"Fransa siyasətində müstəmləkəçilik xətti aydın görünür"

Törətdiyi vəhşiliklər Parisin əsl simasını nümayiş etdirir

Demokratiyadan, insan hüquqlarından dəm vuran Fransanın siyasətində bunların heç birini görmək mümkün deyil. Uzun illərdir müstəmləkə siyasəti yürüdən bu ölkənin həm daxili, həm də xarici siyasətinin yarıtmaz vəziyyətdə olduğu açıq-aydın ortadadır.

Azərbaycanı daim müxtəlif bəhanələrlə günahlandıran, ölkəmizə qarşı qarayaxma kampaniyaları həyata keçirən Parisin son olaraq Yeni Kaledoniyada dinc etirazçılara qarşı törətdiyi vəhşiliklər də Fransanın əsl simasını göstərdi.

Ümumiyyətlə, dənizaşırı ölkələrin xalqlarının müstəqilliyini daim boğan, onların azadlığına mane olan Fransanın özünün demokratiya ölkəsi kimi təbliği gülüncdür. Çünki nə qədər pərdələnməyə çalışsa da, törətdiyi cinayətləri, yürütdüyü neokolonialist siyasəti gizlədə bilməz.

Milli Məclisin deputatı Aydın Mirzəzadə qəzetimizə açıqlamasında qeyd edib ki, Fransa özünü müasir və demokratik ölkə hesab etsə də, bu gün onun xarici siyasətində müstəmləkəçiliyin qalıqları kifayət qədər bariz görünür. Ölkənin indiki prezidenti Emmanuel Makron isə bu siyasəti daha da gücləndirməyə çalışır: "Nəticədə dünya Fransanın öz müstəmləkələrindən əl çəkmədiyinin, orada yerli xalqın azadlıq istəyini boğduğunun şahidi olur. Buna misal kimi Yeni Kaledoniyanı, Polineziyanı göstərmək olar. Fransanın burada həm siyasi, həm iqtisadi maraqları var. Ancaq dünya bu gün iqtisadi maraqları tam başqa formada həyata keçirir. Fransa isə buna hazır deyil. Bunun nəticəsidir ki, o, uzaq ada ərazilərini müstəmləkə kimi saxlayır və onlara müstəqillik vermək istəmir. Ancaq tarixin təkərini dayandırmaq mümkün deyil".

Deputat vurğulayıb ki, Fransa gec-tez onların müstəqilliyini tanımağa məcbur olacaq. Bu gün dünya buna israrlıdır, dünyada gedən proseslər bunu tələb edir. Müstəqillik arzusunun üç-beş il, lap onilliklərlə qabağını almaq olar, amma ümumilikdə həmin yerli xalqlar dünya birliyində öz yerini tutmağa çalışır. Azərbaycan bu məsələdə həmin xalqları siyasi cəhətdən dəstəkləyir.

Əsmər QARDAŞXANOVA,

Azərbaycan.-2024.- 2 iyun, № 115.- S.6.