Dünya birliyi Ermənistanın mina terroruna adekvat cavab verməlidir

"Otuzillik işğal dövründə ağlasığmaz hərbi cinayətlər törədən Ermənistan ölkəmizi mina terroruna da məruz qoyub. Nəticədə Qarabağ və Şərqi Zəngəzurun böyük hissəsi mina və partlamamış sursartlarla çirkləndirilib. Lakin İrəvan hələ də öhdəliklərinə əməl etmir və düzgün mina xəritələrini Azərbaycana təhvil vermir. Ərazilərimizdə kütləvi şəkildə yerləşdirilmiş mina və digər partlayıcı qurğular Qarabağ və Şərqi Zəngəzurun bərpa və yenidənqurma işlərinin həyata keçirilməsinə əngəl yaradır".

Bu fikirləri "Azərbaycan" qəzetinə açıqlamasında Milli Məclisin deputatı Müşfiq Cəfərov deyib. Deputat bildirib ki, ölkəmizdə təxminən bir həftə əvvəl keçirilən 3-cü beynəlxalq humanitar minatəmizləmə konfransında ərazilərimizin ermənilər tərəfindən minalanması ilə bağlı vacib müzakirələr aparılıb: "Konfransda 75 ölkədən 300-dən çox nümayəndə iştirak edib. İştirakçılar arasında bir sıra ölkələrin yüksəkvəzifəli şəxsləri, BMT-nin baş ofisinin rəhbər heyəti, beynəlxalq təşkilatların təmsilçiləri və müxtəlif ölkələrin minatəmizləmə mərkəzlərinin rəsmiləri təmsil olunublar. Tədbirdə Azərbaycandakı mina probleminin dünyaya çatdırılması, humanitar minatəmizləmə sahəsində beynəlxalq tərəfdaşlığın gücləndirilməsi, mina və müharibənin digər partlayıcı qalıqları ilə çirklənmənin ətraf mühitə təsirini azaltmaq üçün maliyyə resurslarının səfərbər edilməsi yolları barədə müzakirələr aparılıb".

Deputat qeyd edib ki, İkinci Qarabağ müharibəsinin başa çatmasından 3 il yarım vaxt keçməsinə baxmayaraq, mina problemi hələ də qalmaqdadır: "İşğaldan azad olunmuş torpaqlarda mina qurbanlarının - ölən və yaralananların sayı artmaqda davam edir. Postmüharibə dövründə Azərbaycan ərazilərində 2020-ci ildən sonra Ermənistanda istehsal olunmuş çoxlu sayda minalar tapılıb. Bu səbəbdən, torpaqlarımız işğaldan azad olunsa da, böyük əraziləri əhatə edən sahələrə minalar basdırıldığına görə, keçmiş məcburi köçkünlərin təhlükəsiz şəkildə öz evlərinə qayıtması üçün ciddi maneələr var".

Müşfiq Cəfərovun sözlərinə görə, Ermənistanın bu çirkin siyasəti nəticəsində Azərbaycan dünyada minalar və partlamamış hərbi sursatlarla ən çox çirklənmiş ölkələr sırasında yer alıb. İşğal dövründə torpaqlarımızda 1,5 milyondan artıq mina basdırılıb. Vətən müharibəsi başa çatdıqdan sonra əksəriyyəti mülki olan 361 vətəndaşımız mina qurbanı olub, onlardan 68-i həyatını itirib, 293-ü isə ağır yaralanıb.

"Qarabağ və Şərqi Zəngəzurda ərazilərin minalardan təmizlənməsi prosesi dövlətimizin əzmkarlığı sayəsində sürətlə davam edir. Böyük Qayıdışa dair I Dövlət Proqramında ərazilərin minalardan, partlamamış hərbi sursatlardan, tərkibində partlayıcı olan qurğulardan və digər partlayıcı qalıqlardan təmizlənməsi ilə bağlı vəzifələr müəyyən edilib. Ötən il dövlət büdcəsindən ərazilərin minalardan təmizlənməsinə 110,2 milyon manat yönəldilib", - deyə müsahibimiz əlavə edib.

Müşfiq Cəfərov vurğulayıb ki, Azərbaycanın dünyada minalardan əziyyət çəkən ilk 10 ölkə arasında yer almasının səbəblərindən biri də rəsmi İrəvanın bu məsələ ilə bağlı daim qeyri-konstruktiv mövqe sərgiləməsidir: "Bu günə kimi Azərbaycana təqdim edilən mina xəritələrinin təkcə 25 faizinin doğru olması bunu deməyə əsas verir. Hesab edirəm ki, dünya ictimaiyyəti Azərbaycanın üzləşdiyi mina terroru ilə bağlı çağırışlarına adekvat cavab verməli və dəqiq mina xəritələrinin təhvil verilməsi üçün İrəvana təzyiq göstərməlidir".

N.QAFARZADƏ,

Azərbaycan.-2024.- 8 iyun, № 120.- S.8.