"Yeni Kaledoniyada baş verənlər hələ də kolonializmin hökm sürdüyünü göstərir"

"Müasir dünyada kolonializmi qəbulolunmaz bir amil kimi nəzərə alırıq. Yeni Kaledoniyada baş verənləri görürsünüz. Bu hələ də kolonializmin hökm sürdüyünü göstərir. Mən bu gün sizə Fransa kononializmi barədə məlumat təqdim edəcəm".

Bunu idarəçilik üzrə beynəlxalq məsləhətçi Karl Korbin Şuşada keçirilən II Qlobal Media Forumu çərçivəsində Bakı Təşəbbüs Qrupunun paralel tədbirində deyib.

O qeyd edib ki, bu ərazilər müstəmləkə formatından çıxıb öz müqəddəratını təyin etməlidir.

"Fransa Afrikada böyük ərazilərə insanları köçürərək yerli əhalinin tərkibini dəyişməyə çalışıb. BMT-nin nizamnaməsi açıq şəkildə bu parametrləri özündə əks etdirir. Burada xalqların öz müqəddəratı hüququ əks olunub", - deyə qeyd edib.

O bildirib ki, Fransanın müstəmləkəçilik tarixi 1534-cü ildən başlayır və 1690-cı ilədək Dominikanın müstəmləkə halına salınması ilə davam edir: "Fransa Şimali Amerikadan Karib adaları istiqamətinə qoşun göndərməklə orada da möhkələnmişdi. 1795-ci ilədək Fransa konstitusiyasında koloniyalarla bağlı müddəa yox idi, amma həmin ildən əsas qanuna dəyişikliklə bu məsələ ana sənəddə təsbit olundu".

Qeyd edək ki, Şuşa Qlobal Media Forumuna 49 ölkədən 150 xarici qonaq, o cümlədən dünyanın 34 ölkəsinin dövlət informasiya agentliyi, 12 beynəlxalq təşkilat və media qurumu qatılıb. Həmçinin forumda 60 yerli media rəhbəri və nümayəndəsi iştirak edib.

Azərbaycan.-2024.- 24 iyul (№ 154).- S.6.