Azərbaycan qlobal enerji təhlükəsizliyinə
mühüm töhfə
verir
Azərbaycan dünyada
qlobalmiqyaslı tədbirlərə
uğurla evsahibliyi edən ölkə kimi tanınır. Ölkəmizin inkişaf etmiş infrastruktura malik olması istənilən beynəlxalq
tədbirin keçirilməsinə
imkan verir.
Noyabr ayında
BMT-nin İqlim Dəyişmələri üzrə
Çərçivə Konvensiyasının
Tərəflər Konfransının
29-cu sessiyası - COP29 kimi
mötəbər tədbirin
təşkilinin Azərbaycana
həvalə edilməsi
də bu baxımdan təsadüfi deyil.
Bu günlərdə
isə paytaxt Bakı növbəti beynəlxalq tədbirə
- Bakı Enerji Həftəsinə evsahibliyi
edir.
Xatırladaq ki,
bu tədbir Ulu Öndər Heydər Əliyevin təşəbbüsü ilə
ilk dəfə
1994-cü ildə keçirilib
və o vaxtdan bəri Azərbaycanın enerji sektoruna birbaşa xarici sərmayənin cəlb edilməsində çox vacib rol oynayıb.
İlk olaraq
"Caspian Oil&Gas" sərgisi
adlanan bu tədbir neft, qaz və energetika
sahəsində aparıcı
peşəkarların görüş
yerinə çevrilib.
İyunun 4-də Bakı
Enerji Həftəsi çərçivəsində keçirilən 29-cu Beynəlxalq
Xəzər Neft və Qaz - "Caspian Oil&Gas" və 12-ci Xəzər Beynəlxalq Energetika və Yaşıl Enerji -
"Caspian Power" sərgilərinin açılış mərasimindəki
çıxışında Prezident İlham Əliyev bildirib ki, həmin vaxtdan bəri bu tədbirin miqyası genişlənib
və artıq Bakı Enerji Həftəsi adlandırılıb.
Prezidentin dediyi kimi, Bakı Enerji Həftəsi enerji siyasətinin neft, qaz, emal,
ixrac, "yaşıl
enerji"nin seqmentlərini
əhatə edir.
İmzalanan bütün
müqavilələr tam
həyata keçirilib
Bakı Enerji Həftəsində enerji sektorundakı aktual məsələlər müzakirə
edilir. Bu platforma çərçivəsində
keçirilən tədbirlər
və konfranslar enerji sahəsində yeni əməkdaşlıqların
qurulmasına, təcrübə
mübadiləsinə və
yeni inkişaf istiqamətlərinin müəyyən
edilməsinə kömək
edir.
Özündə üç
mühüm tədbiri
birləşdirən Bakı
Enerji Həftəsi bütün dünyanın
enerji sənayesi sahəsində mövcud olan liderlərini bir araya gətirir
və bununla da diqqəti Azərbaycana yönəldir.
ABŞ Prezidenti Cozef
Bayden də Bakı Enerji Həftəsinə görə
Prezident İlham Əliyevə məktub ünvanlayıb.
Vurğulayaq ki,
bu, ABŞ Prezidentinin bir həftə ərzində Azərbaycana
göndərdiyi ikinci
təbrik məktubudur.
C.Bayden məktubunda
xüsusi qeyd edir ki, regional
sabitlik və əlaqələr Birləşmiş
Ştatlar üçün
prioritet məsələlərdir.
Onilliklərlə davam
etmiş münaqişəyə
son qoyacaq möhkəm və ləyaqətli sülh sazişi Cənubi Qafqazı transformasiya edəcək və Azərbaycanın regiondakı
rolunu fundamental şəkildə dəyişəcək:
"Birləşmiş Ştatlar
bu nəcib iddianı dəstəkləməyə
hazırdır. Biz sülh və firavanlığın təmin
edilməsinin əsas prinsiplər olaraq qəbul olunmasını gələcək nəsillərə
borcluyuq".
Baydenin bu məktubu bir neçə müddətdir
Azərbaycan ABŞ əlaqələrinin
pozulduğunu iddia edən qərəzli qüvvələrə, bununla
bağlı yalanlar tirajlayan erməni lobbisinə tutarlı cavabdır. Əgər
ABŞ bundan sonra da Azərbaycan ilə Ermənistan münasibətlərində neytrallığını
qorusa, ölkələrimiz
arasındakı əlaqələr
daha da inkişaf
edər.
Onu da qeyd edək ki, Bakı Enerji
Həftəsi dünyada
çox nadir enerji toplantısıdır
ki, ABŞ Prezidenti təbrik ünvanlayıb.
Bu, həm də Azərbaycanın qlobal enerji təhlükəsizliyi
üçün mühüm
təşəbbüslərinə göstərilən etimadın
təzahürüdür.
Sərgi və
forum iştirakçılarına
Böyük Britaniya və Türkiyənin dövlət başçılarından
da təbrik məktubları göndərilib.
Bakı Enerji Həftəsinə bu cür beynəlxalq səviyyəli maraq həm də ölkəmizin güvənli,
etibarlı tərəfdaş
olduğunun əyani sübutudur. Tədbirin açılışında Prezident
İlham Əliyev də məhz bu məqamı xüsusi vurğuladı:
"Bizim vədlərimiz
imzamız qədər
dəyərlidir. Son
30 il ərzində imzalanan bütün müqavilələr tam həyata keçirilib, onlar parlament səviyyəsində ratifikasiya
edilib və qanun şəklində imzalanıb. Yəni həmin müqavilələrin
bir sözü, bir ifadəsi belə dəyişdirilməyib.
Məhz buna görə də biz daha bir
sürətli inkişafı
görürük - "yaşıl
enerji" və bərpaolunan enerji resurslarının istehsalı".
Növbəti qlobal
tədbirə evsahibliyi
Budəfəki Bakı
Enerji Həftəsi bir sıra əlamətdar
hadisələrə təsadüf
etməsi ilə də diqqət çəkir. Belə ki, bu il
Azərbaycanın enerji
strategiyasının müəllifi,
Ulu Öndər Heydər Əliyevin qətiyyəti ilə
"Əsrin müqaviləsi"nin
imzalanmasının 30-cu ili
tamam olur. Bu əlamətdar hadisə Bakı Enerji Həftəsinin proqramında da əksini tapıb.
Həmçinin bu
il Beynəlxalq Xəzər Neft və Qaz "Caspian Oil&Gas" sərgisinin
təsis edilməsindən
30 il ötür. Ötən 30 il ərzində Azərbaycanda
enerji sahəsi üzrə mühüm nailiyyətlər əldə
edilib və ölkəmizin təşəbbüsü
və iştirakı ilə regionda qlobal enerji layihələri
həyata keçirilib.
Buna görədir ki, hazırda Azərbaycan Avropanın enerji təhlükəsizliyində
başlıca rola malikdir.
Açılış mərasimində "Avropa
Komissiyası Azərbaycanı
ümumavropa qaz təchizatçısı adlandırır.
Yəni bu gün qazımızı idxal edən 8 ölkədən 6-sı Avropa
ölkəsidir", - deyən
Prezident İlham Əliyev onu da bildirib ki,
təchizatımızın coğrafiyası bundan sonra da genişlənəcək.
Qeyd edək ki, Bakı Enerji
Həftəsində 37 ölkədən
300-dək şirkət iştirak
edir. İsveç, Hindistan və Sloveniyadan olan şirkətlər isə
ilk dəfədir ki, bu tədbirə
qatılırlar. Builki
sərginin tərkibi iştirakçıların ümumi
sayının 15 faizini
təşkil edən yeni şirkətlər hesabına yenilənib. Onların əksəriyyəti
Azərbaycanın "yaşıl
enerji" sahəsinə
yüksək maraq göstərən xarici iştirakçılardır.
Göründüyü kimi, Bakı Enerji Həftəsinin timsalında Azərbaycan növbəti qlobal tədbirə uğurlu evsahibliyi edir. Dünyanın dörd bir yanından mötəbər qonaqların
Bakıya üz tutaraq qlobal enerji məsələlərini
müzakirə etməsi
həm də Azərbaycanın bu sahədə aparıcı
ölkə olaraq qlobal enerji təhlükəsizliyinə
verdiyi töhfələri
bir daha nümayiş etdirir.
Yasəmən MUSAYEVA,
Azərbaycan.-2024.-5
iyun, № 117.- S.10.