İki dost ölkənin münasibətləri daha da möhkəmlənir

"Azərbaycan və Pakistan dost ölkələrdir. Bizim dostluğumuzun qədim tarixi var. Bu qardaş ölkə 1991-ci ildə Azərbaycanın dövlət müstəqilliyini tanıyan ilk ölkələrdən biridir".

Bu sözləri "Azərbaycan" qəzetinə açıqlamasında Milli Məclisin deputatı Aydın Mirzəzadə deyib. Deputat bildirib ki, Pakistan, həm də indiyə qədər Ermənistanla diplomatik əlaqəsi olmayan dörd ölkədən biridir və bunun səbəbi isə Ermənistanın vaxtilə Azərbaycana qarşı etdiyi təcavüz və torpaqlarımızı işğalda saxlaması olub. Bu gün isə həmin ölkələr Azərbaycanın Ermənistanla sülh müqaviləsinin bağlanmasını gözləyirlər. Pakistan həmişə Azərbaycanın yanında olub, ərazi bütövlüyünü tanıyıb, ölkəmizlə bütün sahələrdə əməkdaşlıq edib. Bu dostluq təkcə rəsmi səviyyədə deyil, xalqlar arasında da mövcuddur. "Ayrı-ayrı ziyalı təbəqələri, universitet əməkdaşları, iş adamları arasında da sıx əlaqələr var. Prezidentimizin bu ölkəyə dövlət səfəri münasibətləri daha da yaxşılaşdıracaq. Pakistan tərəfi Azərbaycan Prezidentinin səfərinə çox böyük həvəslə hazırlaşırdı. Pakistanın tarixində ilk dəfədir ki, ölkəyə səfər edən dövlət başçısının təyyarəsini qırıcı təyyarələr qarşıladılar və müşayiət etdilər", - deyə o əlavə edib.

Deputat xatırladıb ki, Prezident İlham Əliyevin İslamabada səfəri zamanı bütün sahələr üzrə fikir mübadiləsi aparılıb. Pakistan tərəfi yenə də Azərbaycanın haqq işini müdafiə etdiyini, ölkəmizin zəfərinin böyük tarixi əhəmiyyətli hadisə olduğunu bildirdi. Prezident İlham Əliyev də Azərbaycanın Kəşmir məsələsində Pakistanın mövqeyini dəstəklədiyini, bu məsələdə həmişə onun yanında olacağını bəyan etdi. Tərəflər müxtəlif sahələr üzrə, ilk növbədə, iqtisadi sahədə əməkdaşlığı genişləndirmək barəsində qərara gəldilər.

A.Mirzəzadə vurğulayıb ki, Azərbaycan Pakistan iqtisadiyyatının müxtəlif sahələrinə sərmayələr yatırmaq istəyir və bunun üzərində çox ciddi işlər gedir: "Bu səfər iki ölkə arasındakı münasibətləri daha da möhkəmləndirəcək. Dövlətlər bir-birinə daha da yaxınlaşacaq".

Deputat hesab edir ki, Azərbaycan-Pakistan dostluğu ölkəmizin dünya birliyində nüfuzunun daha da artmasına dəstək olacaq.

Əsmər QARDAŞXANOVA,

Azərbaycan.-2024.- 13 iyul (№ 145).- S.11.