Azərbaycanda mətbuat dövrün tələbinə uyğun inkişaf edir

Azərbaycan milli mətbuatı - 149

"Əsası Həsən bəy Zərdabi tərəfindən qoyulmuş ilk mətbu orqanın - "Əkinçi" qəzetinin nəşrə başladığı tarixdən 149 il ötür. "Əkinçi"nin Azərbaycan milli mətbuatının təşəkkül tapmasında, inkişafında əvəzsiz rolu olub. O vaxtdan müxtəlif tənəzzül və intibah dövrləri keçən mətbuat daim cəmiyyətin proseslərə baxışını əks etdirən güzgü rolunu oynayıb".

Bu fikirləri "Azərbaycan" qəzetinə Milli Məclisin deputatı Kamran Bayramov deyib. Deputat bildirib ki, Azərbaycan öz müstəqilliyini bərpa etdikdən sonra milli-mənəvi dəyərlərə qayıdış mətbuat sahəsində də özünü göstərib. Bu gün ölkəmizdə yüzlərlə mətbu orqan - qəzet, jurnal və dövrün tələbinə uyğun vebsaytlar, bir sözlə, milli media platformaları uğurla fəaliyyət göstərir.

Milli mətbuatımızın inkişafı Ulu Öndər Heydər Əliyevin adı ilə bağlıdır. Ümummilli Liderin 1993-cü ildə xalqın təkidli tələbi ilə hakimiyyətə qayıdışı mətbuatımızın inkişaf tarixində də yeni mərhələ açıb. 1998-ci ilin avqustunda senzuranın ləğvi isə Azərbaycanda mətbuatın inkişafına ciddi təkan verib. Azərbaycan dövləti bu sahənin inkişafına hər zaman böyük diqqət ayırır.

Ulu Öndərin mətbuata və jurnalistlərə göstərdiyi diqqət və qayğı onun layiqli varisi Prezident İlham Əliyev tərəfindən də davam etdirilir. Ölkəmizdə söz və mətbuat azadlığı tam təmin olunub. Təsadüfi deyil ki, hazırda respublikada çoxlu sayda müxtəlif qəzet və jurnallar nəşr olunur, internet qəzetçilik inkişaf edir.

"Prezident İlham Əliyevin bilavasitə rəhbərliyi ilə "Azərbaycan Respublikasında kütləvi informasiya vasitələrinin inkişafına dövlət dəstəyi Konsepsiyası" hazırlanıb və qəbul olunub", - deyə o bildirib.

K.Bayramov qeyd edib ki, müasir dövrdə informasiya texnologiyalarının inkişafı Azərbaycan mətbuatını qlobal informasiya şəbəkəsinin bir hissəsinə çevirib. Azərbaycan Konstitusiyasında söz və mətbuat azadlığının təməl prinsipləri olaraq öz əksini tapması ölkədə medianın azad və güclü bir cəmiyyət institutu kimi formalaşmasına təkan verib. Hazırda media məkanında sürətli qloballaşma prosesi gedir, mətbuatın bütün sahələrdə funksionallığı sürətlə artır. Bu gün jurnalistlərin, medianın qarşısında cəmiyyəti daha obyektiv, peşəkar şəkildə məlumatlandırmaq missiyası durur. Bu baxımdan, mövcud qanunvericiliyin təkmilləşdirilməsi də zamanın qarşısıalınmaz tələbidir.

O xatırladıb ki, Prezident İlham Əliyevin 2021-ci il 12 yanvar tarixli "Azərbaycan Respublikasında media sahəsində islahatların dərinləşdirilməsi haqqında" fərmanı ilə Kütləvi İnformasiya Vasitələrinin İnkişafına Dövlət Dəstəyi Fondunun əsasında "Azərbaycan Respublikasının Medianın İnkişafı Agentliyi" publik hüquqi şəxs yaradılıb: "MEDİA ölkəmizdə çap və onlayn medianın inkişafı, media orqanlarının maliyyə müstəqilliyinin gücləndirilməsi, fəaliyyətinin təkmilləşdirilməsi, mütərəqqi layihələrin davamlı olaraq dəstəklənməsi məqsədilə müxtəlif tədbirlər həyata keçirir. 2021-ci ildə qəbul olunmuş "Media haqqında" qanun bu sahədə fəaliyyətin təşkilini, hüquqi və iqtisadi əsaslarını, həmçinin informasiyanın əldə edilməsi, hazırlanması, ötürülməsi, istehsalı və yayımının ümumi qaydalarını müəyyən edir. Qanunun məqsədi ölkəmizin informasiya məkanının təhlükəsizliyinin təmin edilməsi, yerli medianın inkişafına təkan verilməsi, informasiya mühitinin sağlamlaşdırılması və rəqabət qabiliyyətinin artırılması, habelə jurnalistika peşəsinin nüfuzunun yüksəldilməsinə şərait yaradılmasıdır".

K.Bayramov əlavə edib ki, bu günə qədər fasiləsiz davam edən informasiya müharibəsində mətbuat işçiləri öz peşəkarlığı və vətənpərvərliyi ilə daim fərqləniblər. Azərbaycan mediası həm Birinci, həm də İkinci Qarabağ müharibələrində üzərinə düşən vəzifəni layiqincə yerinə yetirib, Azərbaycanın böyük zəfərinin müjdəçisi olub. Qarabağ uğrunda döyüşlərdə fərqlənən və müxtəlif medallarla təltif edilənlər arasında döyüşçü jurnalistlərin də olması ölkəmizdə bu sahədə çalışanlara göstərilən böyük etimadın və diqqətin təzahürüdür. "Əlamətdar peşə bayramı ərəfəsində bütün ölkə mediasını, bütün jurnalistlərimizi 22 İyul Milli Mətbuat Günü münasibətilə ürəkdən təbrik edir, onlara yeni-yeni yaradıcılıq uğurları arzulayıram", - deyə deputat qeyd edib.

Əsmər QARDAŞXANOV

Azərbaycan.-2024.- 21 iyul (№ 152).- S.6.