O, 2016-cı ildə baş verən, tarixə Aprel döyüşləri adı
ilə yazılan 4 günlük savaşın
da qəhrəmanlarından
biri idi. Həmin döyüşlərdə
işğalçı Ermənistan
silahlı qüvvələrinə
qarşı rəşadətlə
vuruşan Mehrab Niftəliyev kimi igidlərin sayəsində
Azərbaycan xalqı illər sonra qalibiyyət sevincini daddı. Azərbaycan Silahlı Qüvvələrinin
qələbəsi ilə
nəticələnən Aprel
döyüşlərində Tərtər rayonunun Talış kəndi ətrafındakı yüksəkliklər,
Cəbrayıl rayonunun
Lələtəpə yüksəkliyi
və Cocuq Mərcanlı, Goranboy rayonunun Gülüstan kəndi və Tərtər rayonunun Madagiz kəndi istiqamətində yollar düşməndən azad
edildi.
Ancaq Azərbaycanın
qəlbi vətənlə
döyünən mərd
övladları Ermənistanın
1990-cı illərdə qəsb
etdiyi Qarabağı, Şərqi Zəngəzuru
azadlığa qovuşdurmaq
arzusunda idilər. Onlar düşməni məğlubiyyətə uğradaraq
böyük zəfər
qazanmağa hazır idilər. Və Azərbaycan Silahlı Qüvvələrinin Ali Baş Komandanı İlham Əliyevin əmrini gözləyirdilər...
Xüsusi Təyinatlı
Qüvvələrin baş
giziri, kəşfiyyatçı-istehkamçı
Mehrab Niftəliyev də vətən torpaqlarının işğalçılardan
azad edilməsi uğrunda canından keçməyə hazır
idi.
O, 1985-ci il mayın
13-də Quba rayonunun Qam-qam kəndində dünyaya gəlmişdi.
1992-2003-cü illərdə Quba rayon Mübariz
Abdullayev adına Qam-qam kənd orta məktəbində təhsil almışdı.
Hərbi xidmətə
çağırılmışdı.
2003-cü ilin iyulunda əsgəri xidmətə
getmişdi. Komandirlərinin
verdiyi tapşırıqları
məsuliyyətlə yerinə
yetirmişdi. Mehrab hərbi xidmətdə olarkən Xüsusi Təyinatlı Qüvvələrin
kursundan keçmişdi.
Vətənə xidmətini
2005-ci ildən Xüsusi
Təyinatlı Qüvvələrin
döyüşçüsü kimi davam etdirmişdi.
Mehrab Niftəliyev
"Qafqaz qartalı"
və EFES kimi çətin hərbi təlimləri müvəffəqiyyətlə
başa vurmuş, kəşfiyyatçı-istehkamçı kimi ixtisaslaşmışdı.
O, qüsursuz xidmətlərinə
görə, 2013-cü ildə
"Azərbaycan Silahlı
Qüvvələrinin 95 illiyi",
2018-ci ildə isə
"Azərbaycan Ordusunun
100 illiyi" yubiley medalları ilə təltif edilmişdi.
Həmin illərdə
işğalçı ölkənin
silahlı qüvvələri
atəşkəs rejiminə
əməl etmir, Azərbaycan Ordusunun mövqelərini və mülki əhalisinin yaşayış məntəqələrini
iriçaplı pulemyotlardan
və ağır artilleriyadan müntəzəm
atəşə tuturdular.
Ermənistanın təxribatları
2020-ci il sentyabrın
27-də İkinci Qarabağ
müharibəsinin başlamasına
səbəb oldu.
Azərbaycan Ordusunun
baş giziri Mehrab Niftəliyev də müharibənin ilk günündən ön cəbhədə oldu. O, Füzuli, Cəbrayıl, Qubadlı,
Zəngilan, Xocavənd, Şuşa
uğrunda gedən döyüşlərdə misilsiz
hünər göstərdi.
Düşmənin xeyli
sayda canlı qüvvəsini məhv etdi və texnikalarını
sıradan çıxardı,
hərbi qənimət
kimi ələ keçirdi.
Mehrab döyüşçü
əzmkarlığı, qətiyyəti
ilə yoldaşlarının
rəğbətini qazanmışdı.
Baş gizir Mehrab Niftəliyev yaralı silahdaşlarına
tibbi yardım da göstərir, döyüşlər zamanı
onları və şəhid olmuş hərbi qulluqçuları
savaş meydanından
çıxarırdı. Qorxmazlığına,
igidliyinə, şücaətinə
görə döyüş
yoldaşları ona
"Terminator" deyirlərmiş.
Qəhrəmanın ən böyük arzusu Şuşaya bayrağımızı sancmaq
idi. O, igid silahdaşları ilə birgə Şuşanı işğalçı ölkənin
silahlı qüvvələrindən
azad etməyə, qala şəhərimizi azad etməyə gedirdi...
Mehrab Niftəliyev
Şuşaya ilk daxil olan hərbçilərdən
biri oldu. O, noyabrın 7-də Şuşa
uğrunda gedən döyüşlərdə sol
ayağından artilleriya
qəlpəsi yarası
aldı. Noyabrın
8-də isə elə
Şuşada şəhadətə
yüksəldi. Noyabrın
11-də Sumqayıt şəhər
Şəhidlər xiyabanında
torpağa tapşırıldı.
Doğma Azərbaycanın
ərazi bütövlüyünün
bərpa edilməsində
xüsusi xidmətlərinə,
işğal olunmuş
Qarabağın və
Şərqi Zəngəzurun
azad olunması zamanı göstərdiyi şücaətə görə
dövlət başçısının
sərəncamları ilə
Mehrab Söhrab oğlu Niftəliyev ölümündən sonra
"Vətən Müharibəsi
Qəhrəmanı", "Vətən uğrunda",
"Cəbrayılın azad
olunmasına görə",
"Füzulinin azad olunmasına görə"
və "Şuşanın
azad olunmasına görə" medalları
ilə təltif olundu.
Vətən uğrunda
canından keçmiş
şəhidlərimizin xatirəsi
daim əziz tutulur, adları əbədiləşdirilir. Mehrabın
da xatirəsi hər zaman etiramla yad edilir.
Quba və Sumqayıtda küçələrə,
eləcə də Quba şəhəri Texniki Təmayüllü Liseyə Vətən Müharibəsi Qəhrəmanı
Mehrab Niftəliyevin adı verilib.
Şəhid Mehrab
Niftəliyevin üç
övladı - iki oğlu və bir qızı Vətənə əmanətdir.
Zöhrə FƏRƏCOVA
Azərbaycan.-2024.-
31 iyul (№ 160).- S.10.