Hayastan yeni reallıqlarla barışmalıdır

İlham Əliyev məğlub ölkəni revanşist əməllərdən çəkinməyə çağırdı

Azərbaycan-Hayastan münasibətlərinin İkinci Qarabağ müharibəsindən sonra normallaşması, bir-birilərinin ərazi bütövlüyünü tanımaqla tərəflər arasında yekun sülh müqaviləsinin imzalanması bu gün Cənubi Qafqazda sabitlik üçün əsas şərtdir. Dövlət sərhədinin delimitasiya və demarkasiya proseslərinə start verilməsi bu istiqamətdə işlərin başlanğıcı hesab edilə bilər.

Hayastanda baş nazir Nikol Paşinyana qarşı çıxan sabiq iqtidar təmsilçiləri qarşıdurma yaratmaqla ölkədə xaos formalaşdırmaq məqsədi güdürlər. Belə ki, Azərbaycanla sülh müqaviləsinin imzalanması ilə bağlı gedən müzakirələr fonunda sosial narazılıqlardan istifadə edən Sarkisyan-Koçaryan koalisiyasının revanş istəyi vəziyyətin daha da qarışacağını göstərir. Proseslər onu deməyə əsas verir ki, keçmiş hərbi xunta kilsəni də siyasi proseslərə cəlb edərək ölkədəki xaosu daha da dərinləşdirməyə çalışır.

Azərbaycan Prezidenti İlham Əliyev TÜRKPA nümayəndə heyətini qəbul edərkən bildirib ki, Ermənistan revanşizm ideyalarından tamamilə imtina etməlidir, belə ideyalar təkcə müxalifətdə deyil, iqtidarda da var: "Bu gün Ermənistanda keçmiş prezidentlər Sarkisyan və Koçaryan da daxil olmaqla revanşizm hissi ilə yaşayan və hakimiyyətə can atan qüvvələr var. Həmin qüvvələr niyyətlərini açıq bəyan edirlər və hakimiyyətə gələrək yenidən müharibəyə başlamaq planları qururlar".

Xatırladaq ki, təxminən 20 il Hayastana rəhbərlik etmiş oğru, kriminal rejimin hakimiyyətdən qovulmasının səbəblərindən biri məhz Prezident İlham Əliyevin həyata keçirdiyi təcrid siyasəti olub. Bu siyasətin nəticəsində İrəvan bütün layihələrdən kənarda qalıb, erməni xalqı işğal siyasətinin qurbanı olaraq səfalət içində yaşayıb.

Azərbaycan Vətən müharibəsində Koçaryan-Sarkisyan hərbi xuntasının işğalçı və terrorçu ordusunu məğlub edib. Ali Baş Komandan İlham Əliyev işğaldan azad edilmiş Ağdam şəhərində olarkən demişdi ki, Hayastanın keçmiş rəhbərləri İkinci Qarabağ müharibəsi dövründə qaçıb gizlənib, döyüş bölgəsinə burunlarını da belə soxa bilmədilər: "Bəs haradadır sizin qəhrəmanlığınız? Dedim ki, çıxarın dəmir-dümürləri, onun qiyməti yoxdur. Qəhrəman ordenləri taxmısınız döşünüzə. Yalançı qəhrəmandırlar bunlar....Nə gizlənirsiniz orada siçan kimi?! Koçaryan, Sarkisyan, mən sizə deyirəm".

Bəli, Azərbaycan Prezidenti öz siyasəti ilə hərbi xuntanın iflasını təmin etdi, müharibə canilərini tarixin arxivinə göndərdi. Bu canilər nə müharibə günlərində, nə də ondan sonra ortalıqda görünmədilər.

Sülh müqaviləsini imzalamayacağı təqdirdə Hayastan daha böyük problemlərlə üzləşəcək. Onu da qeyd edək ki, hazırda ölkəni tərk edənlərin sayı sürətlə artır. Görülən bütün tədbirlərə baxmayaraq, əhalinin sayı sürətlə azalmaqda davam edir, xaricə köçənlər durmadan artır. Bir sözlə, Hayastandakı durum onu deməyə əsas verir ki, hazırda bu ölkə acınacaqlı vəziyyətdədir.

İkinci Qarabağ müharibəsində Hayastan ordusu darmadağın edilib. Lakin buna baxmayaraq, ölkədəki bəzi revanşistlər Azərbaycana "hədə-qorxu" gələrək ölkəmizdə təxribatlar törədəcəkləri ilə bağlı sərsəm fikirlər səsləndirirlər. Məsələnin bu tərəfinə toxunan Prezident İlham Əliyev qeyd edib ki, Azərbaycan həmişə hazır olmalı, təhlükəsizlik tədbirləri davam etdirilməlidir: "Ermənistan heç bir halda Azərbaycana qarşı həmlələrlə uğur əldə edə bilməz, belə bir cəhd olarsa, bu, Ermənistan dövlətinin sonu olacaq... Əgər Ermənistan 2020-ci ildə bizim sözümüzə qulaq assaydı və sülh yolu ilə bizim torpaqlarımızı qaytarsaydı, İkinci Qarabağ müharibəsinə və antiterror əməliyyatına ehtiyac qalmazdı. Yəni o, onlar üçün dərs olmalıdır və mən görürəm ki, o dərsdən onlar, necə deyərlər, nəticə çıxarırlar. Çünki dörd kəndin sülh yolu ilə, danışıqlar yolu ilə bizə qaytarılması və o bölgədə sərhədlərin müəyyən edilməsi göstərir ki, biz məsələləri danışıqlar yolu ilə həll edə bilərik".

Bəli, Hayastanda baş qaldıran istənilən revanşist təşəbbüsə ən sərt şəkildə cavab veriləcək. Azərbaycana qarşı təxribat və savaşın nə ilə nəticələndiyini Hayastan əhalisi 44 günlük müharibədən yaxşı bilir. Belə cəhdlər bir də olarsa, dərhal "dəmir yumruğ"un zərbəsini hiss edəcək. Bu səbəbdən Hayastan öhdəliklərini yerinə yetirməlidir.

Elçin CƏFƏROV,

Azərbaycan.-2024.- 8 iyun, № 120.- S.7.