Almaniya ölkəmizlə münasibətlərin inkişaf etdirilməsinin vacibliyini anlayır

"Almaniyanın aparıcı şirkət rəhbərlərindən ibarət heyətin Azərbaycana səfəri Prezident İlham Əliyevin yürütdüyü daxili və xarici siyasət sayəsində ölkəmizin dünyadakı nüfuzunun durmadan artığını sübut edir. Bu, həmçinin ölkəmizə artan marağın miqyasından və iqtisadi gündəliyin zənginliyindən xəbər verir".

Bu fikirləri qəzetimizə açıqlamasında Milli Məclisin deputatı Kamilə Əliyeva deyib. Deputat söyləyib ki, Azərbaycan dünyada iqtisadiyyatı sürətlə inkişaf edən dövlətlərdəndir: "Cənubi Qafqaz iqtisadiyyatının 70 faizinin cəmləşdiyi Azərbaycanda xarici şirkətlərin fəaliyyət göstərmələri üçün geniş imkanlar yaradılıb. Torpaqlarımız işğaldan azad edildikdən sonra siyasi sahədə olduğu kimi, iqtisadiyyatımızda da böyük uğurlar qazanılıb. Bu gün bir çox Avropa dövləti Azərbaycanın dost və tərəfdaş ölkə olduğunu vurğulayırlar".

Bütün bunlara baxmayaraq, son dövrlər Azərbaycanla siyasi və iqtisadi əlaqələri ürəkaçan olmayan dövlətlərdən birinin də Almaniya olduğunu vurğulayan Kamilə Əliyeva deyib: "Lakin çox keçmədi ki, Almaniyanın siyasi dairələri Azərbaycanla münasibətlərin həm siyasi, həm də iqtisadi sahələrdə normallaşmasının və inkişaf etdirilməsinin lazım olduğunu başa düşdülər. Almaniya Azərbaycanın Avropanın enerji təhlükəsizliyindəki mühüm rolunu qəbul edir. Onu da unutmaq olmaz ki, Almaniya Avropa İttifaqına daxil olan ölkələr arasında iqtisadi cəhətdən inkişaf etmiş ən qabaqcıl dövlətlərdəndir. Həmçinin Almaniya Aİ-nin iqtisadi siyasətini müəyyənləşdirir".

Kamilə Əliyeva qeyd edib ki, Almaniyanın geniş tərkibdə aparıcı şirkət rəhbərlərindən ibarət heyətinin Azərbaycana səfəri ölkəmizə artan marağın bariz nümunəsidir: "Prezident İlham Əliyevin Alman İqtisadiyatının Şərq Komitəsinin sədrinin rəhbərlik etdiyi nümayəndə heyətini qəbul etməsi iki ölkə arasında iqtisadi əlaqələrin yeni mərhələyə qədəm qoyduğunu göstərir. Almaniya şirkətləri enerji sektoru ilə yanaşı, iqtisadiyyatın digər sahələrində də ölkəmizlə əməkdaşlıq etməyə böyük maraq göstərir və bunun üçün yaxşı imkanların olduğunu qeyd edirlər. Bu ölkə siyasi sahədə də Azərbaycanla əlaqələri yaxşılaşdırmağa üstünlük verir".

Deputat həmçinin Münxen Təhlükəsizlik Konfransında Almaniya Kansleri Şoltsun vasitəçiliyi ilə Azərbaycan Prezidenti İlham Əliyevlə Ermənistanın baş naziri Paşinyan arasında keçirilən görüşdə Almaniyanın neytral mövqe nümayiş etdirdiyini bildirib. Qeyd edib ki, Münxendə Azərbaycan və Ermənistan xarici işlər nazirlərinin sülh müqaviləsinin müzakirəsi üçün Berlində bir araya gəlmələri barədə razılıq əldə edilməsi də bu neytral mövqenin təsdiqidi. "Fevralın 28-də əvvəlcə Almaniyanın xarici işlər naziri Annalena Berbokun iştirakı ilə Azərbaycanın xarici işlər naziri Ceyhun Bayramovla Ermənistan xarici işlər naziri Mirzoyan arasında, daha sonra isə azərbaycanlı və erməni həmkarların ikilikdə görüşü keçirildi. Ardınca isə Almaniyanın xarici işlər naziri hər iki həmkarı ilə təkbətək görüşdü. Görüşlərdən sonra verilən açıqlamalarda müzakirələrin müsbət istiqamətdə getdiyi vurğulandı. Biz yenə də Almaniyanın neytral mövqedən çıxış etdiyinin, Azərbaycanla Ermənistan arasında münasibətlərin normallaşmasına çalışdığının şahidi olduq. Berlində Almaniyanın vasitəçiliyi ilə baş tutan bu görüşlər Azərbaycanla Ermənistan arasında sülh sazişinin imzalanması istiqamətində mühüm addım olacağına ümid edirik", - deyə müsahibimiz vurğuladı.

Kamilə Əliyeva xatırladıb ki, Prezident İlham Əliyevin şirkət rəhbərləri ilə görüşündə Almaniyanın Azərbaycandakı səfirinə AŞPA-dakı almaniyalı deputatın ölkəmizə qarşı qəbul edilmiş qərəzli qərarın müəlliflərindən biri olması barədə öz iradlarını çatdırması mühüm əhəmiyyətə malikdir. AŞPA-da ölkəmizə qarşı çıxış edən deputatın Almaniyada hakimiyyətdə olan partiyanın üzvü olması da xüsusi vurğulandı. Güman edirik ki, Almaniyanın hakim partiyası bu istiqamətdə müəyyən işlər görəcək. AŞPA-ya gəlincə, bu qurum Azərbaycana qarşı düşmən mövqedən əl çəkmədiyi təqdirdə ölkəmiz bu təşkilatla əməkdaşlığa yenidən baxacaq və bu cür davam edərsə, AŞPA-nı tərk edəcək.

"Dövlət başçısı Almaniya mətbuatında Azərbaycana qarşı qarayaxma kampaniyasının aparıldığını da səfirin diqqətinə çatdırdı. Sözsüz ki, ölkəmizin beynəlxalq aləmdə nüfuzuna xələl gətirməyə hesablanmış bu cür yalan məlumatlar qəbuledilməzdir. Bu, erməni lobbisi və onların Qərbdəki havadarlarının Azərbaycana qarşı yönəlmiş düşmənçilik siyasətinin bir parçasıdır", - deyə deputat qeyd edib.

Müsahibimiz yekunda Azərbaycanın bir dövlət və xalq olaraq yenilməz gücünə diqqət çəkib. Vurğulayıb ki, ölkəmiz Cənubi Qafqaz regionunda siyasi, iqtisadi və hərbi sahələrdə ən güclü olan və beynəlxalq aləmdə böyük nüfuza malik dövlətdir: "Müasir dünyamızda iqtisadi və siyasi cəhətdən sürətlə inkişaf edən Azərbaycanla əlaqələr qurmaq istənilən ölkəyə üstünlüklər bəxş edər. Çünki Azərbaycanın xarici siyasətinin əsas prioriteti bütün dövlətlərlə dost və səmimi münasibətlər qurmaq və sülh şəraitində yaşamaqdır".

Nəzrin QAFARZADƏ,

Azərbaycan.-2024.- 2 mart, № 48.- S.9.