Fransa Cənubi Qafqaza girmək üçün Ermənistanı silahlandırır

Amma Paris bu məkrli məqsədinə çata bilməyəcək

Keçmiş Qarabağ münaqişəsinin həlli üçün Azərbaycan 30 ilə yaxın danışıqlar apardı. Amma bu danışıqlardan uğurlu bir nəticə hasil olmadı. Çünki Ermənistan müxtəlif bəhanələrlə danışıqlardan yayınır, münaqişənin ömrünü uzatmağa çalışırdı. Bununla da nəsə bir uğur əldə edəcəyinə ümid bəsləyirdi. 30 ilə yaxın davam edən Qarabağ münaqişəsini, nəhayət, Azərbaycan Ordusu Müzəffər Ali Baş Komandan İlham Əliyevin rəhbərliyi altında 44 günə həll etdi.

Ölkəmiz üçün böyük uğurla yekunlaşan İkinci Qarabağ müharibəsindən sonra Ermənistanla Azərbaycan arasında sülh müqaviləsi imzalanması istiqamətində danışıqlar aparılmağa başlandı. Lakin Ermənistan yenə də əvvəlki ssenariyə uyğun olaraq müxtəlif bəhanələr uyduraraq sülh müqaviləsinin imzalanmasından yayınır. Xam xəyallarla yaşayaraq yenə də bölgədə gərginlik yaratmaq istəyir, sərsəm-sərsəm bəyanatlar verir. Fransadan, Hindistandan və başqa ölkələrdən silah alır. Bəri başdan deyək ki, sonda uduzan tərəf sülh müqaviləsinin imzalanmasını ləngidən Ermənistan olacaq. Çünki Ermənistan nə qədər silah alırsa-alsın, güclü, qüdrətli, dünyada söz sahibi olan Azərbaycanın qarşısında dayana bilməz.

Heç kimə sirr deyil ki, Ermənistan bu addımları özbaşına atmır. Fransa və başqa ölkələr bunu ona məcbur edir. Rəsmi Paris Cənubi Qafqaz regionunda gizli planlarını həyata keçirmək üçün vəziyyəti gərginləşdirir, Ermənistanı silahlandırır. Bunu da bütün dünya görür, amma susur. Ermənistanın baş naziri Nikol Paşinyanın Fransaya səfəri və burada Prezident Emmanuel Makronla görüşməsi, verilən açıqlamalar, gözlənildiyi kimi, bölgədə sülhə xidmət etmir. Əksinə, iki ölkə arasındakı vəziyyəti daha da gərginləşdirir.

Həm görüş vaxtı, həm də görüşdən sonra Fransa Prezidenti Makronun səsləndirdiyi fikirlər arasında ötən il sentyabrın sonlarında Qarabağ iqtisadi rayonundan ermənilərin könüllü köçü ilə bağlı məsələ diqqəti daha çox cəlb edir. Hansı ki, həmin hadisə Fransanın bölgədə oynadığı pozucu siyasətin, Ermənistanı qızışdırmasının nəticəsi olaraq meydana çıxmışdı. Fransa 2020-ci ildən bəri Ermənistanın Azərbaycanla sülhə gəlməsinə müxtəlif yollarla əngəl törədir. Rusiyanı Cənubi Qafqazdan sıxışdıraraq burada möhkəmlənmək üçün daim İrəvanı qızışdırır, həm də silahlandırır.

Fransa Prezidentinin Qarabağ ermənilərinin qayıtmasıyla bağlı fikirlərindən onun ermənilərdən daha çox erməni olmağa çalışdığı aydın görünür. Demək olar ki, bu mövzu siyasi gündəmdən çıxıb. Amma Fransa Cənubi Qafqaz planlarını həyata keçirmək üçün bunu əlində bəhanə edərək regionda gərginlik yaratmağa çalışır.

Paşinyanın Paris səfərinin davam etdiyi günlərdə Fransanın Ermənistana yeni silah-sursat göndərəcəyinə dair yayılan məlumat tüstülənən ocağa yanacaq atmağa bənzəyir. Ölkənin "Le Figaro" qəzeti yazıb ki, Fransa Ermənistana yeni silah partiyası göndərəcək. Nəşrin yazdığına görə, Fransanın "Ground Master" (GM200) radarları, gecəgörmə cihazları və durbinlər Ermənistana yola salınacaq. Məlumatda o da qeyd olunur ki, tərəflər arasında imzalanan müdafiə sahəsində əməkdaşlıq haqqında anlaşma memorandumunda Fransa ordusunun bu il erməni hərbi qulluqçular üçün dağlıq şəraitdə döyüş hazırlığı kursu keçirməsi də nəzərdə tutulur.

Heç ermənilərin özləri də Fransanın göndərdiyi silahlara o qədər güvənmirlər. Ermənistan mediasında bu barədə müxtəlif fikir və rəylər yazılır. "Şərəf duyuram" parlament fraksiyasının katibi Tiqran Abramyan çıxışı zamanı bu barədə danışıb. Revanşist siyasətçi Fransadan gətirilən silahların Ermənistan ordusunun döyüş qabiliyyətini artıra biləcəyinə şübhə ilə yanaşıb. O deyib ki, düzdür, fransız silahları əlbəttə ki, müasirdir. Amma problem ondadır ki, onların bizdəki sistemlərlə nə dərəcədə uyğunlaşdığını anlamaq lazımdır. Onun sözlərinə görə, radarlar və hava hücumundan müdafiə sistemləri əsasən müxtəlif situasiyalarda bir-biri ilə əlaqəli fəaliyyət göstərir, əlaqələndirilmiş hərəkətlərin olmaması heç bir halda effektivliyi təmin etməyəcək.

Fransanın göstərişlərinə qul kimi boyun əyən Ermənistan Azərbaycanla sərhəddə yeni təxribat hazırlamaq istəyir. Təbii ki, bu, Fransanın sifarişidir. Amma bu, baş verərsə, Ermənistan çox ciddi zərbə altına düşəcək. Belə olan halda ermənilərin mövqeləri Azərbaycan Ordusu tərəfindən tamamilə darmadağın ediləcək. Prezident İlham Əliyev 2024-cü il yanvar ayının 10-da yerli televiziya kanallarına müsahibəsində bunu bir daha bəyan edərək demişdir: "Ermənistan da bilməlidir, o, nə qədər silah alsa da, onlara nə qədər ürək-dirək versələr də, əgər bizə qarşı hər hansı bir təhlükə mənbəyi olsa, biz dərhal o təhlükə mənbəyini məhv edəcəyik. Mən bunu gizlətmirəm ki, sabah heç kim deməsin nəsə gözlənilməz oldu. Qoy eşidən eşitsin ki, biz görsək, bizə qarşı real təhlükə, o Fransanın sınıq-salxaq "Bastion" maşınları, o konserv bankaları yox, real təhlükə yaransa, biz preventiv addımlarla o təhlükəni istənilən nöqtədə məhv edəcəyik".

Fransa hökuməti ümid edir ki, Ermənistanı silahlandırmaqla bölgədə gərginlik yaradacaq və bundan istifadə edib çirkin məqsədini həyata keçirəcək. Amma Fransa da, Ermənistan da anlamalıdır ki, atdıqları bu addımlarla heç nəyə nail ola bilməyəcəklər. Çünki Azərbaycan öz ərazilərini istənilən təcavüzdən qorumağa qadirdir. Ölkəmizin 44 günlük Vətən müharibəsindən qalib çıxmış və sonrakı müddətdə daha da güclənmiş qüdrətli ordusu var.

Vahid MƏHƏRRƏMOV,

Azərbaycan.-2024.- 1 mart, № 47.- S.4.