Haluk Görgün: Azərbaycan hər il Antalya Diplomatiya Forumunda yüksək səviyyədə təmsil olunur

Azərbaycan hər il Antalya Diplomatiya Forumunda yüksək səviyyədə təmsil olunur. İstər nazirlər səviyyəsində, istərsə də QHT-lər tərəfindən Azərbaycan bu tədbirə çox böyük maraq göstərir.

AZƏRTAC xəbər verir ki, bu fikirləri Türkiyə Müdafiə Sənayesi Agentliyinin prezidenti Haluk Görgün Azərbaycan media nümayəndələrinə açıqlamasında söyləyib.

Azərbaycanın xarici işlər naziri Ceyhun Bayramovla görüşü haqqında danışan nazir bildirib ki, söhbət zamanı ölkələrimiz arasında müdafiə sənayesi sahəsi üzrə davam edən proseslər və gələcək fəaliyyətlər müzakirə olunub.

Türkiyənin yerli beşinci nəsil KAAN təyyarəsinin ilk uğurlu uçuşu barədə fikrini bildirən Haluk Görgün deyib: “Təbii ki, təyyarəmizin bundan sonra bir çox uçuşu olacaq. Türkiyə dünyada beşinci nəsil təyyarə istehsal edən ölkələrdən biridir. Təbii ki, müdafiə sənayemizin bu səviyyəyə yüksəlməsi son 20 ildə Prezidentimizin ortaya qoyduğu böyük iradə, bizə verdiyi dəstək və motivasiya ilə mümkün oldu. Prezidentimiz hər zaman türk mühəndisinə, türk gəncinə inamını ifadə etdi və bizim üçün bütün imkanları yaratdı. 2028-ci ildə təyyarəmizin kütləvi istehsalına başlamağı planlaşdırırıq. Türkiyə, sadəcə, havada deyil, quru və dənizdə bir çox məhsulu istehsal edən ölkə mövqeyinə gəlib çatıb. Hazırda 40-dan çox ölkəyə PUA-larımız, 45-dən artıq ölkəyə zirehli texnikalarımız ixrac olunur. Ən azı ondan çox ölkəyə hərbi gəmilər, qayıq ixrac etmişik”.

Azərbaycan.-2024.- 2 mart, № 48.- S.6.