Qardaş ölkələr arasında imzalanmış sənədlər əlaqələri daha da möhkəmləndirəcək

"Prezident İlham Əliyevin təyyarəsi Pakistanın hava sərhədini keçəndən yerə enənə qədər qardaş ölkənin hərbi qırıcılarının dövrəsində təzim uçuşu etmələri, onu qarşılamağa isə Hərbi Hava Qüvvələrinin Nur Xan bazasına Baş nazir Məhəmməd Şahbaz Şərifin özünün təşrif gətirməsi Azərbaycan xalqına və liderinə necə böyük sayğıyla yanaşıldığının sərgilənməsi idi. Hər kəsin bildiyi reallığın - Pakistanda Azərbaycana doğma, qardaş ölkə kimi baxıldığının sərgilənməsindən söhbət gedir ki, fikrimcə, bu da elə-belə deyil".

Bu sözləri qəzetimizə açıqlamasında Milli Məclisin deputatı Sahib Alıyev deyib. Deputat bildirib ki, dilinin adı belə ordu dövləti olduğunu təsdiqləyən Pakistan Minsk qrupunun üç həmsədri də daxil olmaqla bir sıra böyük dövlətlərin açıq şəkildə bizə qarşı çıxmalarına rəğmən təkbaşına BMT-nin 4 bəlli qətnaməsini reallaşdırmağı bacarmaqla presedent yaratmış, işğalçı forpost rolu oynayan Ermənistan üzərində zəfər çalmış əzmli xalqın Müzəffər Ali Baş Komandanını bu cür qarşılamalıydı. Bu, həm də bir neçə gün öncə Astanada ŞƏT sammiti çərçivəsində keçirilən Azərbaycan-Türkiyə-Pakistan üçtərəfli görüşünün nə anlam daşıdığını bilməyənlərə bir daha çatdırılan mesaj idi: "Mesaj isə bu idi ki, bizim zəfərimizi hələ də həzm etmək istəməyənlərlə yanaşı, ona özününkü kimi yanaşanlar da var. Azərbaycanın zəfərini alqışlayan qardaş dövlətlərin mövqeləri, onu gözü götürməyənlərinkindən fərqlidir, fərq də sarsılmazlığındadır. İki dövlət arasında, demək olar ki, bütün sahələri əhatə edən 15 anlaşma, Azərbaycanın Pakistan iqtisadiyyatına ilkin mərhələdə 2 milyard dollar yatırım qoymaq planı, azərbaycanlı mütəxəssislərin İslamabadın modernləşməsinə verəcəkləri töhfə əminəm ki, aradakı bağları daha da möhkəmləndirəcək. Ancaq Pakistanda ən önəm verilən məsələlərdən bəlkə də birincisi Azərbaycan Prezidenti cənab İlham Əliyevin Cəmmu və Kəşmir probleminə yanaşmada tutduğu mövqedir".

Deputat xatırladıb ki, BMT-nin sözügedən regionlarla bağlı hələ də yerinə yetirilməmiş 4 qətnaməsi mövcuddur. Özü də onlar Azərbaycan topaqlarının işğalına son qoyulmasına çağıran qətnamələrdən təqribən yarım əsr qabaq, daha dəqiqi, 1948-ci ildə qəbul edilmişdi. Ona görə də BMT-nin yerinə yetirilməyən qətnamələrini təkbaşına reallaşdırmağı bacarmış bir dövlətin başçısının Cəmmu və Kəşmir məsələsindəki mövqeyi Pakistan üçün o qurumun Təhlükəsizlik Şurasının daimi üzvlərinkindən heç də az önəmli olmamalıdır. Üstəlik, Azərbaycan öz mövqeyində onların əksəriyyətindən fərqli olaraq səmimi və qətiyyətlidir.

Ə.QARDAŞXANOVA,

Azərbaycan.-2024.- 14 iyul (№ 146).- S.13.