Qəhrəmanlıq tarixini yazan igidlərdən biri...

Müasir Azərbaycanın qəhrəmanlıq tarixini onlar yazdılar. Ömürlərinin ən gözəl çağlarında, gənc yaşlarında bütün arzularının, sevgilərinin, ümidlərinin önündə vətəni tutaraq döyüş meydanlarına atılan, Qarabağ və Şərqi Zəngəzur ərazilərimizi otuz ilə yaxın işğal altında saxlayan Ermənistan silahlı qüvvələrinə qarşı ön cəbhədə cəsarətlə, şücaətlə vuruşan oğullar... İkinci Qarabağ müharibəsində sinələrini işğalçı düşmənin atdığı güllələrə sipər etdilər ki, vətən torpaqları əsarətdə qalmasın.

Onların hərəsi bir ailənin ümidi, çırağı idi. İkinci Qarabağ müharibəsində Vətənin ümidi oldular, Qarabağ və Şərqi Zəngəzuru qəsbkarlardan xilas etdilər, azadlıq işığını yandırdılar... Xüsusi Təyinatlı Qüvvələrin əsgəri, şəhid Əhməd Qurban oğlu Laçınov da Azərbaycanın qüruru, fəxri olan həmin qəhrəmanlardan biridir.

Əhməd Laçınov 1999-cu il iyulun 28-də Zaqatala rayonunun Yuxarı Çardaxlar kəndində dünyaya gəlib. O, atası Qurbanla anası Züleyxanın dördüncü övlad sevinci olub. Əhmədin dünyaya gəlişi ailəyə elə bir fərəh gətirmişdi ki... Ondan böyük üç bacısının and yeri, valideynlərinin ən böyük ümidi, köməyi olacaqdı Əhməd...

Dil açıb danışması da, ayaq tutub yeriməsi də, orta məktəbə ilk gedişi də evdə şadlıq yaratdı. Ata-anasının, bacılarının sevinci yerə-göyə sığmadı... Əhməd Laçınov 2004-2013-cü illərdə R.Muradov adına Yuxarı Çardaxlar kənd tam orta məktəbində oxudu. Təhsilini 2015-2019-cu illərdə Zaqatala Dövlət İdarəetmə və Texnologiya Kollecində davam etdirdi.

Balacalıqda sakit təbiətli, tərbiyəli uşaq kimi tanındı. Böyüdü, xasiyyəti dəyişmədi. Onu özündən də çox sevən üç bacısı hər nazını çəkmək üçün əldən-ayaqdan gedirdi. Ata-anası da Əhmədə xüsusi qayğı ilə yanaşırdı. Ancaq ailədə bu qədər çox sevilsə də, əzizlənsə də, heç vaxt ərköyünlük etmirdi. Əhməd Zaqatala Dövlət İdarəetmə və Texnologiya Kollecinin tələbəsi olanda həm oxuyur, həm də işləyirdi ki, onları halal zəhməti ilə böyüdən atasına maddi kömək etsin. Evdə olanda da anasının, bacılarının işlərini yüngülləşdirmək üçün əlindən gələni edirdi. Səhərlər yuxudan erkən qalxır, həyət-bacada çalışırdı.

O, 2019-cu ildə müddətli həqiqi hərbi xidmətə çağırıldı. Valideynlərinə, bacılarına arxa-dayaq olan Əhməd Laçınov vətən qarşısında əsgər borcunu yerinə yetirməyə yollandı. İkinci Qarabağ müharibəsinədək o, Azərbaycan Silahlı Qüvvələrinin "N" saylı hərbi hissəsində xidmət etdi.

2020-ci il sentyabrın 27-də işğalçı Ermənistan silahlı qüvvələrinin növbəti təxribatı nəticəsində müharibə başladı. Azərbaycan Ordusu İkinci Qarabağ müharibəsinin ilk günündən düşmənin hücumlarını rəşadətlə dəf etdi, otuz ilə yaxın Ermənistanın əsarətində qalan ərazilərimizin azadlığı uğrunda misilsiz hünər göstərirdi. Xüsusi Təyinatlı Qüvvələrin əsgəri olan Əhməd Laçınov da o qəhrəman övladların sıralarında idi. O, İkinci Qarabağ müharibəsi zamanı Murovdağ, Cəbrayıl və Füzulinin azadlığı uğrunda gedən döyüşlərdə iştirak etdi, cəsarətlə, igidliklə vuruşdu.

Əhməd Laçınov oktyabrın 3-də Füzulinin azad edilməsi zamanı şəhid oldu. Qəhrəman dünyaya göz açdığı yurdda - Zaqatala rayonunun Yuxarı Çardaxlar kəndində torpağa tapşırıldı.

Azərbaycanın ərazi bütövlüyünün təmin edilməsi uğrunda döyüş əməliyyatlarına qatılan və hərbi hissə qarşısında qoyulmuş tapşırıqların icrası zamanı vəzifə borcunu şərəflə yerinə yetirən, igidlik və şücaət göstərən Əhməd Qurban oğlu Laçınov ölümündən sonra Prezident İlham Əliyevin müvafiq sərəncamları ilə "Vətən uğrunda", "Füzulinin azad olunmasına görə" medalları, "Azərbaycan Bayrağı" ordeni ilə təltif edildi.

Valideynlərinin, bacılarının fəxr etdikləri Əhməd Laçınov şəhidlik zirvəsinə yüksələrək el-obasının, bütün Azərbaycanın qüruru oldu.

Zöhrə FƏRƏCOVA,

Azərbaycan.-2024.- 25 iyul (№ 155).- S.12.