Daşkəsəndə "Yaşıl gələcəyin səsi" mövzusunda elmi-praktik konfrans keçirilmişdir

Daşkəsəndə rayon icra hakimiyyəti, Azərbaycan Dövlət Aqrar Universiteti və Daşkəsən Dövlət Aqrar İnkişaf Mərkəzinin birgə təşkilatçılığı ilə "Yaşil dünya naminə həmrəylik ili" çərçivəsində "Yaşıl gələcəyin səsi" mövzusunda elmi-praktik konfrans keçirilmişdir.

Konfransı giriş sözü ilə Daşkəsən Rayon İcra Hakimiyyətinin başçısı Orxan Abbasov açaraq diqqətə çatdırmışdır ki, 2024-cü ilin "Yaşıl dünya naminə həmrəylik ili" elan olunması təkcə ölkəmizə deyil, ümumilikdə bütün dünyaya qlobal çağırışdır. Azərbaycanın 2030-cu ilə qədər sosial-iqtisadi inkişafına dair 5 milli prioritetindən biri "Təmiz ətraf mühit və yaşıl artım ölkəsi" kimi müəyyənləşdirilib. Ölkəmizdə ətraf mühitin sağlamlaşdırılması, yaşıllıqların bərpası və artırılması, su ehtiyatlarından, həmçinin dayanıqlı enerji mənbələrindən səmərəli istifadənin reallaşdırılması tədbirlərinin həyata keçirilməsi davam edir. 2024-cü ilin noyabr ayında Azərbaycan dünyanın ən böyük və mühüm dövlətlərarası tədbirlərindən biri olan BMT-nin İqlim Dəyişmələri üzrə Çərçivə Konvensiyasının Tərəflər Konfransının 29-cu sessiyasına - COP29-a evsahibliyi edəcək. 70 minə yaxın iştirakçının qatılacağı COP29-un ölkəmizdə keçirilməsi Prezident İlham Əliyevin uzun illər ərzində yorulmadan bu istiqamətdə həm ölkə daxilində, həm də xaricdə apardığı böyük ekoloji siyasətinin bəhrəsidir. Bu tədbirin Azərbaycanda keçirilməsi böyük etimadın göstəricisi olmaqla, ölkəmizin qlobal problemlərin həllində məsuliyyətli və etibarlı tərəfdaş mövqeyini bir daha təsdiqləyir.

Konfransda "Yaşıl dünya naminə həmrəylik ili" çərçivəsində Daşkəsən rayonunda görülən işlər də diqqətə çatdırılmışdır. Yaşıllaşdırma və bioloji müxtəliflik sahəsində nəzədə tutulan tədbirlərin icrası ilə bağlı rayonun müxtəlif ərazilərində keçirilmiş çoxsaylı ağacəkmə aksiyaları müsbət dəyərləndirilmişdir.

Tədbirdə su ehtiyatlarından səmərəli istifadənin təmin olunması, alternativ su mənbələrinin yaradılması və həmin mənbələrdən istifadənin genişləndirilməsi istiqamətində təkliflər irəli sürülmüşdür. Bundan başqa, bərk məişət tullantılarının yerləşdirilməsi, utilizasiyası və zərərsizləşdirilməsi məqsədilə yaşayış məntəqələrində çoxsaylı iməciliklər və təmizlik aksiyaları keçirilməsinin vacibliyi qeyd edilmişdir.

Konfransda qlobal iqlim dəyişikliklərinə uyğun olaraq yeni yay otlaqlarının, balverən bitkilərin, həmçinin dağ meyvəçiliyinin yaradılması perspektivləri barədə fikir mübadiləsi aparılmışdır. Yerli genofondun qorunması problemləri, ərzaq təhlükəsizliyinin təmin olunması məqsədi ilə məhsuldar ekoloji şəraitə uyğun buğda sortlarından istifadə, kartofçuluqla bağlı dövlət proqramları və regionda kartofçuluğun mövcud vəziyyəti, dağ bölgəsində intensiv meyvəçilik problemləri, qlobal istiləşmə və hidroponik sistem və digər mövzularda məruzələr dinlənilmişdir.

Sabir ƏLİYEV,

Azərbaycan.-2024.- 31 iyul (№ 160).- S.8.