Seçkilərdə fəallığın daha da yüksəldilməsi üçün tədbirlər görülür

Ölkəmiz müstəqillik tarixində ilk dəfə olaraq ərazi bütövlüyü və suverenliyi tam bərpa edildiyi şəraitdə Milli Məclisə seçkilər keçirəcək. 2024-cü il sentyabrın 1-nə təyin edilmiş Azərbaycan Respublikasının Milli Məclisinə növbədənkənar seçkilərin yüksək səviyyədə təşkili, azad, ədalətli və şəffaf keçirilməsi, eləcə də müxtəlif statuslu seçki subyektlərinin maarifləndirilməsi və məlumatlandırılması məqsədilə genişmiqyaslı tədbirlər reallaşdırılır.

Milli Məclisə növbədənkənar seçkilərlə əlaqədar Mərkəzi Seçki Komissiyasının Ailə, Qadın və Uşaq Problemləri üzrə Dövlət Komitəsi ilə birgə layihəsi çərçivəsində iyulun 24-də "dəyirmi masa" təşkil olundu. Mərkəzi Seçki Komissiyasının müxtəlif statuslu seçki iştirakçılarını əhatə edən genişmiqyaslı maarifləndirmə proqramı əsasında reallaşdırılan layihə cəmiyyətdəki aktiv mövqeyi, məqsədyönlü fəaliyyətləri günbəgün güclənən Azərbaycan qadınlarının qarşıdan gələn seçkilərdə fəallıqlarının daha da yüksəldilməsi üçün yaradılan geniş və hərtərəfli imkanları müzakirə edildi. Tədbirdə çıxış edən Mərkəzi Seçki Komissiyasının sədri Məzahir Pənahov qurumlararası sıx əməkdaşlıq sayəsində ərsəyə gələn müxtəlif layihələrin qadınların seçkilərdə azad və sərbəst fəaliyyətinin təkmilləşdirilməsi, məlumatlılığının artırılması, həmçinin fəallığı baxımından mühüm əhəmiyyət kəsb etdiyini diqqətə çatdırdı. O, ölkəmizdə keçirilən seçkilərdə qadınların rolunun çox böyük olduğunu bildirdi. Qeyd etdi ki, seçicilərimizin çoxu qadınlardır: "Seçkilərdə fəallığı baxımından ən gözə görünməyən, amma effektli olanlar da qadınlardır".

Mərkəzi Seçki Komissiyasının sədri qeyd etdi ki, Azərbaycan 2020-ci ildə Ali Baş Komandanın rəhbərliyi ilə bu xalqın, ordunun nəyə qadir olduğunu bütün dünyaya nümayiş etdirdi: "Azərbaycan yüz illərdir arzu etdiyi, həsrətində olduğu halların reallaşdığını görür. Ona görə çalışmalıyıq ki, bizə aid olan sahələrdə öz fəaliyyətimizi həmin standartlar üzərində quraq. Azərbaycan ərazi bütövlüyünün və suverenliyinin tam bərpasından sonra artıq ikinci dəfə seçki keçirəcək. Birincisi fevral ayında keçirilən prezident seçkiləri idi. Biz onu "Zəfər seçkisi" adlandırırdıq. Mən hesab edirəm ki, o, prezident seçkiləri ilə bağlı Zəfər seçkiləri idi, bu isə Milli Məclisə seçkilər baxımından Zəfər seçkisi olmalıdır".

"Dəyirmi masa"da qadın məsələlərinə dair təşkilatlar, vətəndaş cəmiyyəti institutları və ictimai birliklərin nümayəndələri iştirak edirdilər. Tədbirdə qadınların seçkilərdə iştirakı ilə bağlı müxtəlif mövzular ətrafında geniş müzakirələr aparıldı, meydana çıxan suallar cavablandırıldı.

İyulun 24-də Milli Məclisə növbədənkənar seçkilərlə əlaqədar Mərkəzi Seçki Komissiyasının Daxili İşlər Nazirliyi ilə birgə layihəsinə də start verildi. Birgə layihə çərçivəsində regional seminar-müşavirələrə başlanıldı. İlk tədbir həmin gün Mərkəzi Seçki Komissiyası və Daxili İşlər Nazirliyi təmsilçilərinin də iştirakı ilə Bakı Şəhər Baş Polis İdarəsində keçirildi.

Qeyd edək ki, Milli Məclisə seçkilərdə polis əməkdaşlarının xidməti fəaliyyətinə həsr olunan seminar-müşavirələrdə ölkə üzrə bütün dairə seçki komissiyalarının sədrləri və polis orqanları nümayəndələrinin iştirakı nəzərdə tutulur.

Tədbirlərdə Mərkəzi Seçki Komissiyasının üzvləri, Komissiya Katibliyinin əməkdaşları və Daxili İşlər Nazirliyinin müvafiq qurumlarının nümayəndələri tərəfindən Milli Məclisə seçkilərin hazırlanıb keçirilməsində, seçkiqabağı təşviqat dövründə, habelə səsvermə günü və ondan sonrakı proseslərdə polis əməkdaşlarının qanunvericiliklə müəyyənləşdirilmiş rol və vəzifələri barədə təqdimatlar keçirilir, çıxışlar dinlənilir, müzakirələr aparılır.

İyulun 25-də Milli Məclisə növbədənkənar seçkilərlə əlaqədar Mərkəzi Seçki Komissiyasının Daxili İşlər Nazirliyi (DİN) ilə birgə layihəsi çərçivəsində seminar-müşavirə Gəncədə təşkil olundu. Gəncə 2-ci polis şöbəsində keçirilən seminar-müşavirədə Milli Məclisə seçkilərin hazırlanıb keçirilməsində, seçkiqabağı təşviqat dövründə, habelə səsvermə günü və ondan sonrakı proseslərdə polis əməkdaşlarının qanunvericiliklə müəyyənləşdirilmiş rol və vəzifələrindən danışıldı.

Mərkəzi Seçki Komissiyasının Daxili İşlər Nazirliyi ilə birgə layihəsi çərçivəsində növbəti regional seminar-müşavirə iyulun 26-da Şəki şəhərində keçirildi. Tədbirdə Mərkəzi Seçki Komissiyasının və Daxili İşlər Nazirliyinin nümayəndələri, ölkəmizin şimal-qərb bölgəsində, eləcə də ətraf şəhər və rayonlarda fəaliyyət göstərən 17 seçki dairəsi üzrə dairə seçki komissiyalarının sədrləri, şəhər və rayon polis şöbələrinin məsul əməkdaşları iştirak etdilər. Seminar-müşavirədə seçkilərdə polisin xidməti fəaliyyətinə dair məsələlər ətraflı müzakirə olundu.

Mərkəzi Seçki Komissiyasının növbəti iclası Məzahir Pənahovun sədrliyi ilə iyulun 27-də baş tutdu. Komissiyanın iyulun 24-də keçirilən iclasının protokolu təsdiqləndi. Sonra Milli Məclisə növbədənkənar seçkilərdə seçki bülletenlərinin mətni, forması, sayı və hazırlanma qaydası komissiya üzvləri tərəfindən müzakirə edilərək təsdiq olundu. Qərar verildi ki, Mərkəzi Seçki Komissiyası Seçki Məcəlləsinin tələblərinə uyğun olaraq, 6 milyon 516 min 567 seçki bülleteninin komissiyanın təmsilçiliyə uyğun 3 üzvünün müşahidəsi altında hazırlanacaq.

Mərkəzi Seçki Komissiyasının sədri Məzahir Pənahov Milli Məclisə növbədənkənar seçkilərdə müşahidəçi qismində iştirak etmək üçün ümumilikdə indiyədək 2794 nəfərin akkreditasiyadan keçdiyini diqqətə çatdırdı. Qeyd etdi ki, müşahidəçilərdən 2562 nəfəri Mərkəzi Seçki Komissiyasında qeydiyyat keçiblər. Onların 126-sı Yeni Azərbaycan Partiyasının, 569-u QHT-lər xətti, 1867 nəfəri isə öz təşəbbüsü ilə müraciət edib.

Qarşıdan gələn seçkilərlə əlaqədar Mərkəzi Seçki Komissiyası tərəfindən qanunvericiliklə müəyyənləşdirilmiş vəzifə və səlahiyyətlərə malik qurumlarla sıx əməkdaşlıq çərçivəsində intensiv şəkildə davam etdirilən ümumrespublika miqyaslı maarifləndirmə tədbirləri barədə də iclasda ətraflı məlumat verildi, deputatlığa namizədlərin irəli sürülməsi və qeydə alınması, həmçinin müşahidəçilərin akkreditasiyası ilə bağlı statistik göstəricilər diqqətə çatdırıldı.

Zöhrə FƏRƏCOVA,

Azərbaycan.-2024.- 30 iyul (№ 159).- S.6.