Onun üçün həyat rinqdən başlayırdı

Azərbaycan boksçuları Vaqif Gözəlovu özlərinin müəllimi hesab edirlər

Şirvan şəhərində bir canlanma var. Şəhər ictimaiyyəti Azərbaycan Respublikasının Əməkdar bədən tərbiyəsi və idman xadimi, "Tərəqqi" medallı, SSRİ İdman ustası, Beynəlxalq dərəcəli hakim, Fəxri bədən tərbiyəsi və idman işçisi Vaqif Gözəlovun xatirəsinə həsr olunmuş boks turnirinə toplaşırdı.

Səhər saat 10 olmasına baxmayaraq, tədbirin keçirildiyi Şirvan Olimpiya İdman Kompleksinin boks idman zalı adamla doludur. Respublika əhəmiyyətli idman yarışında Bakıdan, Şirvan şəhərindən, Hacıqabul, İmişli və Sabirabad rayonlarından gəlmiş 11-12 və 13-14 yaş qrupundan olan uşaqlar, yeniyetmələr təmsil olunurlar. Onların sayı ümumilikdə 95-dir. Gənc idmançıların arasında 8 qız boksçunun olması sübut edirdi ki, idmanın bu növünə təkcə oğlanlar deyil, qızlar da həvəs göstərirlər.

Turnirin başlanmasına hələ bir saat var. Bundan istifadə edərək tədbirin baş hakimi, respublika dərəcəli hakim, Əməkdar idman ustası Telman Aydınova bir neçə sualla müraciət edirik. Bildirir ki, Vaqif Gözəlovun xatirəsinə həsr edilmiş bu turnirin böyük əhəmiyyəti var: "Mərhum idmançımız Azərbaycanın, o cümlədən doğulub böyüdüyü Şirvanın idman şərəfini həmişə ləyaqətlə qorumuşdur. Bildiyimiz kimi, boks idmanın güc və fəndlərlə bərabər, möhkəm iradə, cəsarət, döyüşkənlik tələb edən bir növüdür. V.Gözəlov boksu çox sevirdi. O, özü özünün həm məşqçisi, həm müəllimi olub. Çəkdiyi zəhmət hədər getməyib. Rinqlərdə qazandığı qələbələr idmançını məşhurlaşdırıb. Keçən əsrin

60-cı illərində keçmiş SSRİ-nin müxtəlif şəhərlərində keçirilən yarışlarda fəxri kürsünün ən yüksək pillələrinə yüksələrək Azərbaycanı tanıdıb. Boks sahəsində perspektivli döyüşçü olduğunu görən Azərbaycan Boks Federasiyasının

ozamankı prezidenti Abbas Ağalarovun təqdimatı ilə o, 1962-ci ildə Azərbaycan Dövlət Bədən Tərbiyəsi İnstitutuna daxil olub və 1966-cı ildə oranı bitirib. Həmin illər V.Gözəlov dəfələrlə ali məktəb boksçuları arasında keçirilən yarışların qalibi olub. Moskva, Kaunas şəhərlərində, habelə Ukrayna, Gürcüstan, Qazaxıstan, Belarus, Latviya, Litva, Estoniya respublikalarında keçirilən turnirlərdə qalib olub, mükafatlar alıb. Ali təhsilini başa vurandan sonra idman fəaliyyətini Şirvan şəhərində davam etdirib, gənc boksçular yetişdirib. Adlı-sanlı boksçulardan Ələkbər Ələkbərov, Nazim və Yazel qardaşları, Vahid Gözəlov, Əkbər Ələkbərov, Oruc İbrahimov, Səməd Əliyev, Valeri Solquba, Çingiz Hüseynov, Oqtay Vəliyev və başqaları onun yetirmələridir. V.Gözəlovun məktəbini keçən bu boksçulara qalib gəlmək heç də asan olmurdu".

1966-cı ildə V.Gözəlov SSRİ idman ustası, 1996-cı ildə isə respublika dərəcəli hakim adına layiq görülüb. Ədalətli, prinsipial mövqeyi nəzərə alınaraq bir çox mühüm yarışın hakimliyi ona tapşırılıb. 2001-ci ildə daha bir əlamətdar hadisə baş verib. Vaqif Gözəlov beynəlxalq dərəcəli hakim adına layiq görülüb, ölkə, Avropa, dünya birinciliklərində hakimlik edib. 2002-ci il ona daha bir uğur gətirib: Fəxri bədən tərbiyəsi və idman ustası adını alıb. 2006-cı ildə Ulu Öndər Heydər Əliyevin xatirəsinə həsr olunmuş yeniyetmələr arasında 5-ci Beynəlxalq boks turnirinə hakimlik etməsi V.Gözəlovun fəaliyyətində xüsusi yer tutan hadisələrdən biridir. O, bu tədbirdə xüsusi diplomla mükafatlandırılıb.

V.Gözəlov məşqçilik fəaliyyətində 5 idman ustası, 25 məşqçi-müəllim, 16 idman hakimi, 190-dan çox 1-2-3-cü dərəcəli idmançılar hazırlayıb. Şagirdlərindən 11 nəfəri Azərbaycan Dövlət Bədən Tərbiyəsi və İdman Akademiyasını, 18 nəfəri Bakı Bədən Tərbiyəsi Texnikumunu və Şirvan Şəhər Dövlət İqtisadiyyat və Humanitar Kollecinin müvafiq şöbəsini bitirib. Onun 51 il müəllimlik, 60 il məşqçilik, 55 il hakimlik stajı olub. Əməyi dövlət tərəfindən layiqincə qiymətləndirilib. Prezident İlham Əliyevin 4 oktyabr 2010-cu il tarixli sərəncamı ilə "Tərəqqi" medalı ilə təltif edilib, 19 dekabr 2011-ci il tarixli sərəncamı ilə Əməkdar bədən tərbiyəsi və idman xadimi fəxri adı verilib.

Saat 12 radələridir. Baş hakim turnirin başladığını elan edir. Şirvan İqtisadiyyat və Humanitar Kollecinin direktoru Barxudar Barxudarov, Şirvan və Salyan Regional Gənclər və İdman İdarəsinin rəisi Aydın Hüseynov, V.Gözəlovun qardaşı, əmək veteranı Adıgözəl Gözəlov çıxış edərək yeniyetmə və gənc boksçulara uğurlar arzulayırlar.

Boksçular növbə ilə rinqə dəvət olunurlar. Qızğın döyüşlər başlayır. Dörd saat davam edən turnir yarışında Şirvan şəhər komandası 1-ci, Hacıqabul rayonunun idmançıları 2-ci, Bakı şəhərini təmsil edən boksçular isə 3-cü yerə layiq görülürlər.

Seyran CAVADOV,

Azərbaycan.-2024.- 2 iyun, № 115.- S.10.