Prezident İlham Əliyev "yaşıl enerji" ilə bağlı önəmli mesajlar verdi

Yaşıl dünya naminə həmrəylik ili 2024

"Azərbaycan bu gün beynəlxalq aləmdə qazandığı nüfuzu, iqtisadi inkişafı, düşmən üzərində əldə etdiyi tarixi qələbəsi, dünyada sülh, demokratiya, azadlıq uğrunda mübarizəsi, bəşəriyyətə qarşı humanist davranışları ilə diqqət mərkəzindədir.

Prezident İlham Əliyev dünya ölkələri ilə qarşılıqlı əməkdaşlığa, xalqlar arasında münasibətlərin yaxınlaşdırılmasına və yaxşılaşdırılmasına, dövlətlərin suverenliyinin və müstəqilliyinin qorunmasına böyük önəm verir".

Bu sözləri Milli Məclisin Aqrar siyasət komitəsinin sədri Tahir Rzayev "Azərbaycan" qəzetinə açıqlamasında deyib. Onun fikrincə, dövlət başçısı beynəlxalq aləmdə baş verənləri qiymətləndirməklə yanaşı, haqqın, ədalətin qarantı kimi çıxış edir. Bir çox beynəlxalq təşkilatların, böyük dövlətlərin sülhün, insan haqlarının müdafiəsi sahəsində tutduqları ikili mövqe Prezident İlham Əliyevin kəskin, barışmaz mövqeyi ilə üzləşir. Sözsüz ki, bu, sülhsevər bəşəriyyət tərəfindən rəğbətlə qarşılanır. Çünki xalqımız 30 il bu haqsızlıqdan əziyyət çəkib, torpaqlarımız erməni təcavüzkarlarının işğalı altında qalıb, şəhər və kəndlərimiz dağıdılıb. Təəssüf ki, beynəlxalq təşkilatlar, dünyanın ABŞ, Fransa, Almaniya kimi dövlətləri bu işğala vaxtında münasibət bildirməyib, əksinə, çox vaxt təcavüzkarların tərəfində olublar.

Dünyanın, BMT-nin görə bilmədiyi və görmək istəmədiyi vəzifəni Azərbaycanın həyata keçirtdiyini deyən komitə sədri bildirib ki, nəticədə düşmən məhv edilərək torpaqlarımızdan çıxarılıb. Bu qələbə Prezident İlham Əliyevi dünyada cəsarətli, uzaqgörən, xalqına arxalanan və insanların sarsılmaz birliyinə nail olan bir rəhbər, ordumuzu yenilməz, mübariz bir qüvvə, azərbaycanlıları öz torpaqları uğrunda canlarından belə keçməyə hazır, həm də düşməni əzməyi bacaran bir xalq kimi tanıdıb. Azərbaycan yalnız döyüş meydanında deyil, iqtisadi, sosial sahədə, dinc quruculuq işlərində də qalibdir. Ölkəmiz bu gün çox vacib və dövlətlərin gələcəyi üçün əhəmiyyət kəsb edən tədbirlərə evsahibliyi edir. "Azərbaycan etibarlı tərəfdaş olduğunu artıq sübut edib. Bizim sözümüz imzamız qədər dəyərlidir. Əminəm ki, qarşımıza qoyduğumuz bütün planlar həyata keçiriləcəkdir, çünki təkcə keçən ilin göstəriciləri bunun sübutudur". Bu sözləri Prezident İlham Əliyev "Cənub Qaz Dəhlizi" Məşvərət Şurası çərçivəsində nazirlərin 10-cu və "Yaşıl Enerji" Məşvərət Şurası çərçivəsində nazirlərin 2-ci iclasları zamanı deyib, həmçinin "Euronews" televiziyasına müsahibəsində dünya ölkələrini mövcud problemləri birlikdə həll etməyə çağırıb".

T.Rzayev qeyd edib ki, Azərbaycan bu gün Avropanın enerji təhlükəsizliyinin təmin olunmasında mühüm rola malikdir. Ölkəmiz dünyanın 8 dövlətinə qaz nəql edir ki, onların da 6-sı Avropa dövlətləridir. Avropada istifadəyə verilmiş İnterkonnektor layihəsinin təməlində, ilk növbədə, "Cənub qaz dəhlizi" dayanır. On il bundan əvvəlin təşəbbüsü, uzunluğu 3500 km olan kəmər artıq reallaşıb və nəticəsi uğurludur.

Komitə sədri vurğulayıb ki, Azərbaycanın qaz ehtiyatları yeni, mühüm layihələrin həyata keçirilməsinə imkan verəcək: "Prezident İlham Əliyev çıxışında iqlim dəyişikliklərinin dünyada yaratdığı fəsadlara diqqəti cəlb edərək bildirdi ki, bunlar dünya dövlətlərinin birliyi nəticəsində aradan qaldırıla bilər. Bu sözləri deyərkən dövlət başçımız Bakıda keçiriləcək COP29-u nəzərdə tutaraq tədbirin əhəmiyyətli olacağına inamını ifadə etdi. Ölkə rəhbəri dedi ki, iqlim dəyişikliyi ilə bağlı olan qlobal tədbirlərə evsahibliyi etmək istəyimizin olması faktı iradəmizi nümayiş etdirir. COP29 bizim "yaşıl enerji" gündəliyimizin, məsuliyyət hissimizin bir hissəsini təşkil edir. "Yaşıl enerji"yə keçiddə hər bir dövlət öz vəzifəsini, məsuliyyətini bilməlidir".

T.Rzayevin fikrincə, dövlət başçısının çıxışı həm də müəyyən ölkələrə müraciət xarakteri daşıyırdı. Əldə etdiyimiz gəlirlərdən bərpaolunan enerjiyə sərmayə yatırtmaqla bu sahəyə töhfə verməyin önəmi diqqətə çatdırıldı. Azərbaycan bərpaolunan enerji layihələrinin həyata keçirilməsində maraqlı və iddialıdır.

Prezident İlham Əliyevin çıxışı, müəyyənləşdirdiyi vəzifələr milli maraqlarımızı ifadə etməklə yanaşı, dünya ölkələri üçün iqtisadiyyatın inkişafı, əlaqələrin möhkəmləndirilməsi, normal həyatın təmin edilməsi baxımından da dəyərlidir. Bu, Azərbaycan Prezidentinin bəşəri dəyərlərə sadiqliyini, insanlığa, sülhə, əməkdaşlığa sağlam münasibətini bir daha nümayiş etdirir.

Ə.QARDAŞXANOVA,

Azərbaycan.-2024.- 5 mart, № 50.- S.6.