Ölkəmiz Şanxay Əməkdaşlıq Təşkilatının fəal tərəfdaşıdır

"Azərbaycanın uğurlu xarici siyasəti çərçivəsində dünya ölkələri ilə yanaşı, beynəlxalq təşkilatlarla da fəal əlaqələr qurulur. Belə təşkilatlardan biri də Şanxay Əməkdaşlıq Təşkilatıdır. ŞƏT ilə əməkdaşlıq istiqamətləri arasında təşkilatın ənənəvi prioritet sahələri olan və Azərbaycan üçün xüsusi əhəmiyyət kəsb edən terrorizm, ekstremizm və separatizm ilə mübarizə, regional təhlükəsizliyin və sabitliyin təminatı müəyyənləşdirilib".

Bu sözləri "Azərbaycan" qəzetinə Milli Məclisin Beynəlxalq münasibətlər və parlamentlərarası əlaqələr komitəsinin sədr müavini Sevinc Fətəliyeva deyib. Deputat bildirib ki, ölkəmizin beynəlxalq müstəvidə mühüm rol oynadığı iqtisadi əlaqələr, sivilizasiyalararası dialoq diqqət mərkəzində olan məsələlərdəndir.

Bu nüfuzlu təşkilatın 3-4 iyul tarixlərində keçirilən zirvə görüşündə Prezident İlham Əliyev də iştirak edib. Azərbaycanın belə mötəbər təşkilatın sammitinə ikinci dəfə dəvət olunması ölkəmizin, xüsusilə Prezident İlham Əliyevin dünya miqyasında nüfuzunun və ona göstərilən yüksək ehtiramın ifadəsidir. Xatırladaq ki, dövlətimizin başçısı Şanxay Əməkdaşlıq Təşkilatının 2022-ci ilin sentyabrında Özbəkistanın Səmərqənd şəhərində keçirilmiş zirvə görüşündə də iştirak edib.

"Çoxtərəfli dialoqun möhkəmləndirilməsi - davamlı sülhə və inkişafa nail olmaq" mövzusuna həsr olunan budəfəki zirvə görüşündə ŞƏT-ə üzv ölkələrin dövlət və hökumət başçıları siyasi, iqtisadi-ticari, mədəni-humanitar əməkdaşlıq və digər məsələlərə dair geniş spektrdə aktual mövzuları diqqət mərkəzində saxlayıblar. Əsas siyasi sənəd olan Astana Bəyannaməsi ŞƏT-in bir çox aktual məsələlərlə bağlı mövqeyini ortaya qoyur, təşkilatın fəaliyyətini qiymətləndirir və gələcək üçün istiqamətləri müəyyənləşdirir.

Deputatın sözlərinə görə, Azərbaycanın üzv olduğu beynəlxalq təşkilatlarla yanaşı, üzv olmadığı qurumların da sammit, konfrans və görüşlərinə dəvət alması, həmin tədbirlərdə fəal iştirakı ölkəmizin beynəlxalq aləmdə artan imicinin ifadəsidir. Sıralarında Çin, Rusiya, Pakistan, Hindistan və Orta Asiya ölkələrini birləşdirən belə mühüm beynəlxalq platformada Azərbaycanın iştirakı ölkəmizin gündəliyinin irəlilədilməsi, eləcə də regional proseslərdə iştirak və verilən qərarlarda söz sahibi olması baxımından çox önəmlidir. "Azərbaycan ŞƏT-in bütün üzv ölkələri ilə ikitərəfli səviyyədə də yaxşı münasibətlər qurub və bu əlaqələri ildən-ilə uğurla inkişaf etdirir. Təşkilatın əsas məqsədləri üzv dövlətlər arasında qarşılıqlı etimad və qonşuluq münasibətlərinin gücləndirilməsi, siyasət, ticarət və iqtisadiyyat, elm və texnologiya, mədəniyyət, o cümlədən təhsil, enerji, nəqliyyat, turizm, ətraf mühitin qorunması və digər sahələrdə səmərəli əməkdaşlığın inkişaf etdirilməsi, regionda sülh, təhlükəsizlik və sabitliyin əldə edilməsi üçün birgə səylərin göstərilməsi, yeni siyasi və iqtisadi beynəlxalq düzənin yaradılması üçün addımların atılmasından ibarətdir. Azərbaycan hazırda ŞƏT-də dialoq tərəfdaşı statusuna sahibdir. 2016-cı ildə Azərbaycan ilə ŞƏT arasında əməkdaşlıq sahələrini əks etdirən memorandum imzalanıb. Bu mötəbər təşkilatla əməkdaşlığını uğurla inkişaf etdirən ölkəmiz ŞƏT-də müşahidəçi statusu almaq niyyətindədir", - deyə deputat bildirib.

S.Fətəliyeva xatırladıb ki, Prezident İlham Əliyev Astana sammiti çərçivəsində təşkilata üzv olan bir sıra ölkələrin liderləri ilə səmərəli görüşlər keçirib. Eyni zamanda dövlət başçısı zirvə görüşündə dərinməzmunlu çıxış edib. Bütövlükdə, Azərbaycan xarici siyasətində Şanxay Əməkdaşlıq Təşkilatından mühüm platforma kimi istifadə edir. Azərbaycanın çox vacib geosiyasi və coğrafi mövqedə yerləşməsi Asiya ilə Avropanın iqtisadi-ticarət əlaqələrində önəmli rol oynayır. Bu fakt ölkəmizə böyük dividendlər qazandırır.

Əsmər QARDAŞXANOVA,

Azərbaycan.-2024.- 6 iyul, № 139.- S.11.