Azərbaycanın dünyadakı mövqeyi qürur doğurur

Ölkəmiz beynəlxalq münasibətlər sistemində mühüm rolunu təsdiqləyib

Azərbaycan beynəlxalq münasibətlər və əməkdaşlıq sistemində özünün olduqca mühüm rolunu və yerini müəyyənləşdirə bilib. Prezident İlham Əliyevin dəqiq hesabla planlaşdırdığı balanslaşdırılmış praqmatik siyasət bütün beynəlxalq istiqamətlər üzrə fəal tərəfdaşlıq fəaliyyəti ilə müstəqillik prioritetlərini tamamilə təmin edib.

Azərbaycan Avropa Birliyi ilə enerji resurslarının nəqli sahəsində genişmiqyaslı əməkdaşlıq edən, hətta hazırda Qərbin enerji resursları təchizatçıları sırasında yer alan əsas ölkələrdən biridir. Bu proses Azərbaycanı Avropa Birliyinin enerji təhlükəsizliyi üzrə əsas tərəfdaşına çevirib. Bunu Prezident

İlham Əliyevin London səfəri fonunda da görmək mümkündür. Dövlətimizin başçısının Böyük Britaniya və Şimali İrlandiya Birləşmiş Krallığının Baş naziri Kir Starmerin dəvəti ilə "Avropa Siyasi Birliyi" 4-cü Zirvə toplantısında iştirak etmək üçün İngiltərədə işgüzar səfəri zamanı tərəflərin müraciətinə əsasən Lüksemburq Böyük Hersoqluğunun baş naziri Lyuk Friden, Litva Respublikasının Prezidenti Gitanas Nauseda, Finlandiya Respublikasının Prezidenti Aleksandr Stubb, Çex Respublikasının Baş naziri Petr Fiala və Almaniya Federativ Respublikasının Kansleri Olaf Şolts ilə görüşləri, dövlətimizin başçısına olan xüsusi diqqət Azərbaycanın yalnız bölgədə deyil, həmçinin dünyada söz sahiblərindən biri olduğunu deməyə əsas verir.

Prezidentin Londona səfəri və orada bu platformada Azərbaycanın iştirakı Prezident İlham Əliyevin uğurlu və çoxşaxəli xarici siyasətinin göstəricisidir. Azərbaycan üzv olmadığı təşkilatlarda hətta üzv olan bəzi ölkələrdən daha üstün mövqeyə sahib olduğunu dəfələrlə sübuta yetirib. Bundan əvvəl dövlətimizin başçısı Astanada Şanxay Əməkdaşlıq Təşkilatının Zirvə toplantısında iştirak etmişdi. Ölkəmizin həm Avropanın, həm də Asiyanın müxtəlif regionlarında yerləşən dövlətlər ilə ikitərəfli əlaqələri onu qitələrarası qovşağa çevirir. Bu fonda Azərbaycanın beynəlxalq aləmdə nüfuzunun artması ölkəmizin müxtəlif dövlətlərlə münasibətlərinə də müsbət təsir göstərir, əlaqələri strateji tərəfdaşlıq səviyyəsinə yüksəldir. Rəsmi Bakı kəskin qarşıdurma vəziyyətində olan qütbləri nəzərə alaraq bütün beynəlxalq istiqamətlər üzrə fəal tərəfdaşlıq fəaliyyəti ilə müstəqillik prioritetlərini tamamilə təmin etməyi bacarır. Məhz belə bir geopolitik və geoiqtisadi taktika Azərbaycanın bütün dünyaya açılmasını təmin etməklə yanaşı, ölkəmizin qarşısında geniş inkişaf perspektivləri açır.

Dövlətimizin başçısının Şanxay Əməkdaşlıq Təşkilatı çərçivəsində keçirdiyi görüşlər, Çinlə imzalanan strateji tərəfdaşlıq sazişi, Astanada dövlət başçıları ilə görüşü, Azərbaycan-Türkiyə-Pakistan formatında əməkdaşlıq, BRICS-lə münasibətlərin güclənməsi, bunun ardınca isə Londona səfəri, bu platformada Azərbaycanın iştirakı mühüm uğur göstəricisidir.

Oksfordda keçirilən "Avropa Siyasi Birliyi" 4-cü Zirvə toplantısı çox önəmli tədbirdir. 2022-ci ilin mayından fəaliyyət göstərən Avropa Siyasi Birliyi ildə iki dəfə sammit keçirir. Bu tədbirə 44 ölkənin liderləri dəvət olunur. Onların arasında Azərbaycan, Ermənistan, Britaniya, Gürcüstan, Moldova, Türkiyə, Ukrayna da var. Dövlətimizin başçısı bu tədbirdə iştirak etməklə ölkəmizin və şəxsinin beynəlxalq aləmdə inkarolunmaz mövqeyini nümayiş etdirdi.

Hadisələrin gedişi bir daha təsdiq etdi ki, Azərbaycanın haqlı mövqeyini artıq dost da, düşmən də qəbul edir. Dünənədək ölkəmizə qarşı qərəzli qətnamələr qəbul edən, absurd bəyanatları ilə Fransadan heç də geri qalmayan, Ermənistanın işğalçılıq siyasətini müxtəlif formada himayə etməyə çalışan lüksemburqlu baş nazir Lyuk Friden İlham Əliyevlə görüşdü və COP29-da iştirak edəcəyini bildirdi. Həmçinin Azərbaycanla Lüksemburq arasında yüksək texnologiyalar, səhiyyə, investisiyalar, nəqliyyat daşımaları və digər sahələrdə əməkdaşlıq məsələləri ilə bağlı fikir mübadiləsi aparıldı.

"Avropa Siyasi Birliyi" 4-cü Zirvə toplantısında Prezident İlham Əliyevə olan yüksək diqqət, səmimiyyət, liderlərin görüş üçün müraciətləri Azərbaycanın qitə üçün önəmini bir daha təsdiq etdi. Bu, inkarolunmaz faktdır ki, birliyə daxil olan ölkələr Prezident İlham Əliyevi özlərinin enerji təhlükəsizliyi məsələsində xilaskar kimi görür və qiymətləndirirlər. Birliyin Zirvə toplantısı çərçivəsində keçirilən "Enerji və bağlantı" mövzusunda dövlətimizin başçısının çıxışı olduqca rəğbətlə və maraqla qarşılandı. Prezident İlham Əliyevin "dəyirmi masa"da söylədiyi "enerji sahəsində Bakıda müəyyənləşdirdiyimiz strateji tərəfdaşlıq bizim Avropaya qaz təchizatımızın 2027-ci ilin sonuna qədər ikiqat artırılmasını nəzərdə tutur. Biz bu hədəfə doğru irəliləyirik. 2021-ci ildə Avropa qitəsinə bizim qaz təchizatımız ildə

8 milyard kubmetr təşkil edirdisə, bu il bu göstərici 13 milyard kubmetrə yaxın olacaq. 2021-ci ildə ümumi ixrac 18 milyard kubmetr təşkil edirdisə, bu il bu göstərici 25 milyard kubmetr olacaq. İxracın yarıdan çoxu Avropaya gedir. Avropa Komissiyası Azərbaycanı enerji üzrə etibarlı tərəfdaş və ümum-Avropa qaz təchizatçısı adlandırmışdır. Bu, çox böyük məsuliyyətdir və əlbəttə ki, biz yalnız Avropaya 2027-ci ilə qədər ildə 20 milyard kubmetr qazla təchiz etmək üzrə öz öhdəliyimizi yerinə yetirmək üçün əlimizdən gələni etməyə çalışırıq. Bu, bizim hədəfimizdir. Bizim resurslarımız və infrastrukturumuz var. Yeni tərəfdaşlarla, əsasən Sloveniya və Slovakiya ilə danışıqlar prosesini sürətləndirməliyik, həmçinin mövcud bazarlara qaz təchizatımızın artırılması üzərində çalışmalıyıq" fikirləri Avropa ölkələri üçün böyük dəstəkdir.

Nəzərə alsaq ki, Azərbaycan enerji sahəsi ilə yanaşı, nəqliyyat, kommunikasiya sahəsində də böyük imkanlara malikdir, bu istiqamətdə böyük işlər görür. Bu gün dünyada gedən müharibələr, siyasi və hərbi münaqişələr səbəbindən Şərq-Qərb ticarət yolları bağlanmaq üzrədir. Belə bir zamanda Azərbaycan dünyaya iki qitəni birləşdirəcək təhlükəsiz, qısa, şaxələnmiş Orta dəhliz marşrutunu təklif edir. Prezident İlham Əliyevin siyasəti beynəlxalq enerji və ticarət yollarının keçdiyi ərazilərdə sabitliyin qorunmasına, regionun başqa qüvvələrin münaqişə mərkəzinə çevrilməməsinə yönəlib. Bunun nəticəsində ölkəmiz təkcə özünün deyil, Cənubi Qafqazın, Mərkəzi Asiyanın siyasi və hərbi, Avropanın enerji təhlükəsizliyinin təminatçısı kimi çıxış edir. Bu da Azərbaycana beynəlxalq münasibətlərin, sadəcə, iştirakçısı deyil, qurucusu, istiqamətverici qüvvəsi olmaq imkanı verir. Əlbəttə ki, bütün bunlar vətənini sevən, dövlətinə bağlı olan hər bir vicdanlı Azərbaycan vətəndaşını haqlı olaraq qürurlandırır.

Elşən QƏNİYEV,

Azərbaycan.-2024.- 21 iyul (№ 152).- S.4.