Qarlı-çovğunlu bir qış günü səhərin ala-toranında "post"dan
evə qayıdan Məzahir səkkiz aylıq körpəsi Allahverdi və həyat yoldaşı Aybənizi də götürüb kənd camaatı ilə birlikdə keçilməz
qarlı aşırımlara
üz tutdular. Beləliklə, qədim bir xalqın dədə-baba yurdundan, tarixi torpaqlarından böyük köçü
başladı. Bununla qədim bir türk torpağı da sahibsiz qalmış
ruhların məzarlığına
çevrildi… Elə o
gündən də Allahverdi adlı səkkiz aylıq bir körpənin taleyinə əzablı günlərin gündəlikləri
yazılmağa başladı.
Allahverdi böyüdükcə
ürəyində qəzəb
və həsrət də pöhrələnirdi.
Hər gün valideynləri ona öz qədim dədə-baba yurdlarından,
Qərbi Azərbaycanda
qoyub gəldikləri xoşbəxt günlərin
xatirələrindən, vətəndən,
torpaqdan danışırdılar.
Ürəyində sevgi
olmayanlar qəhrəman
ola bilməz. Bu sevdada olan Allahverdi də
öncə Vətəndir, - deyirdi. Elə bu düşüncə
ilə yaşadığındandır ki, 44 günluk Vətən
müharibəsinin tarix yazan qəhrəmanlarından biri də
o oldu. Özü tarixə qovuşsa da, illər, əsrlər
keçəcək, qəhrəmanlığı
yaşayacaq.
Söhbət
Xüsusi Təyinatlı Qüvvələrin kəşfiyyatçı
giziri, qəhrəmanlıq dastanımızın şərəf
salnaməsini yazanlardan biri, qəhrəman
döyüşçü Allahverdi Məzahir oğlu Ələkbərovdan
gedir.
Allahverdinin
valideynləri əslən Qərbi Azərbaycanın Masis
rayonunun Sayatnova kəndindəndirlər. Özü isə
1987-ci ildə Bakı şəhərində anadan olub. Qəhrəmanımızın
valideynləri qarlı, çovğunlu bir gecədə erməni
terrorçularının xalqımızın başına gətirdikləri
ardıcıl müsibətlərə dözməyərək
öz dədə-baba yurdlarını tərk etmək məcburiyyətində
qalıblar. Orta məktəbdə təhsilini başa vurandan
sonra Allahverdi 2006-cı ildə Tovuz rayonunda yerləşən
"N" saylı hərbi hissənin kəşfiyyat bölməsində
həqiqi hərbi xidmətə başlayıb. 2015-ci ilin
avqust-dekabr aylarında Müdafiə Nazirliyinin Təlim Tədris
Mərkəzində xüsusi kurs keçərək Azərbaycan
Ordusunda gizir rütbəsində hərbi qulluqçu kimi xidmətini
davam etdirib. 2017-ci ildə Allahverdi Ələkbərov imtahan
verərək Xüsusi Təyinatlıların
Təlim Kursuna yazılıb və buranı da müvəffəqiyyətlə
başa vuranlar sırasında olub. Kəşfiyyatçı
gizir 2020-ci il sentyabrın 27-də başlayan Vətən
müharibəsində Suqovuşanın, Füzulinin, Hadrutun
düşmən işğalından azad olunması uğrunda
gedən qanlı döyüşlərdə qəhrəmanlıqlar
göstərib. 2020-ci il oktyabrın 20-də Qubadlı rayonu ərazisində
Milli Qəhrəmən Şükür Həmidovun şəhid
olduğu yüksəkliyin azad olunması uğrunda gedən
qanlı döyüşdə yaralı döyüş
yoldaşını əməliyyat mövqeyindən
çıxararkən düşmən qumbaraatanının mərmisinə
tuş gəlib. Allahverdi Ələkbərov ağır qəlpə
yarası alaraq Füzuli Rayon Xəstəxanasına yerləşdirilib. Ardıcıl olaraq 11 dəfə cərrahi
əməliyyat olunaraq həyat uğrunda mübarizə
aparıb sağ qalmağı bacaran qəhrəman
döyüşçünü həkimlər "dəmir
adam" adlandırıblar. Xalqımızın vətənpərvər
oğlu Allahverdi Ələkbərov Şuşanın
düşmən işğalından azad olunma xəbərini
eşidərkən həyəcanlanır və yarası qan
verir. Təəssüf ki, bu dəfə "dəmir
adam"ın həyatını xilas etmək mümkün
olmur. 11 noyabr 2020-ci ildə xalqımızın qəhrəman
oğlu Allahverdi Ələkbərov
böyüyüb boya-başa çatdığı Ucar
rayonunda böyük bir izdiham, xalq sevgisi ilə Şəhidlər
xiyabanında torpağa tapşırılır. Göstərdiyi
qəhrəmanlığa görə o, ölümündən
sonra "İgidliyə görə", "Füzulinin azad
olunmasına görə", "Qubadlının azad
olunmasına görə" medalları ilə təltif
olunur.
Elşən QƏNİYEV,
Azərbaycan.-2024.-
16 iyul (№ 147).- S.10.