- S.6.