Qərb Ermənistanı revanşa hazırlayır

Regionda yeni münaqişənin alovlanması bəzi dairələrin maraqlarına cavab verir

"Avropa Sülh Fondunun Ermənistana 10 milyon avro həcmində hərbi təyinatlı yardım ayırması Hayastanın baş naziri, Avropa Komissiyasının prezidenti və ABŞ dövlət katibinin aprelin 5-də Brüsseldə keçirdikləri görüşün nəticələrinə uyğun həyata keçirilir. Bu, bir daha sübut edir ki, Qərb Ermənistana təhlükəsizlik təminatları verir".

Milli Məclisin deputatı Elşad Mirbəşiroğlu "Azərbaycan" qəzetinə açıqlamasında deyib ki, bu il aprelin 5-də keçirilmiş görüşün əsas mahiyyəti də Ermənistana əlavə təhlükəsizlik təminatı verilməsi idi. Azərbaycan tərəfinin sərt reaksiyasından sonra görüşün məqsədi fərqli izah olunmağa başlanıldı. Guya Ermənistana sosial-iqtisadi inkişaf üçün dəstək veriləcək. Görüşün əsas məqsədi isə Ermənistan və Avropa arasında hərbi sahədə əməkdaşlığın daha da genişləndirilməsi, nəticədə Qərbin Cənubi Qafqazda siyasi, hərbi mövcudluğunu təmin etməsi üçün Ermənistandan istifadə etmək idi. "Qarabağ münaqişəsinin mövcudluğu dövründə Qərbin regiona müdaxilə imkanları kifayət qədər geniş və real idi. Lakin Azərbaycan torpaqlarını işğaldan azad etdikdən sonra kənar dairələrin regionda təhlükəli planlarını həyata keçirmək məqsədlərini məhdudlaşdırdı. Məhz bu səbəbdən ölkəmizin üzərinə əsassız siyasi hücumlar təşkil olunmağa, qərəzli müzakirələr həyata keçirilməyə, qətnamələr qəbul edilməyə və ya buna cəhdlər göstərilməyə başlanıldı. Aydın görünür ki, regionda münaqişənin qalması Qərbin bəlli dairələrinin maraqlarına cavab verir. Münaqişə amili onlara imkan verirdi ki, Cənubi Qafqazda geosiyasi ambisiyalarını həyata keçirsinlər, mövcudluqlarını saxlasınlar", - deyə deputat əlavə edib.

E.Mirbəşiroğlu qeyd edib ki, regionda tam başqa geosiyasi vəziyyət yarandıqdan sonra Qərb bununla barışmaq istəmir, mövcud durumu dəyişməyə çalışır və bunu da Ermənistan vasitəsilə etmək niyyətindədir. Məsələn, ABŞ-nin Ermənistan ərazisində birgə keçirdiyi hərbi təlimlər zamanı Kəlbəcər istiqamətində Azərbaycan mövqelərinin atəşə tutulması Qərbin regionda yenidən münaqişə ocağı yaratmağa çalışdığını nümayiş etdirir.

Deputat vurğulayıb ki, medianın əldə etdiyi məlumatlara istinadən Ermənistanın mövqelərimizi atəşə tutmasında Qərb hərbi təlimatçılarının da iştirak etdiyi bildirilir: "Bu, göstərir ki, Qərbin təlimatları və nəzarəti altında Ermənistan yenidən hərbi təxribatlara əl atır. Fransanın Ermənistana hücum xarakterli silahlar verməsi o təsəvvürləri möhkəmləndirir ki, onu Azərbaycana qarşı yenidən revanşa hazırlayırlar".

Elşad Mirbəşiroğlu sonda qeyd edib ki, Ermənistan bunun müqabilində Qərbə öz ərazisini plasdarm olaraq təqdim edir. Bu da Cənubi Qafqaz regionu üçün ciddi təhdidlər yaradır.

Əsmər QARDAŞXANOVA,

Azərbaycan.-2024.- 25 iyul (№ 155).- S.10.