Türk Dövlətləri Təşkilatının qlobal nüfuzu getdikcə daha da artacaq

"İyulun 6-da Şuşa daha bir mötəbər tədbirə evsahibliyi etdi. Bu dəfə türk dünyasının nəbzi Qarabağın incisi olan Şuşada döyündü. Türk Dövlətləri Təşkilatının dövlət başçılarının qeyri-rəsmi Zirvə görüşünün keçirilməsi Prezident İlham Əliyevin şəxsi təşəbbüsü idi".

"Azərbaycan" qəzetinə açıqlamasında Milli Məclisin deputatı Kamran Bayramov bildirib ki, Zirvə görüşündə imzalanan Qarabağ Bəyannaməsi həm tarixi, həm də geosiyasi baxımdan çox əhəmiyyətlidir. Bu, müdafiə sənayesi əməkdaşlığına yönələn, regionda geostrateji məsələləri əhatə edən, təhlükəsizlik və sabitliyin gücləndirilməsinə nail olmağa imkan verən bir sənəddir.

Deputat qeyd edib ki, məkan olaraq Azərbaycanın Qarabağ bölgəsində dərin mədəni və tarixi əhəmiyyəti olan Şuşa şəhərinin seçilməsi ölkəmizin ərazi bütövlüyünün və milli suverenliyinin əhəmiyyətini bir daha təsdiq edir. "Sənədin regional əməkdaşlıq və inteqrasiya baxımından dəyəri böyükdür. Bu bəyannamə siyasi, iqtisadi, nəqliyyat, müdafiə, humanitar, təhsil və mədəni sahələrdə əməkdaşlığın gücləndirilməsində mühüm rol oynayacaq. Bu, türk dövlətləri arasında birgə inkişaf və strateji tərəfdaşlıq üçün də əhəmiyyətlidir. Nəqliyyat infrastrukturuna xüsusi önəm verən bu sənəd Bakı-Tbilisi-Qars dəmir yolu xətti və Çin-Qırğızıstan-Özbəkistan dəmir yolu kimi layihələr, möhkəm trans-region koridorlar yaratmağın strateji əhəmiyyətini əks etdirir. Bu layihələr ticarəti, iqtisadi inkişafı və regional inteqrasiyanı artırmağa yönələcək", - deyə o əlavə edib.

K.Bayramov vurğulayıb ki, Qarabağ Bəyannaməsinin iqlim dəyişmələri ilə bağlı tədbirləri, davamlı inkişaf, rəqəmsal texnologiya sahəsində əməkdaşlığı, "Rəqəmsal İpək Yolu" layihəsi kimi təşəbbüsü və rəqəmsal hökumət infrastrukturunun inkişafını, rəqəmsal təhlükəsizlik tədbirlərinin gücləndirilməsini əhatə etməsi bu sənədin konkret nəticələrə əsaslandığını və praktiki əhəmiyyət daşıdığını sübut edir.

Bəyannamədə regionda və dünyada sülh, təhlükəsizlik, sabitlik, inkişaf və tərəqqi ideyalarına sadiq olan türk xalqlarının ortaq etnik köklər, tarix, dil, mədəniyyət, ənənələr və dəyərlərə söykənən bir ailə olduğu dünyaya elan edilib.

Deputatın fikrincə, 2021-ci ildə Azərbaycan və Türkiyə arasında imzalanan Şuşa Bəyannaməsi türk dünyasının güclənməsinə müəyyən qədər xidmət etsə də, daha çox iki ölkənin maraqlarını özündə ehtiva edirdi. Qarabağ Bəyannaməsi isə ümumilikdə Türk Dövlətləri Təşkilatının beynəlxalq nüfuzunu daha da gücləndirəcək.

Əsmər QARDAŞXANOVA,

Azərbaycan.- 2024.- 10 iyul (№ 142).- S.6.