Paşinyan Böyük Britaniyada da özünü ifşa etdi

Azərbaycanın davam etdirdiyi uğurlu diplomatik fəaliyyət, çevik siyasəti nəticəsində vaxtilə Hayastanda hakimiyyətdə olmuş Koçaryan-Sarkisyan hərbi xuntası, hazırda isə Nikol Paşinyan daim çıxılmaz vəziyyətə düşüblər.

Onların da iştirakı ilə keçirilən bütün beynəlxalq tədbirlər, sammitlər Azərbaycanın maraqlarına uyğun nəticə ilə yekunlaşıb: İlham Əliyev yüksək siyasi-diplomatik peşəkarlıqla Hayastan rəhbərliyini daim ifşa edib, onu rəzil hala salıb və dünya erməniliyinin əsl məkrli mahiyyətini danılmaz faktlarla dünya ictimaiyyətinə çatdırıb.

İndi anlamağa başlayıblar ki, Hayastanın acınacaqlı vəziyyətə düşməsinin əsas səbəbi 30 ilə yaxın davam edən işğalçılıq siyasəti və buna görə Azərbaycanın həyata keçirdiyi tədbirlər idi. Ümumilikdə son dönəmlər Hayastan ictimaiyyətinin mövqelərindən aydın olur ki, onlar ölkələrinin qurtuluşunu Azərbaycanla münasibətləri normallaşdırmaqda, sülh müqaviləsinin imzalanmasında görürlər.

Prezident İlham Əliyev rəsmi, qeyri-rəsmi şəkildə görüşlərə razılıq verərək Hayastana sülh üçün şans verir. Təəssüf ki, İrəvan ona verilən şansı dəyərləndirə bilmir. Bunun növbəti dəfə Avropa Siyasi İcmasının İngiltərədə keçirilən görüşü çərçivəsində şahidi olduq. Hayastanla Azərbaycan arasında görüşün keçirilməsi nəzərdə tutulsa da, Paşinyan bundan imtina etməklə İrəvanın hər zamankı kimi sülhpozucu fəaliyyətlə məşğul olduğunu göstərdi.

Hayastanın "Demokratik Alternativ" Partiyasının sədri Suren Surenyants deyib ki, Paşinyanın İlham Əliyevlə görüşdən imtina etməsini baş nazirin qaçışı hesab edirəm, çünki Ermənistan təmsilçisi rəhbərlik etdiyi ölkənin çətin vəziyyətini çox yaxşı bilir. Onun sözlərinə görə, Paşinyan ölkənin hansı mərhələdə olduğunu anlayaraq baş verə biləcək fəlakətlə üz-üzə olduğunun fərqindədir: "Ona görə də mən Paşinyanın qaçmasını bununla əlaqələndirirəm. Bu adam tələyə düşüb. Onun yeganə xilası vaxt qazanmaq üçün danışıqlardan imtina etməkdir. Bu vəziyyət Paşinyanın vasitəçisiz danışıqlara sürüklənməsinin nəticəsidir, bundan sonra bunun axırının necə olacağı artıq proqnozlaşdırılan idi. Paşinyanın İlham Əliyevin tələblərini yerinə yetirəcəyi göz qabağındadır".

Postmüharibə dönəmi Azərbaycanla normal münasibətlər yaratmadan Hayastanın bir dövlət kimi mövcudluğunu davam etdirməsi sual altındadır. Bu gün müasir Azərbaycandan bəhs edərkən onu xarakterizə edən əsas cəhətlər sırasında ilk olaraq dünyanın ən sürətlə inkişaf edən, davamlı nailiyyətlərə imza atan ölkəsi olmasına xüsusi diqqət yetirilir. Azərbaycan Prezidenti İlham Əliyevin rəhbərliyi ilə qazanılan bu uğurlar ölkəmizin beynəlxalq miqyasda da mövqeyini əhəmiyyətli dərəcədə gücləndirən faktorlardan biri kimi çıxış edir.

Bütün bunlara paralel olaraq uğurlu xarici siyasət Azərbaycanı beynəlxalq ictimaiyyətə daha yaxşı tanıtdırmaqla bərabər, dünyanın diqqətini ölkəmizə yönəldib. Azərbaycanın beynəlxalq aləmdə nüfuzlu və etibarlı dövlətə çevrilməsinin nəticəsidir ki, indi ölkəmizlə qarşılıqlı əməkdaşlığa can atanların sayı durmadan artır.

Ölkəmizdə əldə edilən bu uğurlar fonunda Hayastana nəzər saldıqda tamam əks mənzərənin şahidi oluruq. Bunun ümdə səbəblərindən biri Ermənistanın 30 il davam edən işğal siyasəti, bu gün isə sülh müqaviləsinin uzadılmasıdır.

Sülh müqaviləsini imzalamayacağı təqdirdə qarşıdakı dövr ərzində Hayastanı daha böyük problemlər gözləyir. Azərbaycan həm iqtisadi, həm hərbi, həm də demoqrafik cəhətdən Hayastanı üstələməkdə davam edir. Ölkəni tərk edənlərin sayı sürətlə artır. İndi görülən bütün tədbirlərə baxmayaraq, ölkədə əhalinin sayı sürətlə azalmaqda davam edir, xaricə köçənlər durmadan artır. Əhalinin artım səviyyəsinin get-gedə aşağı düşməsi isə erməni sosioloqlarının hakimiyyətə ünvanlanmış xəbərdarlıqlarının çoxalmasına səbəb olub. Ancaq real vəziyyət Hayastanın faktiki olaraq demoqrafik böhran yaşadığını, bu problemin həlli perspektivinin olmadığını göstərir.

Hayastanda bu sahədə araşdırma aparan yerli və beynəlxalq təşkilatlar da hesab edirlər ki, proseslərin real gedişi sözügedən ölkədə insan resursunun sürətlə tükəndiyini meydana çıxarır. Bununla yanaşı, Hayastan iqtisadiyyatında miqyası hər gün genişlənməkdə olan tənəzzül ölkənin xaricdən asılılığını daha da artırır. Eyni zamanda Hayastanın xaricdən götürdüyü borcların miqdarı sürətlə artır. Bunun nəticəsində məğlub ölkənin xaricdən maliyyə, iqtisadi, siyasi asılılığı getdikcə daha da güclənir. Belə şəraitdə Hayastanın formal müstəqilliyini davam etdirə biləcəyi böyük sual altındadır.

Elçin CƏFƏROV,

Azərbaycan.-2024.- 21 iyul (№ 152).- S.11.