"Avropa Parlamenti fəaliyyətini ədalətsizlik üzərində qurub"

Belçika polisinin bu təşkilatın ofisində axtarış aparması təəccüblü deyil

"Belçika polisinin Avropa Parlamenti ofisində axtarış aparması təəccüblü deyil. Ötən hadisələr göstərir ki, Avropa Parlamenti, əslində, ədaləti müdafiə etmək üçün deyil, yalnız öz maraqlarını təmin etmək üçün toplantı keçirir".

Bu sözləri "Azərbaycan" qəzetinə açıqlamasında Milli Məclisin deputatı Anar İsgəndərov deyib. Deputat hesab edir ki, AP-nin deputatları nəyinsə müqabilində hansısa maraqlarını müdafiə edirlər. Buna keçmiş Azərbaycan-Ermənistan münaqişəsinin həlli istiqamətində aparılan danışıqlar zamanı dəfələrlə şahidlik etmişik: "Avropa Parlamentinin ədalətsiz mövqeyi hamıya məlumdur. Erməni tərəfi təcavüzkar idi, ancaq bu təşkilat bir dəfə də olsun Azərbaycan torpaqlarının işğal olunduğunu etiraf etmədi. 2001-ci ilin yanvar ayında Avropa Parlamentinin üzvü olmaqla bu təşkilata ədalət, haqqı müdafiə etmək üçün getdik. Çox təəssüflər olsun ki, bu parlament şurasının üzvlərinin əksəriyyəti Ermənistanın ədalətsiz mövqeyini müdafiə etdilər. Azərbaycanın haqqını, istəklərini qulaqardına vurdular".

Deputatın sözlərinə görə, Azərbaycan BMT Təhlükəsizlik Şurasının qəbul etdiyi məlum 4 qətnamənin icrasını özü reallaşdıranda, terrorçuları qovub öz ərazisindən çıxardanda Avropa Parlamenti əndişəyə düşdü. Hətta ölkəmizə müxtəlif səviyyələrdə təzyiqlər göstərməyə də başladı. Amma bu təzyiqlərin heç bir əhəmiyyəti olmadı. Azərbaycanda iqtidar-xalq birliyi və xalqın "dəmir yumruq" kimi Ali Baş Komandan İlham Əliyevin ətrafında birləşməsi, Prezidentin qətiyyəti antiazərbaycançı şəbəkənin bütün arzu və istəklərini ürəyində qoydu.

Deputat qeyd edib ki, Azərbaycan 2023-cü ilin sentyabrında antiterror əməliyyatı ilə suverenliyini tam bərpa edəndə isə Avropa Şurası Parlament Assambleyası buna dözmədi və ölkəmizi parlament sıralarından kənarlaşdırmaq qərarına gəldi: "Təbii ki, bu fikir var idi, amma Azərbaycan tərəfi onu gözləmədi. Bəyanat verərək bu qurumda fəaliyyətini özü dayandırdı".

A.İsgəndərov hesab edir ki, bu gün yenə də Avropa Parlamenti Azərbaycana qarşı qərəzini gizlətmir. Azərbaycanla bağlı hər cür böhtanlara əl atır. Xüsusilə Fransadan, Almaniyadan olan deputatlar ölkəmizə qarşı böhtan atmaq uğrunda yarışa giriblər. Ancaq bunlar hamısı əbəsdir. Bu parlamentdə korrupsiya halları kifayət qədər çoxdur. Deputatlarla bağlı şübhələr var, onlar istintaqa cəlb ediliblər. Bütün bunlar Avropa Parlamentinin heç zaman nümunə ola bilməyəcəyini və hər hansı bir tövsiyəsinin Azərbaycanın maraqlarına uyğun olmadığını göstərir: "Çünki Avropa Parlamenti ilk gündən Ermənistanın buyurduqlarını həyata keçirib, bu isə Azərbaycanın maraqlarına ziddiyyət təşkil edib. Bir sözlə, Avropa Parlamenti fəaliyyətini ədalətsizlik üzərində qurub".

Ə.QARDAŞXANOVA,

Azərbaycan.-2024.- 2 iyun, № 115.- S.6.