Ölkəmizin cənub bölgəsində
turizmin daha da inkişafı üçün potensial böyükdür
Vətənimiz Azərbaycan
ərazisinə və
əhalisinin sayına
görə o qədər
böyük olmasa da, Yaradan ondan
heç nəyini əsirgəməyib. Yer kürəsində mövcud
olan 11 iqlim tipindən 9-u respublikamızdadır.
Dağları, meşələri,
çayları, gur şəlalələri, müalicə
əhəmiyyətli mineral
suları, çoxlu sayda digər təbii sərvətləri,
bir də düşmənə gözdağı
olan mavigözlü Xəzəri var yurdumuzun. Bütün bunlar ölkəmizin həm də geniş turizm potensialı olduğunun real göstəriciləridir.
Uzun illər işğal altında olan torpaqlarımız düşmən tapdağından
artıq azad edilib. İndi bu yerlərdə, xüsusən Şuşada
ardıcıl olaraq beynəlxalq əhəmiyyətli
tədbirlər keçirilir.
Qarabağa və Şərqi Zəngəzura
səfər edən dövlət başçıları,
diplomatik korpusların
nümayəndələri, mədəniyyət xadimləri,
iş adamları buranın təkrarsız gözəlliklərini görüb
heyran olur, yağı düşmən
tərəfindən dağıdılmış,
viran qoyulmuş tarixi abidələrimizi, milli-mənəvi dəyərlərimizi,
məscidlərimizi ürək
ağrısı ilə
seyr edirlər. Bu dağıntıların
fonunda yenidən qurulan şəhər və kəndləri, çəkilən yolları,
tunelləri, salınan
körpüləri və
sürətlə inşa
olunan digər infrastrukturları görüb ölkəmizin
qüdrətinə, xalqımızın
qeyrətinə, vətənpərvərliyinə
əhsən deyirlər.
Bəli, çox çəkməyəcək, tərkibindəki
minerallarla şöhrət
tapmış Karlovı
Varı, Yessentuki və digər məşhur sulardan geri qalmayan Kəlbəcərin
"İsti su"yu insanlara şəfa verəcək. Yenə buraya ölkəmizin və dünyanın hər yerindən axın-axın insanlar gələcək. Yenə
bu yerlərin çal-çağırlı günləri başlayacaq.
Respublikamızın qərb, eləcə də şimal bölgəsinə, Gəncəyə,
durnagözlü Göy
gölə, İsmayıllıya,
Qusara, Zaqatalaya, Qaxa, Qubaya, Şabrana
istirahətə gələn
yerli və xarici turistlərin sayı ildən-ilə artmaqdadır. Vətənimizin
dilbər guşəsi
olan cənub bölgəsinin - Lənkəranın,
Astaranın, Lerikin, Masallının da bu sırada öz yeri var.
Yerli və əcnəbi turistlərin
diqqətini cənub bölgəsinə cəlb
edən bir neçə faktor var. Talış dağları və Xəzər dənizi ilə əhatə olunmuş bölgənin zəngin tarixi, özünəməxsus mədəniyyəti,
əsrarəngiz təbiəti,
ləziz mətbəxi
və s. bu amillərdən ilk yada düşənləridir.
Bütün bunlardan əlavə, bölgəyə
üz tutan turistlərə daha yüksəksəviyyəli xidmətləri
təmin etmək məqsədilə mütəmadi
olaraq hotellərin monitorinqləri təşkil
olunur. Eyni zamanda yerləşmə obyektlərində xidmət
səviyyəsinin qaldırılması
ilə bağlı Milli Ulduz təsnifatına
uyğun olaraq, hotellər müvafiq standartları təmin edir və uyğun
ulduzları alırlar.
Yerləşmə obyektlərinn
turizm reyestri və turizm təsnifatından keçmələri
təmin edilir.
Lənkəranda xüsusilə
son il ərzində
yol infrastrukturunda aparılan quruculuq-abadlıq
işləri turistlər
üçün əlçatanlığı
təmin edib. Flora və fauna
aləminin zənginliyinə
görə fərqlənən
Qızılağac Milli
Parkı və sıx yarpaqlarla örtülmüş meşələrdən
ibarət Hirkan Milli Parkı regionun incilərindəndir.
Mavigözlü Xəzər
dənizi və zümrüd rəngli Hirkan meşələri misilsiz gözəlliyi və ekoloji əhəmiyyəti olan təbiət möcüzələridir.
Ümumdünya İrs
Komitəsinin 2023-cü ildə
təşkil olunan
45-ci sessiyasında "Azərbaycanın
Hirkan meşələri"
nominasiyası UNESCO-nun
Ümumdünya İrs
Siyahısına daxil edilmişdir. Heç də təsadüfi deyildir ki, Hirkan
Milli Parkında olan Xanbulançay dəryaçasını gündə
minlərlə turist ziyarət edir.
Lənkəran və
Astara rayonları naringi, portağal, limon, feyxoa, kivi, kinkan və
s. sitrus meyvələri,
ləziz yerli mətbəxin toyuq ləvəngisi, balıq sırdağı, murqutuş,
çölmə kabab,
turş kabab, boranıplov, Lənkəran
dovğası, qoz küküsü və s. yeməkləri, eləcə
də Azərbaycanda çayçılığın və çəltikçiliyin
mərkəzi kimi tanınır. Yay aylarında buraya səyahət edərkən
heç düşünmədən
yerli çimərliklərə
yollana bilərsiniz. Xəzərin göz yaşı kimi dumduru sularında üzmək, yaxud müalicəvi əhəmiyyətə
malik qara qumlu çimərliklərində
mükəmməl şəkildə
istirahət etmək olar. Gözəl təbii landşaftı, isti və soyuq
mineral suları, əlverişli iqlim şəraiti və inkişaf etmiş nəqliyyat şəbəkəsi
regionda kurort və turizmin inkişafı üçün
əlverişli şərait
yaradır. Gözəl
təbiətin əhatəsində
termal su bulaqlarından tutmuş dəbdəbəli istirahət
komplekslərinə qədər
hər bir şəraiti olan struktur insanlara öz xidmətlərini təklif edir.
Cənub zonasının
multikultral mədəniyyəti,
adət-ənənələri və folkloru bu gün də
yaşadılır. Turistlər
lənkəranlı "Nənələr"
folklor qrupuna qonaq olub talış
nəğmələrini dinləyə
və milli-etnik folklorla yaxından tanış ola bilərlər. Burada yeni yaradılmış Monterey Parkı, yenilənmədən sonra
yeni simada turistlərə təqdim olunan "Mona Hotel"i qeyd etmək olar.
Ənənəvi hotellərlə
yanaşı, turistlərə
təqdim olunan kənd qonaq evlərinin sayı da gündən-günə
artmaqdadır. Dövlət
tərəfindən bu
istiqamətdə zəruri
işlər görülür,
kənd evlərinin tələbatları qiymətləndirilərək,
ev sahibləri lazım olan avadanlıqlarla təmin olunurlar. Bu da
öz növbəsində
kənd yerlərində
əhalinin məşğulluq
məsələsinə müəyyən
töhfə verir.
Cəmi bir saata Lənkərandan gözəl mənzərəli
dolama yollarla Lerikin dağ kəndlərinə getmək
olar. Burada şəhərin səs-küyündən
dincələ və Talış dağlarının
gözəlliyindən həzz
ala bilərsiniz. Talış dağlarındakı
hündür ərazidə
yerləşən sakit
Lerik rayonu gözoxşayan meşələr,
çaylar və şəlalələrlə əhatə
olunub. Məlumdur ki, Lerik uzunömürlülər
diyarı adlanır. Bölgənin suyu, havası və bitkiləri o qədər cəlbedicidir ki, insanlarda bu mühitin
müalicəvi əhəmiyyəti
olduğuna əminlik yaranır. Əslində, Lerikin yerli sakinlərinin
əksəriyyəti 100 ildən
artıq yaşayır.
Onların arasında xüsusilə seçilən
uzunömürlü Barzavu
kənd sakini, 168 il yaşamış Şirəli Müslümov
olub. Rayonda uzunömürlülərə həsr
edilmiş muzey də yaradılıb. Odur ki, uzun
və sağlam yaşamağın sirrini öyrənmək istəyirsinizsə,
Lerikə getməyi qaçırmayın.
Lənkərana qısa
məsafədə yerləşən
Astara son illərdə turizm baxımından sıçrayış
etmişdir desək, yanılmarıq. Kənd turizminə göstərilən
dəstəyin nəticəsində
Astaranın dağ kəndi Sım Azərbaycanda ən çox ziyarət olunan turizm məkanlarından
birinə çevrilmişdir.
Burada son il ərzində nişanlanma və işarələnmə işləri
bu məkanı turistlər üçün
daha əlçatan etmişdir. Son illər ərzində Astara şəhərinin dənizkənarı zolağı
da turizm mərkəzinə çevrilmişdir
və burada hər il yeni-yeni
turizm yerləşmə
obyektləri qonaqların
istifadəsinə verilir.
Masallıda da turizm cənub zonasının digər rayonlarında olduğu kimi, inkişaf yolundadır. Qalır ki, turistlərə xoş istirahətlər, turizmlə məşğul
olan əməkçilərə
isə öz işlərində uğurlar
arzu edək.
Seyran CAVADOV,
Azərbaycan.-2024.-
11 iyul (№ 143).- S.9.