İrəvan Azərbaycana qarşı ərazi iddialarına son qoymalıdır

"Prezident İlham Əliyevin həyata keçirdiyi uğurlu siyasət nəticəsində Azərbaycan dünyanın ən sabit və təhlükəsiz dövlətlərindən birinə çevrilib. Dünya ölkələri ilə bərabərhüquqlu və qarşılıqlı etimada əsaslanan münasibətlərin qurulması, beynəlxalq təşkilatlarla səmərəli əlaqələrin yaradılması, yeni tərəfdaşların tapılması və yüksəksəviyyəli əməkdaşlığın həyata keçirilməsi, mehriban qonşuluq siyasətinin formalaşdırılması, beynəlxalq ədalətin təmin olunması Azərbaycanın yürütdüyü xarici siyasətin əsas istiqamətləridir".

Bu sözləri "Azərbaycan" qəzetinə Milli Məclisin deputatı Kamran Bayramov deyib. Deputat xatırladıb ki, 44 günlük Vətən müharibəsi sona çatdıqdan sonra qalib tərəf olmasına baxmayaraq, Azərbaycan Ermənistanla sülh sazişi ilə bağlı danışıqlara başlamaq təşəbbüsünü irəli sürüb və baza prinsiplərini, sülh sazişinin layihəsini hazırlayıb. Bəzi dövlətlər Ermənistana dəstək verərək Cənubi Qafqazda qalıcı sülhü əngəlləməyə çalışsalar da, hazırda iki ölkə arasında vasitəçilərsiz danışıqlar gedir. Bu isə o deməkdir ki, sülhə və əməkdaşlığa doğru indi daha böyük inamla gedirik.

K.Bayramov qeyd edib ki, Ermənistanın və onun Avropadakı havadarlarının ara qarışdırmasına baxmayaraq, rəsmi Bakı bütün görüş və toplantılarda sülh çağırışlarına sadiqliyini nümayiş etdirir: "Azərbaycan regional sabitliyin, təhlükəsizliyin təmini məqsədilə İrəvana sülh, əməkdaşlıq təklifləri edir. Prezident İlham Əliyev Kanada səfirinin etimadnaməsini qəbul edərkən də sülhlə bağlı bir sıra məsələlərə yenidən toxundu. Dövlət başçısı bildirdi ki, hazırda ikitərəfli səviyyədə daha yaxşı nəticələr görürük. Kiminsə tərəfindən bu prosesə müdaxilə yoxdur. Sərhədlərin delimitasiyası, hətta nadir hal olan demarkasiya məsələlərində razılıqlara gələ bilirik. Prezident İlham Əliyev qeyd etdi ki, hələ sülh müqaviləsi imzalanmayıb, lakin artıq sərhədlərin delimitasiyasına nail olunub".

Deputat xatırladıb ki, Prezident sülh müqaviləsinin mətni, ən azı əsas prinsipləri üzərində işin bir neçə aya yekunlaşa biləcəyini deyib. Dövlət başçısı işğal dövründə vasitəçilərin planının Madrid prinsipləri adlandırılan əsas prinsiplərlə bağlı razılığa gəlməkdən ibarət olduğunu xatırladıb.

K.Bayramov deyib ki, Azərbaycan və Ermənistan arasında sülh müqaviləsinin imzalanması dövlət başçısının da qeyd etdiyi kimi, yalnız Ermənistan konstitusiyasına dəyişiklik ediləcəyi halda mümkündür. Yəni Ermənistanın Azərbaycana qarşı ərazi iddialarına son qoyulmalıdır.

Azərbaycanın son illər qazandığı nailiyyətlərin miqyasının dünyada analoqu olmadığını qeyd edən K.Bayramov bildirib ki, indiyə qədər postsovet məkanında torpağını itirmiş heç bir dövlət onu geri qaytarmağa müvəffəq olmayıb. Bu, o deməkdir ki, Azərbaycan Prezidenti, Müzəffər Ali Baş Komandan İlham Əliyevin rəhbərliyi ilə dünya tarixində görünməmiş səhifələr açılır. Dövlət başçısı Azərbaycanı nəinki güclü dövlətə çevirib, ərazi bütövlüyünü, suverenliyini tam bərpa edərək torpaqlarımızı kənd-kənd, şəhər-şəhər azadlığına qovuşdurub.

Əsmər QARDAŞXANOVA,

Azərbaycan.-2024.- 4 iyul (№ 137).- S.7.