Avropa
Parlamentinə seçkilərdə
Makronun məğlubiyyəti
qaçılmazdır
Qoca qitənin vətəndaşlarının
milli hökumətlərdən
narazılığı səbəbindən
fəallığın aşağı
olacağı gözlənilir
Avropa İttifaqına
(Aİ) üzv olan ölkələrdə iyunun
6-da Avropa Parlamentinə
seçkilər başlayıb.
Proses iyunun 9-dək davam edəcək. Bu seçkilərin nəticələri Aİ-nin
əsas qanunverici orqanının tərkibini
müəyyən edəcək
və 2029-cu ilə qədər birliyin daxili və xarici siyasətinə təsir göstərəcək.
Seçkilərdə 720 yer uğrunda mübarizə gedir. Avropa Parlamentinin deputatlarının sayı
hər seçkidən
əvvəl müəyyən
edilir, lakin mandatların ümumi sayı 750-dən çox
olmamalıdır. Seçkilərdə
200-ə yaxın partiyanın
nümayəndəsi iştirak
edir.
İyunun 6-da Niderland
vətəndaşları, dünən
isə İrlandiya sakinləri səsvermədə
iştirak ediblər. Bu gün səsvermə
Latviya, Slovakiya və Maltada keçiriləcək. Amma
əsasən səsvermə
iyunun 9-da - "böyük
bazar" adlanan gündə baş tutacaq. Hər ölkədən olan deputatların sayı əhalinin sayından asılı olaraq 6-dan az, 96-dan çox ola bilməz. Avropa Parlamentinin məlumatına görə,
maksimal sayda deputat Almaniyanı, ən az isə
Kipr, Lüksemburq və Maltanı təmsil edəcəklər.
Mandatlar Avropa Parlamentinə seçkilərdə
iştirak edən partiyaların fraksiyaları
arasında bölüşdürülür.
"Politico"-nun son
reytinqinə görə,
onlardan ən böyüyü - sağ mərkəzçi Avropa Xalq Partiyasıdır (EPP)
172 yer (hazırda 179).
Sonrakı yerlərdə
Sosialistlərin və
Demokratların Mütərəqqi
Alyansı - 130 yerlə
(141), sağçı mühafizəkarların
"Avropa Mühafizəkarları
və İslahatçılar"
partiyası - 86 mandatla
(67), liberalların "Yenilənən
Avropa" partiyası
- 75 yerlə (101), sağçı
populistlərin "İdentiklik
və Demokratiya" -
indiki 58 əvəzinə
67 yerlə, Yaşıllar
- 41 yerlə (71) və
"Avropa solları"
- 32 yerlə (38) təmsil
olunmalıdırlar.
Müstəqil deputatların
sayı indiki 50-dən
58-ə yüksələ bilər.
Hələ heç bir
fraksiyaya daxil olmayan partiyalar 59 mandat ala bilərlər.
Ən çox
müzakirə olunan mövzulardan biri də EPP-nin
sağında yerləşən partiyaların perspektivləridir.
Onlar vahid koalisiya kimi çıxış etmirlər.
Sağçı mühafizəkar partiyaların nümayəndələri
"Avropa Mühafizəkarları və
İslahatçılar" ("İtaliyanın Baş naziri
Corca Meloninin "İtaliyanın qardaşları",
İspaniyanın Vox, Polşanın "Qanun və Ədalət"
və "İsveç Demokratları")
fraksiyasını, sağçı populistlər isə
"İdentiklik və Demokratiya" (İtaliyanın
"Şimal Liqası",
Fransadan Marin Le Penin "Milli Birliy"i, iyun ayına qədər
"Almaniya üçün Alternativ"də daxil idi)
fraksiyasını təşkil edirlər.
"Politico"nun
reytinqinə əsasən, onlar birlikdə parlamentdə 153 yer
qazana bilərlər.
Lakin may
ayının sonunda "Milli Birlik" "Almaniya
üçün Alternativ"lə əməkdaşlıqdan
imtina edib. Qarşılıqlı əlaqənin
dayandırılmasına səbəb alman partiyasından Avropa
Parlamentinin üzvü Maksimilian Kranın "la Repubblica"
qəzetində SS üzvlərinin hamısının cinayətkar
olmadığı barədə açıqlamasıdır.
Qeyd edək ki,
Fransa prezidenti Emmanuel Makron 2024-cü ilin populyarlıq
sorğularında acınacaqlı nəticələrlə
üzləşib. Bu, onu iflas dərəcəsinə gətirib
çıxarır və Avropa Parlamentinə keçirilən
seçkilərdə ifrat sağçıların qələbəsinə
imkan yaradır.
Sorğulara əsasən,
fransızların 67-68 faizinin öz prezidentləri haqqında
fikirləri "pis" və ya "çox pis"dir ki, bu
da onu bütün əsas sosial sektorlardan - qadınlardan, fəhlələrdən,
fermerlərdən və ya orta sinifdən
uzaqlaşdırıb, liberal peşələrin, kiçik və
orta biznesin təmsilçiləri, nüfuzlu biznesmenlər və
pensiyaçılar arasında dəstəyini azaldıb.
Beləliklə,
Makronun yürütdüyü siyasət və onun fəsadları
AP-yə seçkilərdə özünü göstərir
və onun partiyasının məğlubiyyətini labüd
edir.
Rusiya Elmlər
Akademiyasının Avropa İnstitutunun direktor müavini
Vladislav Belov deyir ki, "etirazçı" partiyaların, əsasən
də sağçıların daha çox mandat əldə
etmək şansı var, lakin onlar hələ effektiv
qarşılıqlı fəaliyyət sistemini inkişaf
etdirməyiblər.
Avropa Parlamentinə
seçkilərdən sonra Avropa Şurasının yeni rəhbəri
seçiləcək. O, sammit zamanı Aİ liderləri tərəfindən
səs çoxluğu ilə seçilir. Bu vəzifəni
hazırda Şarl Mişel tutur.
Avropa
Komissiyasının rəhbəri seçkiləri isə
sentyabr ayına təyin edilib. 2019-cu ildən bu vəzifəni
tutan Ursula fon der Lyayenin ən azı 361 qanunvericinin dəstəyinə
ehtiyacı var.
Ekspertlər hesab
edirlər ki, qoca qitənin vətəndaşları milli
hökumətlərdən narazı olduqları
üçün Avropa Parlamentinə seçkilərdə fəallıq
yüksək olmaya bilər.
Rizvan CƏFƏROV,
Azərbaycan.-2024.-
8 iyun, № 120.- S.5.