MSK seçkilərlə bağlı genişmiqyaslı maarifləndirmə kampaniyasına başlayıb

Bu il sentyabrın 1-nə təyin olunmuş Azərbaycan Respublikasının Milli Məclisinə növbədənkənar seçkilərin yüksək səviyyədə təşkili, azad, ədalətli və şəffaf keçirilməsi, eləcə də müxtəlif statuslu seçki subyektlərinin maarifləndirilməsi və məlumatlandırılması məqsədilə Mərkəzi Seçki Komissiyası genişmiqyaslı kampaniyaya başlayıb.

İyulun 10-da ölkə üzrə bütün dairə seçki komissiyalarının sədrləri üçün müşavirə təşkil olunub. Bu, dövlət başçısının müvafiq sərəncamı ilə təsdiq edilmiş "Azərbaycan Respublikasında insan hüquq və azadlıqlarının müdafiəsinin səmərəliliyini artırmaq sahəsində Milli Fəaliyyət Proqramı" rəhbər tutulmaqla hazırlanan və seçki iştirakçıları üçün müxtəlif istiqamətləri əhatə edən maarifləndirmə proqramına uyğun olaraq, keçirlən ilk tədbirdir.

Xatırladaq ki, Azərbaycan Prezidenti iyunun 28-də altıncı çağırış Milli Məclisin buraxılması və Milli Məclisə növbədənkənar seçkilərin təyin edilməsi haqqında Sərəncam imzalayıb. Sərəncamla altıncı çağırış Milli Məclis buraxılıb və sentyabrın 1-nə növbədənkənar seçkilər təyin olunub. Mərkəzi Seçki Komissiyasının sədri Məzahir Pənahov müşavirədə bildirib ki, bu prosesə məsul orqan - MSK fəaliyyətə başlayıb. Tədbirlər planı hazırlanaraq ictimailəşdirilib. MSK işlərini təqvim planına uyğun qurur.

Milli Məclisə seçkilər ilk dəfə ölkəmizin bütün suveren ərazilərində keçiriləcək. M.Pənahov parlament seçkilərinin keçirilməsi üçün ölkədəki 125 seçki dairəsi üzrə 6400-dən çox seçki məntəqəsində seçicilərin səsverməsi üçün bütün lazımi şərait yaradıldığını deyib: "Cari il fevralın 7-də prezident seçkiləri müstəqil Azərbaycan tarixində ilk dəfə bütün ölkə ərazisində keçirildi. Biz bu seçkini "Zəfər seçkisi" adlandırdıq. Sentyabrın 1-də keçiriləcək parlament seçkilərində də işğaldan azad edilmiş bölgələrdə yaşayan vətəndaşlar ilk dəfə səs verəcəklər". MSK sədri prezident seçkilərində işğaldan azad olunmuş bölgələrdə daimi əsaslarla 26 seçki məntəqəsi yaradıldığını xatırladıb: "Eyni zamanda müvəqqəti əsaslarla yaradılan məntəqələrimiz də var idi. Ümumilikdə işğaldan azad edilmiş ərazilərdə 47 məntəqə fəaliyyət göstərirdi. Parlament seçkilərində həmin bölgələrdə məntəqələrin sayı kifayət qədər artacaq".

M.Pənahov nəzərə çatdırıb ki, Seçki Məcəlləsinin tələblərinə görə, beynəlxalq müşahidəçiləri dəvət etmək üçün Azərbaycanda üç səlahiyyətli qurum var, bunlar Milli Məclis, Xarici İşlər Nazirliyi və Mərkəzi Seçki Komissiyasıdır. Milli Məclis beynəlxalq miqyasda parlament nümayəndə heyətlərini, XİN ali müşahidəçiləri dəvət edir. Seçki ilə bağlı əməkdaşlıq etdiyimiz qurumlar isə Mərkəzi Seçki Komissiyası tərəfindən dəvət olunur. MSK sədri deyib ki, geniş coğrafiyanı əhatə edən beynəlxalq müşahidəçilər üçün dəvətlər göndərilir.

"Azərbaycan Respublikasının Milli Məclisinə seçkilərin hazırlanması və keçirilməsi prosesində yerli icra orqanlarının vəzifələri və onların seçki komissiyalarının qarşılıqlı fəaliyyəti" mövzusunda çıxış edən Azərbaycan Respublikası Prezidentinin köməkçisi - Prezident Administrasiyasının Ərazi-təşkilat məsələləri şöbəsinin müdiri Zeynal Nağdəliyev keçiriləcək növbədənkənar parlament seçkilərini ölkəmizin ictimai-siyasi həyatında ikinci ən böyük mühüm hadisə kimi dəyərləndirib. Qeyd edib ki, bundan əvvəl Azərbaycan xalqı prezident seçkilərində layiqli namizədinə səs verib və fevralın 7-də keçirilmiş prezident seçkiləri müstəqil Azərbaycanın tarixinə qızıl hərflərlə yazılıb. Prezidentin köməkçisi deyib ki, Seçki Məcəlləsinin tələblərinə uyğun olaraq, parlament seçkilərinində mütəşəkkil qaydada, azad və şəffaf şəkildə keçirilməsi təmin edilməlidir.

O, işğaldan azad edilmiş ərazilərdə əvvəlcə 26 seçki məntəqəsi olduğu halda, indi daha 8 seçki məntəqəsi yaradıldığnı açıqlayıb. Ölkə üzrə 125 seçki dairəsində səsvermə hüququna malik olan şəxslərin sayının bu ilin 28 iyun tarixinə 6 milyon 334 min 444 nəfər təşkil etdiyini, seçkilərədək seçicilərin siyahısının dürüstləşdirilməsinin vacibliyini vurğulayıb. Həmçinin avqustun 9-dək seçki dairələri üzrə açıq və qapalı yerlərin müəyyənləşdirilməsinin başa çatdırılacağını deyib.

Prezidentin köməkçisi seçki komissiyalarının rəhbərlərinə tövsiyə edib ki, hər hansı mənfi hallar aşkarlandıqda müvafiq ünvanlara müraciət etsinlər.

"Seçki hüququnun konstitusion əsasları, Azərbaycan Respublikasının Milli Məclisinə seçkilərdə seçki hüququnun realizə mexanizmləri" mövzusunda çıxış edən Konstitusiya Məhkəməsinin sədri Fərhad Abdullayev seçki prosesinin doğru, şəffaf və açıq-aydın keçirilməsinin əsas amillərdən biri olduğunu vurğulayıb: "Seçki prosesində məhkəmələrin iştirakını siyasi çərçivədə qiymətləndirmək olmaz. Məhkəmələrin prosesdə iştirakı ona hesablanıb ki, cəmiyyət və dövlət insanların seçki hüququnun təmin edilməsində maraqlıdır. Qanuna riayət etmək seçkilərin uğurlu keçirilməsi üçün ən vacib məqamlardan biridir".

Baş prokurorun birinci müavini Elçin Məmmədov "Seçki iştirakçılarının hüquqlarının pozulması və qanunvericiliklə müəyyənləşdirilmiş məsuliyyət tədbirləri" mövzusunda çıxış edib. O, seçki prosesində prokurorluq orqanlarının fəaliyyətindən, maarifləndirmə tədbirlərinin əhəmiyyətindən danışıb. Bildirib ki, Seçki Məcəlləsinin tələblərinə uyğun olaraq, seçki komissiyalarının işinə müdaxilə edənlər cinayət məsuliyyətinə və inzibati məsuliyyətə cəlb olunurlar: "Bunun üçün konkret qayda və normalar var. Məcəllənin 112-ci maddəsinə uyğun olaraq seçicilərin və namizədlərin seçki hüquqlarının pozulduğu halda müvafiq quruma şikayət etmək hüququ var".

Ədliyyə nazirinin müavini Abiddin Hüseynov "Azərbaycan Respublikasının Milli Məclisinə seçkilərdə ədliyyə orqanlarının rol və vəzifələri" mövzusunda fikirlərini bölüşüb. Bildirib ki, nazirliyin seçki prosesində vəzifələrindən biri də penitensiar müəssisələrdə olanların seçki prosesində iştirakının təmin edilməsidir. O, Azərbaycanda penitensiar müəssisələrdə cəza çəkən məhkumların səsvermə hüququnun tam təmin edildiyini bildirib.

Nazir müavini seçki siyahılarının dürüstləşdirilməsində Ədliyyə Nazirliyinin də iştirakını qeyd edib. Məlumatlar Səhiyyə Nazirliyi ilə əlaqəli şəkildə reyestrdə yoxlanılır. A.Hüseynov onu da deyib ki, notariat ofisləri də seçki prosesində sənədlərin təsdiqlənməsi və digər aidiyyəti proseslərdə iştirak edirlər.

Zöhrə FƏRƏCOVA,

Azərbaycan.-2024.- 12 iyul (№ 144).- S.7.