"Cozep Borel özünə erməni desəydi, daha yaxşı olardı"

"44 günlük Vətən müharibəsinə qədər bizə belə gəlirdi ki, Avropanın böyük dövlətləri, nüfuzlu təşkilatları Qarabağ həqiqətlərini başa düşüb və Azərbaycanı müdafiə etməyə hazırdırlar. Amma çox təəssüf ki, belə olmadı".

Milli Məclisin deputatı Anar İsgəndərov "Azərbaycan" qəzetinə açıqlamasında xatırladıb ki, ölkəmizin İkinci Qarabağ savaşındakı qələbəsindən sonra Qərb dövlətlərinin iç üzü açılıb: "Bəzi Avropa ölkələri, erməni lobbisinin əlində alətə çevrilən "diplomatlar" ermənilərdən daha çox erməni olmağa başlayıblar. Bunlardan biri də Avropa İttifaqının xarici işlər və təhlükəsizlik siyasəti üzrə ali nümayəndəsi Cozep Boreldir". Deputatın fikrincə, əslində, Borel özünə erməni desəydi, daha yaxşı olardı, çünki daha çox erməni kimi hərəkət edir.

A.İsgəndərov bildirib ki, müharibədən sonra Azərbaycan, Ermənistan və Rusiya arasında imzalanan üçtərəfli Bəyannaməyə əsasən, Ermənistan üzərinə götürdüyü öhdəlikləri yerinə yetirməli olsa da, amma bu şərtlərə riayət etmədi: "Erməni separatçıları mövqe tutduqları yerlərə həm ordu yerləşdirdilər, həm də bu əraziyə gizli yollarla silahlar gətirdilər. Borel başda olmaqla Avropa dövlətlərinin bəzi rəsmiləri bunu alqışladılar və Azərbaycanı ittiham etməyə başladılar. 2023-cü ilin sentyabrında Azərbaycan tərəfi antiterror tədbirləri həyata keçirəndən sonra separatçı yuvasını darmadağın etdi. Daha sonra Fransa başda olmaqla Avropa dövlətlərinin, eləcə də ABŞ-nin hay-həşiri dünyanı bürüdü. Amma Azərbaycan 90-cı illərin Azərbaycanı deyildi. Buna görə də Azərbaycan buna əhəmiyyət vermədi". Deputat qeyd edib ki, Avropa təşkilatlarının səsləndirdikləri "ermənilər Qarabağa geri qayıtmalıdır", "Azərbaycan tərəfindən etnik təmizləmə həyata keçirilir" kimi sərsəm fikirlər indi də C.Borel tərəfindən tez-tez təkrar edilir. Bu fikirlərdə Azərbaycan tərəfindən həbs olunan cinayətkarların, quldurların geri qaytarılmalı, ermənilərin Qarabağa qayıtması üçün şərait yaradılmalı olduğu iddia olunur.

"Əlbəttə ki, bunlar artıq keçmişdə qalıb. Artıq "Dağlıq Qarabağ" deyilən qurum yoxdur, ermənilər isə könüllü, özxoşuna bu ərazilərdən köçüb gediblər. Azərbaycan müstəqil dövlətdir və Ermənistanla sülh müqaviləsinin imzalanması üçün hər zaman əlindən gələni edir. Azərbaycan tərəfindən sülh şərtləri Ermənistana təqdim edilib. Ermənistan da bu istiqamətdə işlər görmək istəyir. Məsələn, Qazaxın dörd kəndinin geri qaytarılması və sərhədin burada təyin olunması uğurlu hadisələrdən biridir. Azərbaycan dönə-dönə təkid edir ki, digər heç kim iki dövlətin daxili işlərinə qarışmasın, bu halda məsələ yoluna qoyula bilər" -, deyə deputat bildirib.

A.İsgəndərov vurğulayıb ki, məsələyə müdaxilə edən hər bir dövlətin öz marağı var və bu maraqlar iki dövlət arasında sülh müqaviləsinin imzalanmasına mane olur: "Azərbaycan bunu açıq şəkildə dünyaya bildirir. Eyni zamanda onu da nəzərə çatdırır ki, əgər Ermənistanda revanşist düşüncələr yenidən artarsa, bunun ağır nəticələri ola bilər. Azərbaycan öz ərazi bütövlüyünü qorumaq üçün hər cür addım atacaq. Amma Azərbaycanın fikri də, istəyi də sülhdür. Avropanın hansı təşkilatının rəhbəri, üzvü Azərbaycana böhtan atırsa, demək, məqsədi bəllidir. Azərbaycan öz yolunda uğurla addımlayacaq".

Əsmər QARDAŞXANOVA,

Azərbaycan.-2024.- 23 iyun, № 129.- S.8.