Azərbaycandan keçən nəqliyyat marşrutlarına maraq artır

Avropanın iri şirkətlərinin ölkəmizlə əlaqələri genişlənir

Azərbaycan dünyanın mühüm nəqliyyat marşrutlarının keçdiyi ölkə kimi əhəmiyyətini getdikcə artırır. Bu da təsadüfi deyil - dünyanın dörd tərəfinə gedən yollar ölkəmizdə qovuşur. O üzdən "Şərq-Qərb", "Şimal-Cənub" nəqliyyat marşrutları üzərində yerləşən ölkəmizin gələcəkdə beynəlxalq nəqliyyat qovşağı olaraq dünya ticarətinin sürətlənməsinə müsbət təsir göstərəcəyi şübhəsizdir.

Bəzi məlum siyasətçilər ölkəmizə qarşı nə qədər qərəzli mövqe tutsalar da, hər hesab kitabını yaxşı bilən biznes dairələri ölkəmizlə əlaqələr qurmağa, birlikdə yeni layihələr həyata keçirməyə üstünlük verirlər. Bu baxımdan Alman İqtisadiyyatının Şərq Komitəsinin sədri Mixael Harmsın rəhbərlik etdiyi nümayəndə heyətinin Bakıda Prezident İlham Əliyev tərəfindən qəbul olunması çox mətləbdən xəbər verir. İlk növbədə ondan soraq verir ki, son zamanlar Almaniyanın bəzi siyasətçilərinin Fransa Prezidenti E.Makrona qoşulub ölkəmizin əleyhinə bəyanatlar verməsi alman biznes dairələri tərəfindən ciddi qəbul olunmur. Yeri gəlmişkən, qeyd edək ki, ölkəmizə səfər edən qurum Almaniyada ən iri şirkətləri özündə birləşdirir və ölkələrində ciddi söz sahibidir.

Dövlətimizin başçısı ilə görüş zamanı Almaniya tərəfi açıq şəkildə bildirdi ki, onların ölkəmizə səfərinin əsas məqsədi Azərbaycanla biznes əlaqələrini genişləndirməkdir. Məlumdur ki, alman iş adamları dünyada investisiya qoyuluşunda yüksək həssaslıq göstərmələri ilə seçilirlər. O səbəbdən onların bu səfərini ölkəmizə olan inamın göstəricisi kimi də qəbul etmək mümkündür.

Alman şirkətləri ölkəmizin beynəlxalq nəqliyyat marşrutundakı önəmini düzgün qiymətləndirir. Ona görə də Almaniyadan gələn 10 nüfuzlu şirkətin nümayəndələrinin "Bakı Beynəlxalq Dəniz Ticarəti Limanı" QSC-də investisiya və əməkdaşlıq imkanlarını müzakirə etmələrini sıradan maraq kimi qiymətləndirmək düzgün olmazdı. Məlumata görə, Bakı limanında keçirilən görüşə Almaniyanın Şərqi Biznes Assosiasiyasının təşkilatçılığı ilə "Knauf lnternational", "Falk Beratung", "VNG", "Edison Technologies", "Rhenus", "Gerber Architekten", "HHLA lnternational", "ATLAS International", "Kranich Design" ve "Marburger Tapatenfabrik" kimi şirkətlərin nümayəndələri qatılıblar. Tədbirə Almaniya Şərqi Biznes Assosiasiyasının icraçı direktoru Mixael Harms rəhbərlik edib. Tərəflər görüş zamanı Bakı limanının tarixi, infrastruktur layihələri, Orta dəhlizin inkişafındakı rolunu müzakirə etdikdən sonra terminallardakı iş prosesi ilə tanış olublar.

Xatırladaq ki, Bakı Beynəlxalq Dəniz Ticarət Limanı 1902-ci ildən fəaliyyət göstərən Bakı limanının bazasında 2015-ci ildə yaradılıb. Liman yük, neft və bərə terminallarından ibarətdir. 2018-ci il mayın 18-də Prezident İlham Əliyevin iştirakı ilə açılışı olmuş yeni Bakı limanının 1-ci fazada yükaşırma potensialı 15 milyon ton, o cümlədən 100 min TEU konteyner təşkil edir. İkinci fazanın yekunlaşmasından sonra Bakı limanından ildə 25 milyon tona qədər yük aşırılacaq, 500 min TEU konteyner keçə biləcək.

Məlum olduğu kimi, Rusiya-Ukrayna müharibəsi şimal qonşumuzu dünya bazarına çıxan mühüm nəqliyyat marşrutundan məhrum etmişdir. Bu üzdən Rusiya vəziyyətdən çıxış yolu kimi "Şimal-Cənub" nəqliyyat marşrutuna üstünlük verir. Hətta o, marşrutun cənub istiqamətindəki imkanlarını genişləndirmək üçün İranda çəkiləcək dəmir yolunun maliyyələşməsini öz üzərinə götürüb.

Bu ərəfədə Azərbaycanı Baş nazirinin müavini Şahin Mustafayev Mineralnıye Vodıda keçirilən XII Rusiya-Azərbaycan regionlararası forumunda bildirib ki, "Şimal-Cənub" Beynəlxalq Nəqliyyat Dəhlizi ilə yükdaşımaların həcmi təxminən 17 faiz artıb. Ş.Mustafayev həmçinin qeyd edib ki, bu dəhliz ötən il Rusiya və Azərbaycan əraziləri vasitəsilə Cənubi Asiyadan Avropaya yüklərin daşınması üçün optimal imkanların yaradılmasına yönəlib. O, həmçinin ölkələrimiz arasında ikitərəfli yükdaşımaların ümumi həcminin 11 faizdən çox artdığını bildirib, inkişaf edən nəqliyyat və tranzit daşımalarından danışıb.

Rüstəm KAMAL,

Azərbaycan.-2024.- 1 mart, № 47.- S.8.