Kukla teatrından Füzuli məktəblilərinə bayram töhfəsi

Azərbaycan Dövlət Kukla Teatrının və "Oyuq" Müstəqil Teatrının kollektivləri Füzuli şəhərinə səfər ediblər. Teatrların Mətbuat xidmətlərindən verilən məlumata görə, yaradıcı kollektivlər mayın 27-də Füzuli şəhər Mirzə Uluqbəy adına 1 nömrəli tam orta məktəbin səhnəsində tamaşa və konsert proqramı ilə çıxış ediblər. Respublika Günü münasibətilə təşkil olunan səfər əsl bayram ovqatı yaradıb.

Ağdam, Füzuli və Xocavənd rayonlarında Azərbaycan Prezidentinin xüsusi nümayəndəliyi, eləcə də həmin ərazilərdəki Bərpa, Tikinti və İdarəetmə Xidmətinin dəstəyi ilə baş tutan səfər dolğun və yaddaqalan olub.

Kuklaçılar Füzuli sakinləri qarşısında "Məlikməmməd" tamaşası, "Oyuq" Müstəqil Teatrının yetirmələri isə "Can Qarabağ" adlı rəngarəng konsert proqramı ilə çıxış ediblər.

Tamaşaçılar əvvəlcə Azərbaycan xalq nağılı əsasında yeni səhnələşdirmədə ərsəyə gələn "Məlikməmməd" tamaşasını izləyiblər.

Birhissəli uşaq tamaşasının quruluşçu rejissoru teatrın baş rejissoru Anar Məmmədov, quruluşçu rəssamı isə teatrın baş rəssamı İqbal Əliyevdir.

Rejissor bu klassik nümunəni İkinci Qarabağ müharibəsi, tarixi Zəfərimizlə əlaqələndirib və ona əlavələr edərək, fərqli prizmadan baxmağa çalışıb.

Səhnə əsərinin əsas məqsədi uşaq və yeniyetmələrə cəsarət, dürüstlük və mübarizlik aşılamaqdır.

Anşlaqla keçən nümayişin ardınca "Oyuq"çuların ifalarında hərbi-vətənpərvərlik, eləcə də Qarabağ, Zəfər mövzularında klassik və yeni mahnılar səslənib.

Q.MƏMMƏDOV

Azərbaycan.-2024.- 2 iyun, № 115.- S.11.