Astana Zirvə görüşü yeni uğurların təməlini qoydu

Prezident İlham Əliyevin Şanxay Əməkdaşlıq Təşkilatına dəvət edilməsi ona olan yüksək etimadın və inamın göstəricisidir

"Qazaxıstanın paytaxtı Astana şəhərində keçirilən Şanxay Əməkdaşlıq Təşkilatının Zirvə görüşü ona üzv olan ölkələrin iqtisadiyyatının inkişafı, təhlükəsizliyin təmin edilməsi, qarşılıqlı əlaqələrin möhkəmləndirilməsi, vacib problemlərin həlli, birgə fəaliyyətin tənzimlənməsi baxımından böyük əhəmiyyətə malikdir.

Prezident İlham Əliyevin Zirvə toplantısına qonaq qismində ikinci dəfə qatılması isə dövlətimizin dünyada artan nüfuzunun və ona göstərilən böyük etimadın ifadəsi olmaqla bərabər, ölkəmizə bəslənilən ümid və onun gələcəyinə olan inamdır".

Bu fikirləri Milli Məclisin Aqrar siyasət komitəsinin sədri Tahir Rzayev "Azərbaycan" qəzetinə açıqlamasında bildirib. Deputat qeyd edib ki, ölkəmiz dünyanın iqtisadi cəhətdən inkişaf edən və ictimai-siyasi baxımdan ən sabit ölkələrindən biridir. Azərbaycan həm də Prezident İlham Əliyevin düşünülmüş siyasəti nəticəsində dünya dövlətləri ilə münasibətlərin yaxşılaşdırılmasına, əlaqələrin möhkəmləndirilməsinə, sülhün, əmin-amanlığın təmin edilməsinə böyük önəm verir və bu sahədə imkanlarını və təşəbbüslərini əsirgəmir.

Şanxay Əməkdaşlıq Təşkilatı da öz fəaliyyətində demokratik prinsiplərə, dövlətlər arasında qarşılıqlı etimada və qonşuluq münasibətlərinə, siyasət, ticarət, iqtisadiyyat, elm və texnologiya, mədəniyyət, təhsil, enerji, nəqliyyat, turizm, sülh, təhlükəsizlik və sabitliyin əldə olunması üçün səylərin birləşdirilməsinə əsaslanan bir orqan kimi üzv dövlətlərin əlaqələndirilməsində, vacib problemlərin müzakirə edilib aradan qaldırılmasında mühüm rol oynayır.

Deputat qeyd edib ki, Azərbaycan bu təşkilatda dialoq tərəfdaşı statusuna sahib olmasına baxmayaraq, onun fəaliyyətində yaxından iştirak edir. Bu qurumla ölkəmiz arasında əməkdaşlıq sahələrini əks etdirən memorandum imzalanıb: "Terrorizm, ekstremizm və separatçılıq ilə mübarizəyə, regional təhlükəsizlik və sabitliyin qorunmasına böyük önəm verən dövlətimiz hər sahədə təşkilatla əlaqələrini ildən-ilə möhkəmləndirmək əzmindədir. 16 ölkənin dövlət və hökumət başçılarının qatıldığı Zirvə görüşünün "Çoxtərəfli dialoqun möhkəmləndirilməsi - davamlı sülhə və inkişafa nail olmaq" mövzusuna həsr edilməsi bu günümüz üçün vacib və bəşəriyyəti düşündürən başlıca məsələdir. Cənab

İlham Əliyevin Zirvə görüşü çərçivəsində Rusiya Prezidenti Vladimir Putin, Qazaxıstan Prezidenti Kasım-Jomart Tokayev, Çin Xalq Respublikasının sədri Si Cinpin ilə görüşləri, əlbəttə ki, ölkəmizin gələcək inkişafı və təhlükəsizliyi baxımından çox əhəmiyyətlidir". T.Rzayev bildirib ki, Zirvə toplantısı çərçivəsində "Azərbaycan Respublikası ilə Çin Xalq Respublikası arasında strateji tərəfdaşlığın qurulması haqqında Birgə Bəyannamə"nin qəbul edilməsi dövlətimizin yeni uğurudur. Çünki Çin dünyanın iqtisadi cəhətdən inkişaf edən və böyük nüfuza malik olan dövlətlərindən biridir. Bəyannaməyə əsasən, tərəflər terrorizmin, separatizmin və ekstremizmin bütün beynəlxalq ictimaiyyət üçün ciddi təhdidlər yaratdığını nəzərə alaraq bu çağırışların qarşısını almaq və onlara qarşı mübarizə aparmaq üçün ümumi səyləri birləşdirməyi qarşıya məqsəd qoyurlar.

Prezident İlham Əliyevin Çin Xalq Respublikası ilə əlaqələrin möhkəmləndirilməsinə böyük önəm verdiyini vurğulayan komitə sədri xatırladıb ki, dövlət başçısı çıxışı zamanı bunu bir daha ifadə edib: "Ölkələrimiz arasında əmtəə dövriyyəsinin artması bizi sevindirir, o, 3 milyard dollara çatıb və artım potensialına malikdir. Biz Çin Xalq Respublikasından Azərbaycana ixracın artmasından məmnunuq".

Deputatın sözlərinə görə, Astanada Azərbaycan, Türkiyə və Pakistan dövlət rəhbərlərinin bir araya gəlməsi və mühüm sənədlərin imzalanması, dünyanın diqqət mərkəzində olan vacib problemlərin gündəmə gətirilməsi sülh və təhlükəsizliyə zəmanətdir. Bu dövlətlər daim bir-biri ilə sıx əlaqədə olub, tarixi və mədəni bağları, qarşılıqlı hörmət və etimad əsasında əməkdaşlığı möhkəmləndiriblər.

"Üçtərəfli görüş hər üç ölkə arasında strateji tərəfdaşlıq əlaqələrinin yeni istiqamətdə genişləndirilməsinə imkanlar yaradır və bu, gələcək inkişafa, təhlükəsizliyə hesablanıb.

Prezident İlham Əliyevin Şanxay Əməkdaşlıq Təşkilatında iştirakı və keçirilən səmərəli görüşlər zamanı bir çox məsələlərin gündəmə gətirilməsi, mövcud problemlərin həllinin araşdırılması, əməkdaşlığın möhkəmləndirilməsinə səylərin göstərilməsi və uğurların əldə edilməsi Azərbaycanın qələbəsidir və dövlətimizin getdikcə artan nüfuzunun parlaq göstəricisidir", - deyə deputat əlavə edib.

T.Rzayev sonda qeyd edib ki, uğurlarımızın artması, Prezident İlham Əliyevə və dövlətimizə göstərilən yüksək hörmət və ehtiram xalqımızın xoşbəxt gələcəyinə yeni yollar açır, Azərbaycanı möhkəmləndirir və şöhrətləndirir. Bu, əlbəttə ki, xalqımızı sevindirir və onları yeni uğurlara ruhlandırır.

Əsmər QARDAŞXANOVA,

Azərbaycan.-2024.- 5 iyul (№ 138).- S.3.