Azərbaycan türk birliyinin mərkəzinə çevrilib

İlham Əliyevin təşəbbüsləri TDT-ni qlobal güc kimi müəyyənləşdirir

Türk dövlətləri arasında getdikcə artan və yeni inkişaf mərhələsinə qədəm qoyan çoxşaxəli əlaqələr Türk Dövlətləri Təşkilatının (TDT) da dünyada söz sahibi olan güc mərkəzinə çevrilməsinə birbaşa rəvac verib. Milli köklərimizlə, ortaq dəyərlərimizlə, mədəniyyətimizlə, dilimizin, dinimizin birgəliyi ilə sıx bağlı olduğumuz türk xalqlarının, dövlətlərinin həmrəyliyində, birliyində, sıx əməkdaşlığında Azərbaycan xüsusi yer tutur. Prezident İlham Əliyevin birbaşa təşəbbüsləri TDT-nin qlobal güc kimi müəyyənləşdirilməsində əsas rol oynayır.

İyunun 6-da dövlət başçısı İlham Əliyev TÜRKPA-nın nümayəndə heyətini qəbul etdiyi zaman məhz bu məqamı xüsusi vurğuladı: "Azərbaycan olaraq bütün bu 20 il və ondan əvvəl rəhmətlik atamın dövründə Azərbaycan bu qurumun möhkəmləndirilməsi, birləşməsi və təşkilata çevrilməsi işində çox fəal idi. Təsadüfi deyil ki, bugünkü Türk Dövlətləri Təşkilatının təşkilata çevrilməsi prosesi də Naxçıvanda başladı. Mənim təşəbbüsümlə Zirvə görüşünün qədim türk dünyası olan Naxçıvanda keçirilməsi böyük məna daşıyırdı. Orada əldə edilmiş qərarlar əsasında biz inkişaf edirik..."

Yeni türk tarixinin parlaq qələbəsi

2009-cu ildə qədim türk diyarı Naxçıvanda təməli qoyulan Türk Şurasının (indiki Türk Dövlətləri Təşkilatı) qarşısına qoyduğu məqsəd və hədəflərə çatması üçün ötən dövr ərzində ölkəmiz xüsusi səylər göstərib. Təşkilata sədrliyi dövründə Azərbaycan türk dövlətləri arasında əlaqələrin daha da genişlənməsi üçün yeni təşəbbüslərlə çıxış edib.

Azərbaycanın Qarabağ zəfəri ümumilikdə türkdilli xalqlar adına qazanılan parlaq qələbə oldu. Bu həm də türk dünyasının tarixən var olan etnosiyasi coğrafiyasını bərpa etdi, türk birliyinin daha da güclənməsinə təkan verdi. Təsadüfi deyil ki, Türkdilli Dövlətlərin Əməkdaşlıq Şurasının İstanbulda keçirilən VIII Zirvə Görüşü zamanı Prezident İlham Əliyev Türk Dünyasının Ali Ordeninə layiq görüldü.

2020-ci ildə Azərbaycanın haqq savaşına çıxdığı zaman qardaş Türkiyənin siyasi, mənəvi dəstəyini göstərməsi ölkəmizə əlavə güc verdi.

Türk Dövlətləri Təşkilatına üzv ölkələrin liderlərinin - Türkiyə, Özbəkistan, Qazaxıstan, Qırğızıstan prezidentlərinin Qarabağ və Şərqi Zəngəzura səfər etmələrinin özü də bu baxımdan mühüm əhəmiyyət kəsb edir.

Onu da xüsusi qeyd edək ki, türkdilli ölkələr işğaldan azad olunan torpaqlarımızda həyata keçirilən quruculuq işlərinə də dəstəklərini göstərirlər. Füzuli rayonunda Özbəkistan və Qazaxıstan tərəfindən məktəb və yaradıcılıq mərkəzi inşa edilərək istifadəyə verilib. Qırğızıstan tərəfindən isə Ağdamda bir məktəbin inşasına başlanılıb. Cəbrayıl rayonundakı bir məntəqədə isə Macarıstanın maliyyə dəstəyi ilə bir məktəb inşa ediləcək. Bunlar dost ölkələrin Azərbaycan xalqına hədiyyəsidir və türk birliyinə nümunələrdir.

Birliyimizin gücləndirilməsinə istiqamətlənmiş növbəti addım

Azərbaycanın xarici siyasətində türk dünyasının gücləndirilməsi, türk dövlətləri ilə əlaqələr əsas istiqamət kimi müəyyən olunub. Dövlət başçımızın türkdilli ölkələrə ardıcıl səfərləri, eyni zamanda həmin ölkələrin liderlərinin Azərbaycana səfərləri türk dövlətləri ilə yüksək əlaqələrin bariz göstəricisidir.

Eyni zamanda Azərbaycanın həyata keçirdiyi məqsədyönlü siyasət nəticəsində türk dövlətləri arasında siyasi, diplomatik, mədəni əlaqələrlə yanaşı, iqtisadiyyat, ticarət sahələrində də böyük uğurlar əldə edilib.

TÜRKPA nümayəndə heyəti ilə görüş zamanı ölkəmizin başçısı bu məqama da toxundu: "Builki prezident seçkilərindən sonra andiçmə mərasimindəki çıxışımda bildirmişdim ki, bizim ailəmiz türk dünyasıdır, bizim başqa ailəmiz yoxdur. Əslində, bu, ölkəmizin bu istiqamətdəki siyasətini açıq şəkildə büruzə verir. Şadam ki, son illər ərzində Türk Dövlətləri Təşkilatı xətti ilə aparılan işlər birliyimizi daha da gücləndirir".

Türk Dövlətləri Təşkilatının gələcək fəaliyyəti üçün də birinci təşəbbüs məhz Azərbaycandan gəlib. Bildirək ki, bu yaxınlarda ölkəmiz TDT-nin fəaliyyətinin gücləndirilməsi üçün mövcud büdcənin yetərli olmadığını bəyan etmişdi. Ölkəmiz bu istiqamətdə əməli addım ataraq təşkilata birtərəfli qaydada 2 milyon Amerika dolları əlavə ianə verib.

Onu da qeyd edək ki, Prezident İlham Əliyevin təşəbbüsü ilə iyul ayında Şuşada Türk Dövlətləri Təşkilatının qeyri-rəsmi Zirvə görüşü keçiriləcək. Həmin görüşün əsas mövzuları nəqliyyat və iqlimlə bağlı olacaq.

Bu birlik bütün başqa birliklərdən daha güclüdür

Hazırda dünyada gedən qütbləşmələr, geosiyasi proseslər, dünyanın dörd bir yanını bürümüş müharibələrin fonunda da görürük ki, türk dövlətlərinin güclərini birləşdirməsi olduqca vacib əhəmiyyət kəsb edir.

Əslində, Vətən müharibəsi zamanı türk birliyinin gücünün nələrə qadir olduğunu bütün dünya gördü. Hazırda qarşımızda duran ümdə çağırış bu birliyi daha da qüvvətləndirmək və dünya miqyasında güc mərkəzinə çevirməkdir.

Qarşıdakı zamanda da Türk Dövlətləri Təşkilatı üzv dövlətlərin hər birinin səyi ilə daha da möhkəmlənəcək və "türk dünyası ailəsi"nin həmrəyliyi daha da güclənəcək. Necə ki bu barədə Prezident İlham Əliyev deyib: "Türk dünyasının gücləndirilməsi, birləşməsi türk dünyasını, Türk Dövlətləri Təşkilatını dünya miqyasında böyük bir güc mərkəzinə çevirəcək...

...Xəritəyə baxsaq görərik ki, türk dünyasının ucu-bucağı yoxdur, böyük coğrafiyanı əhatə edir. Artan əhali, gənc əhali, təbii sərvətlər, nəqliyyat yolları, aramızdakı birlik. Bu birlik təbiidir, bu birliyin təməlində ortaq köklər var. Ona görə bu birlik bütün başqa birliklərdən daha qüvvətli, daha güclüdür".

Yasəmən MUSAYEVA,

Azərbaycan.-2024.- 8 iyun, № 120.- S.7.