Ölkəmizin ŞƏT-lə əməkdaşlığının perspektivləri çox böyükdür

Astana zirvə görüşü əlaqələrin inkişafına yeni impuls verəcək

"Şanxay Əməkdaşlıq Təşkilatı dünya əhalisinin 3 milyard nəfərindən və dünya iqtisadiyyatının 40 faizindən çoxunu özündə cəmləşdirən beynəlxalq qurumdur. Bu təşkilatda dünya iqtisadiyyatının nəhəngləri olan Çin və Rusiya var, o cümlədən bir çox iqtisadi gücə malik ölkələr də müşahidəçi və dialoq tərəfdaşı qismində ŞƏT sammitlərində iştirak edirlər".

Bu sözləri qəzetimizə açıqlamasında Milli Məclisin deputatı Azər Badamov deyib. Deputat bildirib ki, belə böyük və dünya üçün əhəmiyyətli təşkilata Azərbaycanın iki dəfə fəxri qonaq qismində dəvət olunması Prezident İlham Əliyevin apardığı xarici siyasi kursun uğuru və Azərbaycanın dünyada artan nüfuzunun göstəricisidir.

A.Badamovun sözlərinə görə, Azərbaycan beynəlxalq dəhlizlər vasitəsilə Avropa ilə Asiya arasında körpü yaradır. Bu baxımdan, ŞƏT-də Azərbaycanın iştirakı bu təşkilata üzv ölkələr üçün də yeni imkanlar açır. Əslində, Azərbaycanın ŞƏT-ə daxil olan dövlətlərlə yüksəksəviyyəli ikitərəfli münasibətləri var, həmçinin bu təşkilata üzv olan ölkələrin əksəriyyəti türkdilli dövlətlərdir. Bu baxımdan, Azərbaycanın ŞƏT-lə əməkdaşlığının perspektivləri çox böyükdür. "İyulun 3-4-də Prezident İlham Əliyev Qazaxıstanın paytaxtı Astanada təşkil olunmuş Şanxay Əməkdaşlıq Təşkilatının 24-cü sammiti çərçivəsində Rusiya, Çin, Qazaxıstanın dövlət başçıları ilə ikitərəfli, Türkiyə Prezidenti və Pakistan Baş naziri ilə üçtərəfli görüşlər keçirdi. Dövlət başçısının keçirdiyi hər bir görüş ölkələrimiz arasında əməkdaşlığın səviyyəsinə baxış keçirilməsinə və gələcək imkanların dəyərləndirilməsinə bir fürsət oldu. Bu baxımdan, zirvə görüşü dövlət başçıları arasında ünsiyyət üçün də bir platformadır", - deyə deputat bildirib.

A.Badamov qeyd edib ki, Prezident İlham Əliyevin Çin Xalq Respublikasının Sədri Si Cinpin ilə keçirdiyi görüşdə imzalanan strateji tərəfdaşlıq haqqında bəyannamə isə xüsusi əhəmiyyətə malikdir. Bu bəyannamə ölkələrarası münasibətlərin gələcək inkişafında yeni səhifə açır. Çin dünyanın ən böyük iqtisadiyyatı, əhalisi olan və dünya siyasətinə böyük təsir gücünə malik ölkədir. Görüş çərçivəsində dövlət başçıları ölkələrarası münasibətlərin mövcud vəziyyəti və gələcək perspektivlər ətrafında müzakirə apardılar. Azərbaycanla Çin arasında 3 milyard dollardan çox ticarət dövriyyəsi mövcuddur, eyni zamanda Çin Azərbaycanın ən böyük idxalçılarından biridir. Azərbaycan Çinin 6 şəhərində ticarət evləri açmışdır. Qeyri-neft sektorunda istehsal edilən məhsullarımızın bu ölkənin bazarlarına çıxarılması üçün işlər aparılır.

Deputat vurğulayıb ki, Azərbaycan və Çin arasında münasibətlərdə regional və qlobal təhlükəsizlik, terrorizm və separatizmə qarşı mübarizə, iqtisadi, humanitar, turizm sahəsində əməkdaşlığın genişləndirilməsi xüsusi yer tutur: "Belə ki, Azərbaycana Çindən yüksək texnologiyalar və innovasiyalar sahəsində investisiyalar yatırılır. Azərbaycan Çin vətəndaşlarının vizadan birillik azad edilməsi məsələsini həll edir. O cümlədən Çin Sədri də Azərbaycan vətəndaşları üçün eyni qaydanın tətbiqinə baxılacağını qeyd edib. Azərbaycanda Çin dilinin öyrənilməsinə diqqət artırılacaq. Azərbaycan Çinin təşəbbüsü olduğu "Bir kəmər, bir yol" layihəsinin aktiv iştirakçısıdır. Ölkəmiz ərsəyə gətirdiyi "Şimal-Cənub" və "Qərb-Şərq" nəqliyyat dəhlizləri, o cümlədən Trans-Xəzər marşrutu, Bakı-Tbilisi-Qars dəmir yolu ilə Çindən çıxan yüklərin Avropaya və əks istiqamətdə daşınmasına yeni imkanlar yaradır".

Deputat xatırladıb ki, dövlət başçıları görüşdə bir-birini rəsmi səfərlərə dəvət edib və Çin Xalq Respublikasının Sədri COP29-da ölkəsinin yüksək səviyyədə təmsil olunacağını bildirib. Təbii ki, bu, dövlətlərimiz arasında münasibətlərin çox yüksək səviyyədə olmasının göstəricisidir.

Deputatın fikrincə, "ŞƏT plyus" formatında keçirilmiş görüşdə iştirak edən fəxri qonaqlardan çıxış etmək üçün ilk sözün Prezident İlham Əliyevə verilməsi də ölkəmizin bu təşkilat üçün əhəmiyyətindən irəli gəlir. Çünki Azərbaycan "Şimal-Cənub" və "Qərb-Şərq" nəqliyyat dəhlizləri vasitəsilə ŞƏT-lə əməkdaşlığın genişləndirilməsində xüsusi rol oynayır. Dövlət başçısı bu nəqliyyat kommunikasiyalarının imkanları və gələcəkdə verəcək töhfələri ilə bağlı həmkarlarını məlumatlandırdı. Orta dəhlizin rəqəmsallaşdırılmasının vacibliyindən danışan ölkə rəhbəri bu dəhlizin yük daşımalarda artan rolunu xüsusilə qeyd etdi. Ölkəmizin evsahibliyi etdiyi beynəlxalq tədbirlərin əhəmiyyətindən, Qoşulmama Hərəkatına sədrlik dövründə bu təşkilatın institutlaşması istiqamətində atılan addımlardan danışan dövlət başçısı COP29 beynəlxalq konfransının verə biləcəyi töhfələri qeyd etdi. "Prezident İlham Əliyev 200 ölkənin dəstəyi ilə Azərbaycanın bu il COP29-a evsahibliyi edəcəyini bildirərək dedi ki, ölkəmiz inkişaf etmiş və inkişaf etməkdə olan dövlətlər arasında körpü yaradacaq. Ümumiyyətlə, Bakıda keçiriləcək COP29 qlobal iqlim dəyişikliklərinə qarşı mübarizədə dünya ölkələri arasında həmrəylik yaratmaqla sammit tarixində yeni bir səhifə açacaq", - deyə A.Badamov qeyd edib.

O bildirib ki, Prezident İlham Əliyevin Astanaya səfərini həm də COP29-a hazırlıq prosesi kimi də qeyd etmək olar. Çünki ŞƏT dövlət başçılarının hamısı COP29-da yüksək səviyyədə təmsil olunacaqlar.

Deputat bütün bunları nəzərə alaraq dövlətimizin başçısının Qazaxıstana səfərinin çox uğurlu olduğunu hesab edir. Onun fikrincə, bu səfər Azərbaycanın Şanxay Əməkdaşlıq Təşkilatına üzv dövlətlər ilə əlaqələrinin daha da möhkəmlənməsinə və inkişafına yeni impuls verəcək.

Əsmər QARDAŞXANOVA,

Azərbaycan.-2024.- 6 iyul, № 139.- S.10.