Şuşa türk dünyasının dialoq mərkəzi olur

"Türk Dövlətləri Təşkilatının qeyri-rəsmi zirvə görüşünün Şuşada keçirilməsi 44 günlük Vətən müharibəsində əldə etdiyi möhtəşəm Zəfər ilə ərazi bütövlüyünü təmin etmiş Azərbaycanın bu təşkilatla əlaqələrinin daha da gücləndirilməsi istiqamətində göstərdiyi səylərin bariz sübutudur. İki gün davam edəcək qeyri-rəsmi toplantının mədəniyyət paytaxtımızda baş tutması Azərbaycana və onun liderinə bəslənilən böyük hörmət və inamın ifadəsidir".

Bu fikirləri "Azərbaycan" qəzetinə açıqlamasında Milli Məclisin deputatı Cavanşir Paşazadə deyib. Deputat xatırladıb ki, Türk Dövlətləri Təşkilatının əsası Prezident İlham Əliyevin təşəbbüsü ilə 2009-cu ildə Naxçıvanda qoyulub. Azərbaycan, xüsusilə də dövlətimizin başçısı hər zaman türkdilli ölkələr arasında həmrəyliyin və koordinasiyalı fəaliyyətin artırılmasına böyük səy göstərib. Türk İnvestisiya Fondunun yaradılması təşəbbüsü də məhz Azərbaycan Prezidenti İlham Əliyevə məxsusdur. "Fondda ölkəmizin payı 100 milyon dollar təşkil edir. 44 günlük Vətən müharibəsində ölkəmizin qazandığı möhtəşəm zəfər və ərazi bütövlüyümüzün bərpası türkdilli ölkələrin özünəinam hissini artırıb. Bu gün Türk Dövlətləri Təşkilatında bir araya gələn ölkələrdə də Prezident İlham Əliyevə qarşı böyük hörmət və inam var. Şuşanın dövlət başçılarının qeyri-formal görüş yeri kimi seçilməsi də bu inamın bariz təcəssümüdür", - deyə o bildirib.

Deputat qeyd edib ki, Şuşanın tarixi-mədəni zənginliyi bütün türk mədəniyyətinin zənginliyi kimi qəbul olunur. Məhz ona görə də Türk Dövlətləri Təşkilatının Zirvə görüşünün Şuşada keçirilməsi növbəti illərdə təşkilatın qarşısında duran əsas hədəflərin reallaşdırılması və vacib məsələlərlə bağlı qərarların alınması üçün fürsətdir. Həmçinin iki gün davam edən toplantıda qarşılıqlı milli təhlükəsizliyin qorunması, Türk Dövlətləri Təşkilatını gözləyə biləcək hərtərəfli təhdidlərdən yayınma üçün birgə addımların atılması kimi vacib məsələlər müzakirə ediləcək.

C.Paşazadə vurğulayıb ki, Türk Dövlətləri Təşkilatı liderlərinin Qarabağda toplanmasını həm də Qarabağ zəfərinin birlikdə qeyd edilməsi kimi də qiymətləndirmək olar.

Deputat düşünür ki, bu toplantı Şuşada imzalanmış Şuşa Bəyannaməsinə bərabər sənədin yaxın gələcəkdə bütün türk dövlətləri təşkilatları arasında imzalanması üçün də əla fürsət yaradacaq.

Əsmər QARDAŞXANOVA,

Azərbaycan.-2024.- 6 iyul, № 139.- S.9.