Şəhidlərimiz və qazilərimiz bizim qürur yerimizdir

Şəhid ailələrinə, qazilər və müharibə iştirakçılarına respublika səviyyəsində göstərilən dövlət qayğısı bütün rayonlarda olduğu kimi, Göygöl rayonunda da daim diqqət mərkəzində saxlanılır.

Rayon icra hakimiyyəti başçısı Aparatının Vətən müharibəsi iştirakçıları və şəhid ailələri ilə işin təşkili şöbəsi hazırda ərazidə yaşayan 106 şəhid ailəsi üzvü, 148 müharibə əlili və 1868 müharibə iştirakçısı ilə öz işini yüksək səviyyədə qurmağa çalışır. Şanlı qələbəmizdən keçən dövr ərzində şəhidlərin anım günləri və ildönümləri ilə bağlı tədbirlər keçirilir, yığıncaqlarda idarə, müəssisə və təşkilatların, ictimaiyyət nümayəndələrinin, şəhid ailələrinin, müharibə əlillərinin və müharibə veteranlarının iştirakı təmin edilir.

Vətən müharibəsindən keçən müddət ərzində şəhid ailələrinə, müharibə əlilləri və veteranlarına qanunvericilikdə nəzərdə tutulmuş güzəşt və imtiyazlar haqqında, onların üzləşdikləri müxtəlifməzmunlu problemlərlə bağlı çoxsaylı kömək göstərilmişdir. Belə ki, əlillik dərəcəsinin təyin edilməsi, veteran adının və vəsiqəsinin verilməsi, şəhid adının əbədiləşdirilməsi, ad verilmiş küçələrdə abadlıq-quruculuq işlərinin aparılması, ev tikintisi, sahibkarlıq fəaliyyəti və ya xatirə bulaq kompleksinin tikintisi üçün torpaq sahələrinin ayrılması, mənzil və ya avtomobil növbəsinə alınması, iş və ya özünüməşğulluğun təmin olunması, maddi yardım və ya kredit borclarının ödənilməsi, mənzil-məişət şəraitinin yaxşılaşdırılması, tibbi müayinə-müalicə, əməliyyat və tibbi cihazların, dərman ləvazimatlarının alınması, ailə, qonşu münasibətlərində mübahisə və münaqişələrin həlli istiqamətində metodiki köməkliklərin edilməsi və istiqamətləndirilməsi məqsədilə 2574 görüş keçirilmiş və maarifləndirici söhbətlər aparılmışdır.

Göygöl Rayon İcra Hakimiyyəti tərəfindən rayon ərazisində yaşayan imtiyazlı şəxslərin məişət şəraitinin yaxşılaşdırılması məqsədilə bir neçə dəfə maddi yardım edilmişdir. Təkcə keçən il Novruz bayramı münasibəti ilə 102 şəhidin ailə üzvünə 400 manat olmaqla cəmi 40800 manat məbləğində, may ayında 44 günlük Vətən müharibəsində şəhid olmuş 14 şəhidin 26 övladının hər birinə 127 manat olmaqla cəmi 3308 manat, iyun ayında Qurban bayramı münasibətilə 268 nəfər şəhid ailəsi və müharibə əlilinin hər birinə 40 manat olmaqla cəmi 10720 manat, 15 Sentyabr Bilik Günü münasibətilə 6 nəfər müharibə əlilinin övladı üçün məktəbli forması alınması məqsədilə hər birinə 90 manat olmaqla cəmi 540 manat məbləğində maddi yardım verilmişdir.

Noyabr ayında Zəfər Günü münasibətilə Birinci Qarabağ müharibəsində, Aprel döyüşlərində, 44 günlük Vətən müharibəsində, antiterror əməliyyatında və digər tarixlərdə şəhid olmuş şəxslərin ailə üzvlərinə 654 manat, müharibədə iştirak etmiş və əlil olmuş şəxslərə 102 manat olmaqla 1978 nəfərə 257 898 manat məbləğində maddi yardım göstərilmişdir. O cümlədən respublika səviyyəsində ilk olaraq 687 nəfər Qarabağ müharibəsi iştirakçısının hər birinə 102 manat olmaqla 70074 manat məbləğində maddi yardım göstərilmişdir. 2023-cü ilin sentyabr ayında antiterror əməliyyatında Göygöl rayonundan və Kəlbəcər rayonundan şəhid olmuş Amin Həsənovun və Dağbəyi Orucovun ailəsinə 8 min 685 manat yardım edilmiş, yaralanmış 5 nəfər döyüşçü hospitalda və evlərində ziyarət edilmiş, hər birinə 200 manat olmaqla cəmi 1000 manat məbləğində maddi yardım göstərilmişdir. Bunlardan başqa, 16 nəfər şəhid ailəsi üzvünün, 4 nəfər müharibə əlili və 4 nəfər müharibə iştirakçısının problemləri nəzərə alınaraq Göygöl Rayon İcra Hakimiyyəti başçısının müvafiq sərəncamı ilə onlara ümumilikdə 9000 manat məbləğində yardım edilmişdir.

Ümumilikdə həssas və digər kateqoriyadan olan insanlara bu günədək Göygöl Rayon İcra Hakimiyyəti tərəfindən 1 137 146 manat vəsait xərclənmişdir.

Şəhid ailələrinin və müharibə əlillərinin mənzil şəraitinin yaxşılaşdırılması, məşğulluğunun təmin edilməsi məqsədilə rayonda konkret tədbirlər həyata keçirilmiş və bu iş bu gün də davam etdirilir. Belə ki, il ərzində 36 nəfər şəhid ailəsi üzvü və müharibə əlili mənzillə, 2 nəfər müharibə əlili isə fərdi minik avtomobili ilə təmin olunmuşdur. Əlavə olaraq 11 nəfər imtiyazlı şəxs mənzil növbəsinə alınmış, 9 nəfərin ailə üzvü daimi işlə təmin edilmişdir. Ümumilikdə bu günədək 76 nəfər imtiyazlı şəxs mənzil növbəsinə alınmış, 62 nəfər isə daimi işlə təmin olunmuşdur.

Sabir ƏLİYEV,

Azərbaycan.-2024.- 10 iyul (№ 142).- S.10.