Paris problemlər bataqlığındadır

Yay Olimpiya Oyunlarına 10 gün qalsa da, Fransada gərgin vəziyyət davam edir

32 ildən sonra Fransa yenidən Olimpiadaya evsahibliyi edir. Yarışların başlamasına 10 gün qalıb. Lakin gözlənilən turist axını əvəzinə, şəhərin mərkəzindəki dükanlar və iaşə obyektləri ziyarətçi azlığı səbəbindən bağlanır.

Parisin Yay Olimpiya Oyunlarına hazır olmaması artıq təşkilatçılarda panik vəziyyət yaradıb. Yarışların başlanmasına qısa vaxt qalıb, lakin hər gün bəzi startların baş tutacağına şübhələr artıb. Şəhər sözün əsl mənasında problemlər bataqlığındadır: kütləvi etirazlardan tutmuş, antisanitar vəziyyətə qədər hər şey qeyri-normallığı ilə diqqət çəkir.

Parisin nəqliyyat-logistika sistemində də problemlər yetərincədir və qısa zaman kəsiyində həll edilməsi mümkün deyil.

İndiki halda mütəxəssisləri ilk növbədə üzgüçülük yarışlarının planlaşdırıldığı Senadakı suyun vəziyyəti narahat edir. Çünki açılış mərasimi bu məşhur çayda olmalıdır. Çirkli sudakı infeksiyalardan qorunmaq üçün idmançılar dava-dərman almağa məcburdurlar. Belə ki, Parisin kanalizasiya sularının axıdıldığı Sena çayı təhlükəli bakteriyalarla doludur. Təhlillər göstərir ki, çayda olan bakteriyaların sayı icazə verilən standartlardan iki-üç dəfə çoxdur.

3 ay öncə Fransa prezidenti Emmanuel Makron ictimaiyyəti sakitləşdirmək istəyib və hətta parislilərin özlərinin də məlum səbəblərdən əsrin əvvəllərindən bəri girmədikləri çayda üzməyə söz verib. Lakin indiyədək vədinə əməl etməyib və bu missiyani idman naziri Ameli Udea-Kasteranın üzərinə qoyub. Məcburiyyət qarşısında qalan nazir dalğıc geyimində Sena çayına daxil olub. Məlumata görə, Udea-Kastera yerli paralimpiyaçı Ankinan ilə birlikdə çayın yarışların keçiriləcəyi yerində qısa müddət ərzində üzüb.

Bidirilir ki, nazir kameralar qarşısında Sena çayının bulanıq suyuna girərək, III Aleksandr körpüsü və Əlillər körpüsü arasındakı qısa məsafəni qət edib. Sudan çıxdıqdan sonra o, jurnalistlərə bildirib: "Biz dedik ki, Olimpiadaya hazır olacağıq və biz hazırıq. Bu heyrətamizdir, vəd yerinə yetirilib!". Nazir əlavə edib ki, bu yolla o, son dörd ildə Sena çayının təmizliyində dövlət xidmətlərinin işinin nəticələrini nümayiş etdirmək istəyib.

Bir çox nəşrlər isə qeyd edib ki, Ameli Udea-Kastera bulanıq və çirkli sudan qorunmaq üçün dalğıc geyimindən istifadə edib.

Makronu isə indiki vəziyyətdə müəyyən mənada başa düşmək olar. Bütün daxili və xarici cəbhələrdə ağır məğlubiyyətlərə uğrayan, liderlik etdiyi ölkədə nazirlər kabineti formalaşdırmaqda aciz olan, bir sözlə, başını itirən prezidentin çayda çimməklə bağlı xalqa verdiyi vəd yada düşmür...

Qeyd edək ki, Sena çayı sahili boyunca və Trokadero meydanında baş tutacaq açılış mərasimində potensial təhlükələrin yüksək riski fonunda tamaşaçıların sayının 600 mindən 326 minə endirilməsi qərara alınıb. Olimpiadaların keçirildiyi ərazilərdə və Paris sahillərinin yaxınlığında hərəkət etmək üçün oyunlarda xüsusi QR kodları tətbiq ediləcək.

Bu arada, Fransa həmkarlar ittifaqları da idman festivalına münasibətdən kənarda qalmayıblar.

Ölkənin ən böyük təşkilatı olan Ümumi Həmkarlar İttifaqları Konfederasiyası Olimpiada zamanı hökumət, yerli idarəetmə orqanları və səhiyyə işçilərini əhatə edəcək tətilin keçiriləcəyi barədə xəbərdarlıq edib.

Xatırladaq ki, Parisdə Olimpiya Oyunları iyulun 26-dan avqustun 11-dək keçirilməlidir.

Rizvan CƏFƏROV,

Azərbaycan.-2024.- 16 iyul (№ 147).- S.12.