Kənd turizmi insanlar üçün çox sərfəlidir

Yayın qızmar çağıdır. Ölkəmizdə bu isti yay günlərində istirahət etmək, sərinlənmək üçün gözəl təbiəti olan çoxlu sayda bölgələr var. Onlardan biri də Göygöl rayonudur.

Göygöl rayonu Azərbaycanın qərbində dağlıq və dağətəyi zonada yerləşir. Ən yüksək nöqtəsi dəniz səviyyəsindən 3724 metr hündürlükdədir. Bənzərsiz təbiəti, zəngin flora və faunası olan rayonda kənd turizmi üçün geniş imkanlar var. Bu baxımdan, son illər burada kənd turizminin inkişaf etdirilməsi məqsədilə geniş infrastruktur layihələri həyata keçirilmişdir.

Rayonun əlverişli coğrafi mövqeyi, gözəl təbiəti, mədəni-tarixi irsi, özünəməxsus mətbəxi, eləcə də sakinlərin yüksək qonaqpərvərliyi bu ərazilərə yolu düşənləri məmnun edir. Son illərdə aparılan genişmiqyaslı abadlıq və yenidənqurma işləri, xüsusilə dövlət başçısının diqqət və qayğısı ilə Göygölün ucqar kəndlərində də yenilənən infrastruktur kənd turizmi üçün geniş imkanlar yaratmışdır.

Kənd turizmi ucuz başa gəldiyindən insanlar bu sahəyə daha çox maraq göstərirlər. Odur ki, yay mövsümü yaxınlaşanda rayonun kəndlərində bir boş ev belə tapmaq olmur. Əsasən də Göygöl Milli Parkına yaxın ərazilərdə yerləşən Çaykənd, Şəhriyar, Yeni Zod, Aşıqlı, Toğanalı, Mixaylovka və digər kəndlərdə istirahət edənlərin sayı daha çox olur. Çünki bu kəndlərdə dincələnlər çox asanlıqla milli parkın ərazisində yerləşən Göygölə səyahət edə bilirlər. Onu da bildirək ki, bu kəndlərə gələn 100 minə yaxın turistin 5 minə qədəri əcnəbi olur.

Ən çox turist qəbul edən kəndlərdən biri də Aşıqlıdır. Kəndin 2500 nəfərdən çox əhalisi var. Rayon mərkəzindən cəmi 5 kilometr məsafədə yerləşir və hər cür infrastrukturla təmin edilib. Asfalt yol, su, qaz, elektrik təminatı yüksək səviyyədədir. Kəndin ərazisində çoxlu sayda istirahət mərkəzləri fəaliyyət göstərir. Rayon mərkəzindən Hacıkəndə gedən yolun kənarlarında sakinlərin turistlərə təklif etdikləri şəfaverici bitkiləri, təndir çörəklərini, süd məhsullarını, eləcə də isti kətələri və digər milli yeməkləri turistlər məmnunluqla alırlar.

Xatırladaq ki, kənddə 400-dən çox ev var. Hacıkənd və Göygölə gedən yolun üstündə yerləşdiyindən turistlər burada qalmağa daha çox ustünlük verirlər. Evlərin bir günü 20-30 manat civarında dəyişir. Öyrəndik ki, keçən il kənddə 2 mindən atıq turist istirahət edib. Bu il havaların kəskin şəkildə isti keçməsi turistlərin sayını xeyli artırıb.

Kənd sakini Lamiyyə Əliyevanın evində hər il çoxlu sayda turist qalır. O, həyətində 10 nəfərin qalması üçün lazımi şərait yaradıb. Burada yaradılan səliqə-sahman turistləri razı salır.

İkram Məmmədov da yay mövsümündə çoxlu turist qəbul edir. Həyətində bu məqsədlə əlavə 4 otaq tikib. Mövsüm ərzində 67-70 nəfər ailəvi turist qəbul edir. Göygölə yaxın kəndlərdən biri də Çaykənddir. Hər il yüzlərlə turist bu kənddə istirahət edir. Kənd sakini Elmir Rəcəbov deyir ki, onun ailə üzvləri bu qonaqlara xüsusi qayğı ilə yanaşırlar. Yeməklərinə, içməklərinə, eləcə də gəzməklərinə böyük diqqət göstərirlər.

Aşıqlı kənd nümayəndəliyinə daxil olan Köşkü və Üçbulaq kəndlərinə də hər yay çoxlu turist gəlir. Üçbulaq kəndində müalicəvi əhəmiyyəti olan "Nurud" suyu çıxır. Bundan başqa, kənddə turistlərin istəyinə uyğun olaraq onlara təbii ərzaq məhsulları təklif olunur.

Rayonun Toğanalı kəndi isə gölə lap yaxın ərazidə yerləşir. Kənddən cəmi 5 dəqiqəyə Göygölə çatmaq olar. Burada dincələn turistlər "Cənnət məkan", "Ağrı dağı", "Gəncəbasar" və sair yeməkxanaların xidmətindən istifadə edirlər. Bu ərazilərdə əsasən Türkiyə, Almaniya, Rusiya, Gürcüstan və digər xarici ölkələrdən gələn turistlər dincəlirlər.

Onu da qeyd edək ki, rayon ərazisində çoxlu sayda turistlər üçün maraqlı olan tarixi abidələr var. Rayonda 31 yerli əhəmiyyətli tarixi və memarlıq abidəsi mövcuddur ki, bunlardan da 8-i kurqan, nekropol, digərləri isə qədim tikililər və körpülərdir. Rayon mərkəzində 1854-cü ildə alman kolonistləri tərəfindən tikilmiş "Lüteran" kilsəsi, XVI əsrə aid iki tağlı körpü, XII əsrə aid Ağ körpü, Qabriel kilsəsi, Anahid Məbədi və Müqəddəs Məryəm kilsəsi, bundan başqa, Dəmir dövrünə aid kurqanlar və Tunc dövrünə aid qəbirlər də vardır ki, bütün bunlar turistlərə rayon ərazisindəki kəndlərdə istirahət etməklə yanaşı, buradakı tarixi abidələrlə yaxından tanış olmaq imkanı verir.

Hazırda turizm mövsümü davam edir. Respublikamızın digər bölgələri kimi, Göygöl rayonunun kəndlərinə də dincəlməyə gələnlərin sayı durmadan artır. Onları cəlb edən təmiz hava, təbii su ehtiyatı, yaşıllıq, abadlaşdırılmış kənd şəraiti və təbiət mənzərələridir.

Sabir ƏLİYEV,

Azərbaycan.-2024.- 27 iyul (№ 157).- S.10.