Pakistanla münasibətlərimiz yeni yüksəliş mərhələsindədir

"Azərbaycan və Pakistan bir-birinə sıx dostluq əlaqələri ilə bağlıdır. Pakistan Azərbaycanın müstəqilliyini tanıyan ilk dövlətlərdən biridir, iki ölkə arasında diplomatik əlaqələrin əsası 1992-ci ilin iyununda qoyulub".

Bu sözləri "Azərbaycan" qəzetinə açıqlamasında Milli Məclisin deputatı Cavanşir Paşazadə deyib. 1993-cü ilin martında Bakıda Pakistan səfirliyinin açıldığını xatırladan deputat bildirib ki, Azərbaycan isə İslamabadda öz diplomatik missiyasına 1997-ci ilin avqustunda başlayıb. Azərbaycan və Pakistan arasında münasibətlərin hərtərəfli inkişafında Ulu Öndər Heydər Əliyevin böyük xidmətləri olub. Ümummilli Lider Heydər Əliyevin bu siyasəti Prezident İlham Əliyev tərəfindən uğurla davam etdirilir.

C.Paşazadə qeyd edib ki, bu gün Azərbaycan və Pakistan arasında əməkdaşlıq hər bir sahədə uğurla davam etdirilir: "Xüsusilə də təhlükəsizlik və müdafiə sahələrində əməkdaşlıq genişlənib. Qardaş Türkiyə kimi Pakistan da hər zaman keçmiş Dağlıq Qarabağ münaqişəsi ilə bağlı öz qəti mövqeyini bildirib. Hətta Pakistan işğalçı siyasətinə görə Ermənistanla diplomatik əlaqələr qurmayıb və onu bir dövlət kimi tanımayıb. Həmçinin Pakistan Senatının Xarici Əlaqələr Komitəsi Azərbaycana dəstəyini möhkəmləndirmək üçün Xocalı faciəsini soyqırımı kimi tanıyıb. 44 günlük Vətən müharibəsində də İslamabad birmənalı olaraq Azərbaycanın ədalətli mövqeyini dəstəkləyib".

Deputat vurğulayıb ki, Azərbaycan da bütün məsələlərdə Pakistanın mövqeyini dəstəkləyərək, hər zaman qardaş ölkə kimi onun yanında olub. Pakistan və Azərbaycan hər zaman çiyin-çiyinə dayanan dost ölkələrdir. Ən önəmlisi isə, xalqlarımız da öz rəhbərlərinin fikirlərini bölüşürlər.

Prezident İlham Əliyevin bu il iyulun 11-12-də dövlət səfəri Azərbaycan və Pakistan arasındakı strateji tərəfdaşlıq münasibətlərinin daha da gücləndirilməsində və bütün sahələr üzrə əməkdaşlığın inkişaf etdirilməsində xüsusi rol oynayacaq. Səfər zamanı Prezident İlham Əliyev Pakistan İslam Respublikasının Baş naziri Məhəmməd Şahbaz Şərif və Prezident Asif Əli Zərdari ilə görüşlər keçirib. Keçirilən bu mühüm görüşlər, imzalanan sənədlər iki qardaş ölkə arasındakı münasibətlərin inkişafına mühüm töhfələr verəcək.

Müsahibimiz bildirib ki, bu gün hər iki dövlət üçün mühüm əhəmiyyət kəsb edən məsələlərdən biri də ölkələrimiz arasında əməkdaşlığın yeni və daha güclü formatlarda inkişaf etdirilməsidir.

Deputat düşünür ki, dövlətimizin başçısının Pakistana dövlət səfəri iki qardaş ölkə arasındakı münasibətlərə yeni məzmun gətirilməsinə, qarşılıqlı əməkdaşlığın daha geniş sahələri əhatə etməsinə və uzunmüddətli birgə fəaliyyətə təkan verəcək.

Əsmər QARDAŞXANOVA,

Azərbaycan.-2024.- 14 iyul (№ 146).- S.13.