Qərbin qərəzi və ikili standartları fiaskoya məhkumdur

Azərbaycan 44 günlük Vətən müharibəsinin, eləcə də 23 saatlıq antiterror tədbirlərinin yaratdığı reallıqlarla heç cür barışa bilməyən bəzi ikilistandartlı Qərb siyasi mərkəzlərinin aqressiyası və qərəzi ilə üz-üzə qalıb.

İslamofobiyadan, türkofobiyadan qurtula bilməyən Avropa ölkə və qurumları ard-arda Azərbaycana qarşı siyasi, diplomatik təzyiqlərə başlayıb, qarayaxma kampaniyasına start veriblər. Müstəmləkəçi Fransa isə bunlarla yanaşı, ölkəmizə qarşı hələ də ərazi iddiası güdən təcavüzkar Ermənistanı silahlandıraraq hərbi təxribatlar törədir, bölgədə sülh üçün yaranan bütün imkanlara qarşı çıxaraq körpüləri yandırır.

Martın 4-də Prezident İlham Əliyev Bolqarıstan Xalq Məclisinin Sədri Rosen Dimitrov Jelyazkovu qəbul etdiyi zaman baş verənlərlə bağlı bildirdi ki, Azərbaycan beynəlxalq hüququn prinsiplərinə uyğun olaraq öz ərazi bütövlüyünü və suverenliyini tam bərpa edib. Bundan sonra bir sıra Avropa təsisatları tərəfindən Azərbaycana qarşı genişmiqyaslı kampaniya başlanıb və bu, qərəzli xarakter daşıyır.

Avropa Şurası Parlament Assambleyasında Azərbaycana qarşı qərəzli və çirkin kampaniyanın aparıldığını deyən dövlət başçısı bu cür yanaşmanın nümayəndə heyətimiz üçün dözülməz olduğunu vurğuladı və bu ədalətsizliyə qarşı bir sıra ölkələrin parlamentləri tərəfindən mövqenin ifadə olunduğunu qeyd etdi.

Avropa Parlamenti bədnam fəaliyyəti ilə erməni separatizminə dəstək verir

Xatırladaq ki, bu il yanvarın 22-də qış yarımsessiyasının açılış günündə AŞPA-da ölkəmizin nümayəndə heyətinin etimadnamələri təsdiq edilmədi.

Bu bədnam təşəbbüs formal olaraq Almaniyalı deputat Frank Şvabe tərəfindən irəli sürülsə də, məsələnin arxasında AŞPA rəhbərliyinin özünün durduğu gün kimi ortada idi. Bu faktın özü də göstərdi ki, Fransa Almaniya vasitəsilə AŞPA-nı Azərbaycana qarşı vasitə kimi istifadə etməyə çalışır.

Ancaq bu gün nəinki dünya səviyyəsində, heç Avropada da nüfuzu olmayan Avropa Şurasına Azərbaycanın heç bir ehtiyacının olmadığı da gerçəklikdir. Bu baxımdan Azərbaycan nümayəndə heyətinin AŞPA-da fəaliyyətini dayandırması onlara daha bir tutarlı cavabdır.

Prezident İlham Əliyev də qətiyyətlə bildirib ki, əgər bir il ərzində nümayəndə heyətimizin hüquqları bərpa olunmazsa, Avropa Şurasından tamamilə çıxmağımız barədə məsələyə ciddi şəkildə baxa bilərik.

Azərbaycana qarşı bu ilin fevralında Avropa Parlamentinin qəbul etdiyi növbəti riyakar qətnamə də Qərbin ölkəmizə diplomatik təzyiq cəhdlərinin daha bir nümunəsidir. Belə ki, qurumun Xarici Əlaqələr Komitəsi tərəfindən hazırlanan və faktların tamamilə təhrif olunduğu "Ümumi xarici və təhlükəsizlik siyasətinin həyata keçirilməsi haqqında illik hesabat" başdan-başa böhtan, yalan və iftiralarla doludur.

Avropa təsisatlarının Azərbaycana qarşı apardığı çirkin kampaniyanın tərkib hissəsi olan bu qətnamədə guya Azərbaycanın Ermənistana hücum edəcəyi kimi absurd iddia da yer alıb.

Ümumiyyətlə, AP bədnam qətnaməsi ilə Azərbaycanın ərazi bütövlüyü və suverenliyinə hörmət etmədiyini, ərazilərimizdə separatçılığı dəstəklədiyini göstərir. Ermənistanın Fransanın təhriki ilə sülh müqaviləsini imzalamaqdan müxtəlif yollarla yayınmasını, təxribatlara əl atmasını, müharibəyə hazırlaşmasını görməzdən gələn AP İrəvana hər hansı sanksiya tətbiq olunmasından, bu ölkə ilə bağlı qətnamə qəbul edilməsindən heç söz belə açmır. Ancaq beynəlxalq hüquqları ayaqlar altına ataraq Azərbaycana qarşı ikilistandartlı mövqe ortaya qoyur. Riyakar qurum almaz qaçaqmalçısı erməniəsilli Kaspar Karapetyanın pullarına həris korrupsioner deputatlarının maraqlarından çıxış edir.

Sabitliyi Azərbaycan təmin edəcək

İkinci Qarabağ müharibəsindən dərhal sonra Azərbaycan tərəfindən Ermənistana sülh müqaviləsinin əsasını təşkil edən beş prinsip təqdim olunub. Ötən dövrdə sülhlə bağlı mühüm təşəbbüslər göstərilib.

Ancaq Bakının regionda real sülhə istiqamətlənmiş addımları Qərbi qətiyyən qane etmir. Fransa Prezidenti Makronun başçılığı ilə təşkilatlanan Avropa təsisatları hər vəchlə Qafqazda sülhə mane olmağa çalışırlar. Qarabağın erməni sakinlərinin olmayan problemlərindən dəm vurmaqdan, riyakar beynəlxalq təşkilatlar vasitəsilə Azərbaycana qarşı əsassız qətnamələr qəbul etməkdən tutmuş təcavüzkar Ermənistanı silahlandırmağa qədər hər cür çirkin yola əl atırlar.

Beynəlxalq cəzasızlıq mühitindən və Qərbdən aldığı mənfur dəstəkdən iştahlanan Ermənistan isə sülhdən yayınır, müharibəyə hazırlaşır.

Martın 4-də Bolqarıstan Xalq Məclisinin Sədri Rosen Dimitrov Jelyazkovu qəbul etdiyi zaman Prezident də bildirdi ki, hətta 2020-ci ildə 44 günlük Vətən müharibəsi başa çatdıqdan sonra Azərbaycanın sülhün irəli aparılması üçün təşəbbüslərinə Ermənistan müsbət münasibət bildirmədi, əksinə, Qarabağda silahlandırma və militarizasiya siyasəti apardı, həmin ərazilərə böyük həcmdə minaların və silah-sursatın göndərilməsini davam etdirdi.

Lakin Qərbin sərgilədiyi ikili standartlar da, Ermənistanın savaşa hazırlaşmaq kimi axmaq cürəti də fiaskoya məhkumdur. Azərbaycan milli maraqları kimi, bölgədəki daimi sabitliyi də müvəffəqiyyətlə təmin edəcək.

Yasəmən MUSAYEVA,

Azərbaycan.-2024.- 6 mart, № 51.- S.6.