COP 29 Azərbaycana nə verəcək?!

Beynəlxalq toplantı ölkəmizin qlobal ekosistemə inteqrasiyasını sürətləndirəcək

"Bu gün iqlim dəyişikliyi bütövlükdə qlobal cəmiyyəti təhdid edən ən mühüm problemlərdən biri kimi qəbul edilir. Bu da bir faktdır ki, problemlə ən effektiv mübarizə heç şübhəsiz fərdlərin iqlim böhranı haqqında məlumatlandırılması və bu problemə səbəb olan faktorları minimuma endirəcək rəftar və davranışlar sərgiləmələrini stimullaşdırmaqdan ibarətdir".

Bu sözləri "Azərbaycan" qəzetinə açıqlamasında Sosial Tədqiqatlar Mərkəzinin departament müdiri Seymur Əliyev deyib. O hesab edir ki, Azərbaycan BMT-nin İqlim Dəyişmələri üzrə Çərçivə Konvensiyasının Tərəflər Konfransının 29-cu sessiyası çərçivəsində, ilk növbədə, iqlim dəyişikliyi üzrə qlobal kommunikasiyanı daha da irəli apararaq bu əsasda həm aktivizm, həm də ekodost davranış istiqamətləri üzrə yeni impulslara səbəb olacaq. Digər tərəfdən, COP29-un ölkəmizdə keçirilməsi istər ölkə imici, istərsə də "yaşıl enerji" sahəsindəki dövlət siyasəti üçün həm qlobal, həm də lokal mənada proseslərin gedişinə müsbət təsir edəcək.

Onun sözlərinə görə, beynəlxalq konfrans "yaşıl enerji" sektoruna xarici investisiyaların cəlb edilməsi ilə yanaşı, ölkəmizin alternativ enerji bazarlarına çıxış imkanları üçün də müstəsna əhəmiyyətə malikdir. İqtisadi diversifikasiya istiqaməti kimi "yaşıl iqtisadiyyat"a keçid iqtisadi inkişafı və investisiyaları artırmaq, eyni zamanda ətraf mühitin keyfiyyətini və sosial inklüzivliyi yaxşılaşdırmaq baxımından da dövlət siyasətinin iqtisadi sahədə mərkəzi determinantı kimi qiymətləndirilə bilər.

S.Əliyev qeyd edib ki, tədbirin miqyası və iştirakçıların təsir gücü baxımından konfrans "yaşıl iqtisadiyyat"a transformasiya yolunu seçmiş ölkəmiz üçün qlobal ekosistemə inteqrasiyanı daha da sürətləndirə bilər: "COP29 çərçivəsində mümkün birgə əməkdaşlıq formatları siyasət qərarvericilərinə "yaşıl maliyyə təşviqləri"nin effektivliyini təmin etmək üçün alternativ baxış fürsətləri də yaratmış olacaq. Konfrans, eyni zamanda siyasət transferləri kontekstində iqlim dəyişikliyinə yönəlik dövlət siyasətlərinin müqayisəli təhlili və təcrübə mübadiləsi baxımından da dəyərləndirilməlidir".

Əsmər QARDAŞXANOVA,

Azərbaycan.-2024.- 23 iyun, № 129.- S.7.