Nikola Sarkozi: "Makron öz mövqeyini və ölkəsini riskə atır"

İyunun 17-də Fransada başlayan seçki kampaniyası davam edir. Növbədənkənar parlament seçkiləri (30 iyun və 7 iyul) ərəfəsində ölkədə siyasi vəziyyət daha da gərginləşib. Avropa Parlamentinə seçkilərdən sonra - iyunun 9-da Emmanuel Makronun 2022-ci ildə seçilmiş Milli Assambleyanı buraxmaq qərarı gərgin seçki kampaniyası ilə nəticələnib. Xatırladaq ki, sonuncu dəfə Milli Assambleya 1997-ci ildə respublikanın 22-ci prezidenti Jak Şirak tərəfindən buraxılmışdı.

Ölkədəki mövcud siyasi narahatlıqla əlaqədar müntəzəm olaraq sosial sorğular keçirilir. "Le Figaro", LCI və "Sud Radio" üçün dərc edilən ən son "Ifop-Fiducial" sorğusu yeni seçki dinamikasını göstərib. Sorğunun nəticələrinə görə, son onilliklər ərzində ilk dəfə seçicilərin 64 faizi səsvermədə iştirak edəcək və onların 34 faizi millətçi Milli Birlik (RN) Partiyasına səs verəcək. Solçuların birləşməsi nəticəsində yaranan Yeni Xalq Cəbhəsi (NFP) Partiyasının səslərin 29 faizini toplamaq ehtimalı var. Beynəlxalq məsələlərdə daxili fikir ayrılıqlarına və mübahisəli namizədliklərə baxmayaraq, bu koalisiya Jan-Lük Melanşonun seçicilərinin əksəriyyətini (92 faiz) cəlb edir. Avropa Parlamentinə seçkilərdə məğlubiyyətə uğramış Prezidentin "İntibah" Partiyasının isə səslərin cəmi 22 faizini toplayacağı gözlənilir.

Göründüyü kimi, fransız solçularının artan radikallaşması və onlarla mötədil sosialistlər arasında yaranan ittifaq seçkilərdə millətçi Marin Le Penin partiyasının işini asanlaşdıracaq. Beşinci Respublikanın rəhbəri etiraf edib ki, qitənin hər yerində millətçi partiyalar mövqelərini gücləndirib. Bu səbəbdən "Reuters"in qeyd etdiyi kimi, Makronun seçkilərə hazırlaşmaq üçün cəmi bir neçə həftə vaxt verməklə digər partiyaları çaşqınlığa salan planı əslində, iflasa uğraya bilər. Hətta onun düşərgəsindən olan bəzi qüvvələr növbədənkənar seçkilərin məqsədəuyğunluğuna şübhə ilə yanaşıblar. Məsələn, maliyyə naziri Brüno Le Mer etiraf edib: "Parlamentin buraxılması prezidentin qərarıdır, onun səlahiyyətidir. Ancaq mən görürəm ki, bu, fransızlar arasında geniş rahatsızlıq, anlaşılmazlıq və qəzəb doğurub. Seçicilərimiz arasında gördüyüm budur". Fransanın keçmiş prezidenti Nikola Sarkozi də "Le Journal du Dimanche" qəzetinə verdiyi müsahibədə qeyd edib ki, Makron öz mövqeyini və ölkəni riskə atır və bu addım Fransanı oradan çıxması çətin olacaq xaosa sürükləyə bilər.

Rizvan CƏFƏROV,

Azərbaycan.-2024.- 23 iyun, № 129.- S.8.