Azərbaycan gəncliyi Vətən müharibəsində olduğu kimi, quruculuq işlərində də fərqlənir

Prezident, Ali Baş Komandan İlham Əliyevin qətiyyəti, böyük əksəriyyəti gənclərdən ibarət ordumuzun şücaəti sayəsində Ermənistan terrorçu silahlı birləşmələrinin 30 ildən artıq düşmən tapdağı altında olan Qarabağ bölgəsi və digər ərazilərimiz Zəfər qələbəsi ilə işğaldan azad edildi.

İkinci Qarabağ savaşı kimi tarixə düşən Vətən müharibəsində minlərlə Azərbaycan gənci qorxmadan, çəkinmədən ən çətin döyüşlərə atıldı, yüzlərlə yeniyetmə oğlanlarımız könüllü olaraq cəbhəyə yollandı.

44 günlük Vətən müharibəsində Azərbaycan gəncləri öz qanları ilə qəhrəmanlıq dastanı yazdılar, vətənpərvərlikləri ilə diqqət çəkdilər. Odur ki, Azərbaycan gəncliyi bu gün daha qürurlu və məğrurdur. Görünən odur ki, 44 günlük Vətən müharibəsində möhtəşəm qələbənin əldə olunmasında vətənpərvərlik ruhunda böyüyən gənclərin rolu əvəzsiz olmuşdur. Müzəffər ordumuzun əfsanəvi qəhrəmanlığı və yüksək döyüş bacarığı isə dünyada heyrətlə qarşılanmışdır.

Vətənə sevgi, məhəbbət, düşmənə nifrət hissi ilə böyüyən gənc nəsil Müzəffər Ali Baş Komandan İlham Əliyevin rəhbərliyi ilə əzəli torpaqlarımızı işğalçılardan azad edərək Azərbaycanın hərb tarixinə yeni səhifələr yazmış, xalqımıza əvəzsiz sevinc bəxş etmişdir. Azərbaycan Prezidenti İlham Əliyev demişdir: "Siyasi, iqtisadi, hərbi, mənəvi istiqamətlərdə, gənc nəslin tərbiyə edilməsi istiqamətində məqsədyönlü siyasət aparılırdı və elə gənc nəsil yetişdi ki, canını fəda etdi torpaq uğrunda. Elə gənc nəsil yetişdi ki, öz qanı-canı bahasına torpağımızı düşmənin əlindən aldı. Müharibədə bütün nəsillərin nümayəndələri iştirak ediblər, qəhrəmanlıq göstəriblər. Amma hər kəs bilməlidir ki, əsas missiyanı mənim prezidentlik dövrümdə yetişən gənclər yerinə yetiriblər, 2003-cü ildə uşaq olan gənclər yerinə yetiriblər. İlk növbədə, biz onlara borcluyuq, bütün Azərbaycan xalqına borcluyuq. Bütün xalqımız bu qələbəni yaxınlaşdırırdı və bütün amillər birləşərək bu müharibənin nəticələrini şərtləndirdi".

Hərbi mütəxəssislərin fikrincə, Azərbaycan igidləri Qarabağ savaşında yalnız silah və texnika gücü ilə yox, eyni zamanda fərdi şücaətləri ilə yaddan çıxmaz olublar. Bu da onların Vətənə məhəbbətlərinin bariz nümunəsi kimi bugünkü yeniyetmələr üçün örnəkdir. Belə vətənpərvər, qəhrəman gəncləri olan dövlət heç vaxt yenilməyəcək, daim öz şan-şöhrətini və qüdrətini qoruyub saxlayacaqdır. Artıq vətənpərvər gənclərimiz mənfur düşməndən azad etdikləri müqəddəs torpaqların bərpasında, tikinti-quruculuq işlərində də əvəzsiz xidmətlər göstərirlər. Qürurverici haldır ki, işğaldan azad edilmiş bəzi yaşayış məntəqələrinə, o sıradan Zəngilan rayonunun Ağalı kəndinə, Tərtər rayonunun Talış kəndinə, Laçın şəhəri və rayonun Zabux, Sus kəndlərinə, Füzuli, Şuşa, Xocalı şəhərlərinə keçmiş məcburi köçkünlər köçürülüb. Bu ilin sonunadək Cəbrayıl, Kəlbəcər, Xankəndi, Xocalı, Şuşa şəhərlərinə təxminən 20 min nəfərin qayıdacağı nəzərdə tutulub. Hazırda kənd və rayonlarımıza qayıdış davam edir. İllərlə həsrətində olduğumuz dədə-baba yurdlarımızda yeni həyat başlayıb. Gənclərin təşəbbüsləri, onların əməyi bu gün hər yerdə görünməkdədir. Bu baxımdan, təbii ki, yeni nəslin vətənpərvərlik və dövlətə sədaqət ruhunda yetişməsində Ulu Öndər Heydər Əliyevin irsi əvəzolunmazdır. Bu gün Azərbaycanda həyata keçirilən gənclər siyasətinin, gənclərə göstərilən diqqət və qayğının əsasında ölkə üçün layiqli vətəndaş və sağlam nəslin yetişdirilməsi dayanır. Xalqımızın Ümummilli Lideri müstəqil düşüncə tərzinə sahib vətənpərvər nəslin yetişdiyini qürur hissi ilə vurğulayaraq deyirdi: "Məni hədsiz dərəcədə sevindirən odur ki, Azərbaycanın gələcəyini möhkəm əllərdə saxlaya bilən, Azərbaycanı daim bütün xətalardan qoruya bilən, Azərbaycanın dövlət müstəqilliyini, demokratik dövlətini qoruya bilən gəncliyi vardır". Ulu Öndərin həmişə etibar etdiyi Azərbaycan gəncliyi dövlətimizin başçısı İlham Əliyevin rəhbərliyi ilə bu gün xariqələr yaradır.

Vətən müharibəsində qazanılan tarixi qələbənin mayasını təşkil edən Azərbaycan gəncliyinin vətən sevgisi, həmrəyliyi, habelə Ali Baş Komandana olan inam və ehtiramı hər bir məqsədə yüksək səviyyədə çatmağa stimul verir. Bu gün fəxarətlə deyə bilərik ki, Prezident İlham Əliyevin müdrik siyasəti, şanlı ordumuzun qətiyyəti və şücaəti sayəsində müqəddəs üçrəngli bayrağımız Qarabağda və Şərqi Zəngəzurda dalğalanır. Son hadisələr bir daha göstərir ki, Azərbaycan gəncliyi cəsurdur, mübarizdir və ölkəmizə qarşı yönələn bütün təxribatların qarşısını qətiyyətlə almağa qadirdir. Prezident İlham Əliyevin dediyi kimi: "İndi Azərbaycan xalqı görür ki, biz nəyə qadirik. Görür ki, biz müharibədə də qələbə qazanırıq, həyatda da qələbə qazanırıq və bizi güclü edən xalqın iradəsidir, xalqın birliyidir. Müharibədə də zəfərimiz xalqın birliyi nəticəsində olmuşdur. Bu gün quruculuq-abadlıq işlərini apararkən bizi gücləndirən xalqın iradəsi, dəstəyidir..."

Ümumiyyətlə, azad edilmiş tarixi torpaqlarımızda gənclərimizin də qatıldığı bərpa-quruculuq işlərini Azərbaycan Prezidenti İlham Əliyevin, Birinci vitse-prezident Mehriban xanım Əliyevanın ciddi nəzarətdə saxlaması, hər bir layihənin açılışında şəxsən iştirak etmələri ölkə ictimaiyyətində xüsusi rəğbət, yüksək məmnuniyyət, fəxr və qürur hissi doğurur. Görünən odur ki, Azərbaycan bölgədə yeni reallıqlar yaradır. Dövlət başçısının rəhbərliyi ilə Azərbaycan gəncliyi Qarabağın nəinki regionun, eyni zamanda dünyanın müasir, əsrarəngiz və təhlükəsiz bölgələrindən birinə çevrilməsində israrlıdır.

Rəhman SALMANLI,

Azərbaycan.-2024.- 20 iyul (№ 151).- S.11.