Makronun Olimpiya rüsvayçılığı

Fransanın dövlət televiziyasının təxribat planının mətni Yelisey sarayında yazılıb

"Hər kəsə məlumdur ki, Olimpiya Oyunları təkcə idman yarışı deyil, həm də xalqlar arasında münasibətlərin yaxşılaşdırılması üçün bir fürsətdir. Oyunlar müxtəlif millətlərin və mədəniyyətlərin nümayəndələrini bir araya gətirir, sülh, dostluq və həmrəylik ideallarını təbliğ edir, diplomatiya və beynəlxalq əməkdaşlıq üçün mühüm platformaya çevrilir".

Bu sözləri "Azərbaycan" qəzetinə açıqlamasında Milli Məclisin deputatı Kamran Bayramov deyib. Deputat bildirib ki, Olimpiya Oyunları, həmçinin ayrı-seçkiliyin bütün formalarına qarşı mübarizə ideyalarını təbliğ edir. Bu oyunlarda irqi, milli, dini və ya cinsi ayrı-seçkiliyin hər hansı forması qadağandır. Beləliklə, bu yarış təkcə idman tədbiri kimi deyil, həm də sülh və tolerantlığın təbliği platforması kimi çıxış edir. Parisdəki Olimpiya Oyunlarının məqsədi də sülh və dostluq simvolunu təmsil etmək, siyasi və mədəni maneələri aşmaq, dünyanı idman və insan ruhunun bayramında birləşdirməkdir: "Lakin Paris Olimpiya Oyunlarının açılış mərasimi göstərdi ki, tədbirin keçirildiyi ölkə bu sülh, dostluq, həmrəylik və ayrı-seçkiliyin bütün formalarına qarşı mübarizə prinsiplərindən uzaqdır. Belə ki, Fransanın "France 2" telekanalının canlı yayımında şərhçilər Azərbaycanla bağlı təxribat xarakterli açıqlamalar verdilər. "Ötən il Ermənistan üçün matəm ili olub və Qarabağın Azərbaycan Ordusunun əlinə keçməsi ilə nəticələnib", - deyə kanal şərhçiləri deyiblər. Azərbaycanın "Ermənistanla ərazi münaqişəsində olan Qafqaz respublikası" kimi təqdim edilməsi fonunda şərhçi bildirib ki, Ermənistan tarixən fransızların qəlbinə yaxın ölkədir".

Müsahibimiz bildirib ki, Fransa ermənilərə öz sevgisini ənənəvi və ya qeyri-ənənəvi formada sübut etmək hüququna malikdir, amma Olimpiya Oyunlarının açılış mərasiminin canlı yayımında Azərbaycana qarşı təxribatçı və yalanlarla dolu bəyanatlarla deyil. Bu təxribatçı bəyanatlardan məlum oldu ki, fransız televiziya jurnalistləri üçün mətnlər məhz Yelisey sarayında yazılıb. Fransa prezidenti Emmanuel Makronun Azərbaycanın erməni separatizmi üzərində qazandığı tarixi qələbələrə acığı Fransa televiziya kanallarının efirində səsləndirilir. Maraqlıdır, Makron öz şəxsi rüsvayçılığının həddini aşmaq üçün daha hansı alçaqlığa əl ata bilər?!

K.Bayramov xatırladıb ki, bu, Azərbaycan ictimaiyyətinin haqlı narazılığına səbəb olub. Bir çox təşkilatlar, o cümlədən də Gənclər və İdman Nazirliyi ilə Milli Olimpiya Komitəsi Paris Olimpiadasında Azərbaycana qarşı təxribatla bağlı bəyanat yayıb və Beynəlxalq Olimpiya Komitəsinə rəsmi etiraz məktubu göndərib. Məktubda qeyd olunub ki, dövlət telekanalının Azərbaycana qarşı bu cür hörmətsiz münasibəti Olimpiya Xartiyasının açıq-aşkar pozulmasıdır. Bu cür təbliğat oyunların ruhuna zidd olmaqla yanaşı, Azərbaycan və Ermənistan arasında sülh səylərini pozmağa xidmət edir. Buna görə də BOK-dan Paris-2024 Olimpiadası zamanı idmanın siyasiləşdirilməsinə qarşı qəti mövqe göstərilməsi, açıq bəyanat verməklə Fransa hökumətinə, Fransa Milli Olimpiya və İdman Komitəsinə, eləcə də adıçəkilən telekanala etiraz bildirilməsi xahiş edilib. "O da qeyd edilməlidir ki, açılış mərasimi zamanı Olimpiya bayrağının bayraq dirəyinə tərsinə asılması rəmzi məna daşıdı. Təşkilatçılar ilk günlərdən karton çarpayılar, paralon döşəklər, yararsız mebellər, qeyri-kafi qidalanma, şəxsi əşyaların oğurlanması ilə idmançılara hörmətsizlik nümayiş etdirərək Olimpiya prinsipləri ilə bağlı bütün təsəvvürləri alt-üst etdilər.

Olimpiadanın açılış mərasimində tamaşaçılar tərəfindən Emmanuel Makronun fitə basılması isə idmançıların, qonaqların və tamaşaçıların ona münasibətinin zirvə nöqtəsi oldu", - deyə o əlavə edib.

Hələ Olimpiada başlamazdan əvvəl ekspertlərin Fransa hakimiyyətinin bu irimiqyaslı tədbirə hazırlığına şübhə ilə yanaşdıqlarını xatırladan deputat vurğulayıb ki, ümumiyyətlə, Paris Olimpiya Oyunlarına evsahibliyi etməyə hazır deyildi və tədbirin açılış mərasimi bunu açıq şəkildə göstərdi. Makronun Olimpiya rüsvayçılığı bütün çılpaqlığı ilə özünü büruzə verdi. Çətin ki, onun Ermənistana olan sevgisi Parisi bu rüsvayçılıqdan xilas edə bilsin.

Əsmər QARDAŞXANOVA,

Azərbaycan.-2024.- 30 iyul (№ 159).- S.7.