Vətənə bağlılığı ilə seçilirdi

Onun adı yaxşılıq, qüsursuzluq kimi mənalanır və həyatda cismən mövcudluğu zamanı da elə belə olub. Qismətindəki 24 illik ömür payında məhz bu cür tanındı - kamil və vətənpərvər...

Cəldliyinə, qıvraqlığına, akrobatik hərəkətlərinə görə yaxınları və hərbçi dostları arasında balaca Rembo adlandırılan bu gənc ruhən çox-çox ucalarda qərar tutmuşdu.

Şəhidlik zirvəsinə ucalan Cövdət Səmədov daim yaddaşlardan, xatirələrdən boylanır... Biz ayrı-ayrı kəndlərdə doğulub böyüsək də, həmin yaşayış məntəqələrinin qonşuluğu, Faldarla Muğanlı sərhədindəki meşə, çöl, çay səbəbindən xüsusən yaz-yay aylarında tez-tez bir araya gələrdik. Nəsil-şəcərə əlaqələrimiz də olub.

Cövdətin qəlbində, hərəkətlərində daim bir enerji duyulardı. Vətənə bağlılığı, ədalətsizliklərlə barışmazlığı, zəifə, imkansıza yardımçılığı onu bir dəqiqə rahat buraxmırdı. Xarakterinin belə müsbət cizgiləri üzündən də əlinə silah alıb Vətənin müdafiəsinə tələsdi və bu müqəddəs yolda şəhidlik məqamına yüksəldi.

Səmədov Cövdət Cavad oğlu 1970-ci il iyunun 12-də ziyalı ailəsində dünyaya göz açmışdı. 1985-ci ildə Faldar kəndində 8 illik, 1987-ci ildə qonşuluqdakı Qandax orta məktəbinin 10-cu sinfini bitirmişdi. 1988-1990-cı illərdə ovaxtkı Leninqrad (Sankt-Peterburq) şəhərində hərbi xidmət keçmişdi. Uşaqlıqdan idmana həvəsinə görə elə bu sahə üzrə də təhsil almağı qərarlaşdırmışdı. Həqiqi hərbi xidmətdən sonra Bakı Bədən Tərbiyəsi Texnikumuna qəbul olunmuşdu. Texnikumu bitirdikdən sonra Faldar və Qandax kəndlərində bədən tərbiyəsi müəllimi kimi fəaliyyət göstərmişdi. 1992-ci il dekabrın 22-də könüllü olaraq Qarabağa - cəbhəyə yollanmışdı. Vətən uğrunda gedən döyüşlərdə fəal iştirak etmişdi, çoxsaylı qəhrəmanlıq nümunələri göstərmişdi. Ağdam, Tərtər, Füzuli döyüşlərindəki şücaətləri dillər əzbərinə çevrilmişdi.

Cövdətin arzularından biri də təhsilini davam etdirərək hərbi hazırlıq müəllimi olmaq idi. Ümumiyyətlə, Səmədovlar şəcərəsinin kişi mənsublarının əksəriyyəti hərbi vətənpərvərlik ruhunda böyüyüblər. Atası rəhmətlik Cavad müəllim və əmisi Gülməmməd Böyük Vətən müharibəsi iştirakçıları olublar. Bacısı Səlminaz xanımın oğlu Hüseyn Allahyarov Birinci Qarabağ müharibəsi şəhididir. Qardaşı nəvəsi İlkin Səmədov da Vətən müharibəsində döyüşüb. Bacısı oğlu Fərid Məmmədov Vətən müharibəsi qazisidir, Şuşanın alınmasında böyük xidmətləri var, orden-medallarla təltiflənib. Fəridin atası Fərhad hazırda Dövlət Sərhəd Xidmətində işləyir. Şəhid Cövdətin anası rəhmətlik Gülzar xanım qəhrəman ana olub, ailədə 11 övlad - 6 qardaş 5 bacı böyüyüb boya-başa çatıb.

İxtiyar yaşlı jurnalist Zenfira Nəsibova danışır ki, cəbhə bölgəsində - Füzulidə ezamiyyətdə olarkən döyüşçülərlə görüşüb müsahibə almaq istəyib. Lakin aralarında Cövdət də olmaqla bir qrup gənc böyük hörmət və ehtiramla onunla vidalaşaraq qaçıb artıq ön xəttə köməyə tələsən yük maşınına miniblər və gedə-gedə qışqırıblar ki, müəllimə, müsahibəni inşallah qələbə günü verərik... Və artıq həmin Zəfərdən 4 il keçir. Deməli, Cövdətin və döyüş yoldaşlarının arzusu da çoxdan çin olub, ruhları şaddır.

Cövdət Cavad oğlu Səmədov 1994-cü il yanvarın 26-da Şişqaya uğrundakı savaşda qəhrəmancasına şəhidlik məqamına yüksəldi. Subay idi. Vaxtilə təhsil aldığı və müəllim kimi çalışdığı Faldar kənd tam orta məktəbi onun adını daşıyır. Doğrudur, o, hərbi hazırlıq üzrə ali təhsil alıb şagirdlərə hərbin sirlərini öyrədə bilmədi, amma gənclərin peşəkar hazırlıqlı vətənpərvərlik müəllimi oldu.

Qurban MƏMMƏDOV,

Azərbaycan.-2024.- 20 iyul (№ 151).- S.11.